الرئيس السيسي: "مفيش حاجة اسمها هد الداخلية وابنوها من أول وجديد لأن اللي بيتهد مبيرجعش"
قال الرئيس عبد الفتاح السيسي، رئيس الجمهورية، إن هناك تطويرًا كبيرا نفذته الدولة المصرية بمراكز الإصلاح والتأهيل، مشيرًا بقوله: إحنا بدأنا مرحلة تطوير كبيرة جدًا ولكن بهدوء شديد، مفيش فيها صخب ولا شوشرة ولا تعقد، والتطوير بيتم بدراسات وبتطوير.
وأضاف الرئيس السيسي، خلال مشاركته بـ إفطار أكاديمية الشرطة اليوم: إزاي كان ابنك ولا بنتك عاملة مشكلة ولا حاجة أستنى عليه، ومهم تشوفوا التطوير ده، وتتكلموا عنه، لإن ده مسار الدولة عملته، وهو فيه تفرد للدولة المصرية فيه.
أبرز تصريحات الرئيس السيسي خلال زيارته لـ أكاديمية الشرطة اليوم
وفي وقت سابق، أجرى الرئيس عبد الفتاح السيسي ، رئيس الجمهورية، زيارة إلى أكاديمية الشرطة، اليوم الأحد 16 مارس 2025، حيث كان في استقباله اللواء محمود توفيق، وزير الداخلية، واللواء هاني أبو المكارم مساعد وزير الداخلية رئيس أكاديمية الشرطة.
وصرح المتحدث الرسمي باسم رئاسة الجمهورية بأن الرئيس قدم التهاني بمناسبة حلول شهر رمضان المعظم وتناول وجبة الإفطار مع الطلبة الجدد وأسرهم.
وقال الرئيس السيسي، إنه يبلغ تحياته واحترامه وتقديره للأسر المتواجدة، معقبًا : “أهنئ الطلاب والطالبات الموجودين، على الإنجازات اللي عملوها حتى الآن، وأتمنى لهم فترة الإعداد الأساسي، الخطوة دي تعدي بسلام، وتكملوا الدراسة.
واستكمل الرئيس السيسي: في جهد كبير صحيح لكن التطوير والإعداد الجيد اللي احنا بننشده لأبنائنا وبناتنا، مش بس كده في الأكاديمية، كل مصر.. ولكن احنا بنتكلم النهاردة هنا في الأكاديمية على حلقات التطوير اللي تمت خلال السنوات اللي فاتت”.
وأضاف الرئيس السيسي، خلال كلمته بحفل إفطار أكاديمية الشرطة : “قلت الكلمة دي من كام يوم في الأكاديمية العسكرية، عن التطوير حالة متجددة متنتهيش، ومحدش يتصور أبدا إن أي مستوى أو مرحلة أو أي حالة وصلنا لها إن دي معناها النهاية وممكن ميبقاش في إضافة بعد كدة، وطول ما الدنيا موجودة، والدنيا بتتغير يوم عن يوم، ودي حكمة ربنا في خلقه، والدنيا اللي احنا فيها، الدنيا من ألف سنة غير الدنيا دلوقتي، غير الدنيا بعد شهر واتنين وتلاتة جايين”.
وتابع الرئيس السيسي حديثه قائلًا: “سعداء بيكم، أهلا وسهلا، ومرة تانية بشكركم على أبنائكم وبناتكم اللي موجودين معانا، وزي ما انتو حافظتوا عليهم، اتأكدوا إن احنا كمان بنحافظ عليهم، مش هقول زيكم، ولكن بمعايير علمية وتربوية وإنسانية، بنتعامل فى تنشئة وإعداد وبناء الجيل أبنائكم وبناتكم”.
وأوضح الرئيس السيسي: “خليني أكلمكم عن اللي بنعمله مع أولادنا وبناتنا هنا في الأكاديمية، قلت الكلمة دي وبجددها معاكم وأسمعها لكم، احنا في مرحلة تطوير كبيرة جدا بس بهدوء شديد، مفيش فيها صخب ولا شوشرة ولا تعجل، وفي مؤسسات الدول أي تطوير بيتم فيها لازم يتم بدراسات ويتم بالتدريج، وإنتو لما يكون عندكم ابن أو بنت وعمل مشكلة ولا حاجة، تطولوا بالكم عليه”.
وأضاف الرئيس السيسي: مفيش حاجة اسمها هد الداخلية وابنوها من أول وجديد، اللي بيعمل كده بيهد بلده اللي بيتهد مبيرجعش، وربنا أراد إننا نكون شايفين نماذج حية موجودة معانا من 15 سنة، وإحنا متمسكين بمؤسساتنا والإصلاح والتطوير، ولكن دون أي آثار سلبية على الدولة المصرية، ونجحنا فيه بإرادة ربنا.
ويحرص موقع الأيام المصرية على متابعة كافة الأخبار، ضمن التغطية الإخبارية المستمرة والحصرية التي يقدمها الموقع لمتابعيه في مختلف المجالات والتخصصات، ويمكنكم متابعة المزيد من الموضوعات المتعلقة بهذا الشأن عن طريق أخبار مصر اليوم.
