مراتي قالتلي انت ساكت ليه.. أقوال إمام عاشور في قضية خناقة مول الشيخ زايد
أصدرت محكمة جنح الشيخ زايد، اليوم السبت، حكمًا ببراءة إمام عاشور لاعب النادي الأهلي في القضية المتهم فيها بالتعدي على فرد أمن داخل مول تجاري بالشيخ زايد.
طالب دفاع إمام عاشور في جلسة سابقة ببراءة اللاعب، مؤكدًا أن عاشور توجه إلى المول بعد تلقيه بلاغًا بتعرض زوجته للتحرش اللفظي، وكان برفقته صديقه فقط، وليس كما ادعى المجني عليه بوجود أكثر من 10 عاملين.
يستعرض «الأيام المصرية» أبرز ما جاء على لسان اللاعب إمام عاشور خلال تحقيقات النيابة بالقضية التي شغلت الرأي العام على مدار أسابيع قليلة مضت.
قال عاشور في أقواله أمام النيابة: « أنا كنت في التجمع الخامس مع صاحبي، وجالي تليفون من مراتي بتقولي إن فيه شباب عاکسوها وعايزاني أكلم معاذ أهديه علشان ميعملش مشكلة، وساعتها أنا كلمت عمر أخو مراتي الكبير، وقولتله قول لمعاذ يهدى ميعملش حاجة، ولما تطلعوا من السينما بلغوا مشرفين الأمن باللي حصل ويتحفظوا عليهم لحد ما آجي ونعمل محضر».
تابع اللاعب موضحًا: "لقيت مراتي قاعدة في العربية، ودخلت معاه المول ومشرفين الأمن حاولوا يوقفوني ويقولولي استنى، قالولي إنهم متحفظين عليهم في الباركينج اللي تحت، ولما نزلت تحت ملقيتش حد وكان فيه زحمة لأن الناس اتلمت لما شافوني، وأنا كنت بقول هما فين هما فين وبزعق لأن مراتي اتعاكست في المول".
وأكمل إمام عاشور: ساعتها مشرفين الأمن قالوا لي أنت بتزعق ليه؟، قولت لهم أنتم المفروض متحفظين على شباب عاكسوا مراتي هما فين، طبعا محدش رد عليا وكذا واحد من مشرفين الأمن طلعوا تليفوناتهم وأنا بتكلم وصوروني، وقولت لهم أنتم بتصوروني ليه، وحصل ازدحام في اللحظة دي وأنا مشتبكتش مع حد فيهم.
واستكمل لاعب الأهلي والمنتخب الوطني في أقواله: "لقيت مشرف الأمن عبد الله واقع على الأرض، وأول ما شفته واقع على الأرض، أنا جريت عليه وقلعته الجزمة، وبحاول أفوقه وفاق بعدها على طول، وقولت للناس بعد إذنكم يا جماعة وسعوا علشان الراجل اللي وقع ياخد نفسه، ولما فاق قالي إنه عنده أسرة وأولاد وعايزك تساعدني والموضوع انتهى، أخدت مراتي وأهلي وكانوا مستنيين بره المول، وروحنا واتفاجأت لما روحت إن فيه خرابيش في إيدي من الزحمة والزق، ومراتي قالت لي أنت ساكت ليه، معملتش قضية ليه؟، قولت لها مش عايز أضر حد».
أمرت نيابة الشيخ زايد، في وقت سابق، بإخلاء سبيل اللاعب بكفالة 5 آلاف جنيه، ووجهت له تهمة الاعتداء على فرد الأمن بالضرب مما تسبب في إصابته، قبل أن تأمر بإحالة اللاعب إلى محكمة الجنح في ضوء ما هو منسوب إليه من اتهامات.
