محافظ الشرقية فى حوار خاص لـ«الأيام المصرية»: الشراقوة طلعوا 49 تريلا محملة بالأغذية والأدوية لأهالينا في غزة

نتعاقد على إنشاء 3  مصانع تدوير قمامة لن تكلف الدولة جنيها واحدًا

لست راضيا بالشكل الكامل عن القطاع الصحي ورغيف الخبر وخصوصا السياحي

نضرب بيد من حديد في ملف مخالفات التصالح ونسد الباب أمام الأبواب الخلفية

 رؤساء المدن المقصرين في آداء واجباتهم يمشوا فورا “استحالة يستنوا”

أنا شديد في الحق.. وأهل الشرقية ما فيش أطيب منهم 

رجل محليات من الدرجة الأولى، اختارته القيادة السياسية لتولي شئون محافظة الشرقية ، كونه من كوادر المحليات المخضرمة، التي تميزت بخبرة طويلة في العمل داخل الإدارة المحلية على مختلف مستوياتها،وذلك بعد نجاحه في عدد من المناصب التي تولاها بداية من مدير تنظيم حتى مدير بالشؤون الهندسية في كفر الشيخ، ثم مديرا عاما بإسكان كفر الشيخ، ثم مدير عام التخطيط العمراني بكفر الشيخ، وشغل أيضا رئيس مدينة البرلس.

وانتقل من كفر الشيخ إلى المحلة،ثم تولي منصب سكرتير عام مساعد بمحافظة البحيرة، ثم سكرتير عام  لمدة 5 سنوات، وتم ترشيحه  سكرتيرا عاما بمحافظة القاهرة من 2018 حتى 2024، وهو أيضا عضو بنقابة المهندسين العريقة، التي خرجت لمصر علماء ومحافظين ووزراء.

إنه المهندس حازم الأشموني محافظ الشرقية الجديد، إلتقته «الأيام المصرية» لتفتح معه الملفات المغلقة منذ جلوسه علي كرسي المحافظة ،فإلي نص الحوار:

ـ في البداية: حدثنا عن المهندس حازم الأشموني؟ وتاريخ عمله في المحليات؟

أنا مهندس مدني خريج جامعة الإسكندرية، وشغلت مناصب عدة، وأقمت فترة كبيرة خارج مصر وتدربت كثيرًا، وشغلت منصب مدير شركة كبيرة في السعودية لأكثر من 10 سنوات بداية من عام 1993.

- متي عدت الي حضن الوطن؟

بعد انتهاء فترة عملي بالخارج ،رجعت مصر على العمل التنفيذي وحصلت على دورات كثيرة مثل أي مهندس طموح، حصلت على فرصتي وأهلت نفسي واهتميت بالعمل في مجالس المدن، أبرزها في كفر الشيخ بمجالسها المختلفة، بداية من مدير تنظيم حتى مدير بالشؤون الهندسية في كفر الشيخ، ثم شغلت منصب مدير عام الإسكان بكفر الشيخ، ثم مدير عام التخطيط العمراني بكفر الشيخ، وشغلت أيضا رئيس مدينة البرلس لمدة عامين، وأثبت نجاحي ثم عودتي مرة أخرى للإسكان.

و تركت محافظة كفر الشيخ، ثم انتقلت إلى المحلة للعمل التنفيذي في مدينة المحلة عام 2017، وبعدها بسنة كاملة، شغلت منصب سكرتير عام مساعد في محافظة البحيرة، كان وقتها المهندسة نادية عبده، محافظ البحيرة آنذاك، والتي تدرجت أيضا في عدة مناصب حتى وصلت لمنصب المحافظ بعدما تركت شركة المياه، وكانت أول سيدة تشغل منصب المحافظ، كما أنها رشحتني لمنصب سكرتير عام بعدها، ثم شغلت منصب سكرتير عام محافظ البحيرة لمدة 5 سنوات، ثم تم ترشيحي كسرتير عام بمحافظة القاهرة وقضيت الفترة من 2018 حتى 2024، ثم شغلت منصب محافظ الشرقية.

-حدثنا عن كواليس اختيارك لمحافظة الشرقية؟

كل حاجة تمت بتاعت ربنا، وكلها اجتهادات والتسلسل العادي لأي قيادي الدولة بتختاره فهي تسلسلات طبيعية من خلالها صاحب القرار بياخد القرار الصواب.

-هل توقعت اختيارك لهذا المنصب الرفيع؟

الواحد بيبذل مجهود وربنا بيكرمك لحد ما تتشاف وربنا أكرمني و اتشافت.

-الغربال الجديد له شده.. فور توليك  المسئولية كان الجميع يخشي الإقتراب منك.. لماذا؟

أنا شديد في الحق بس، وهما جربوا كده في الأمور العادية، ما أتخيلش هما شافوا حد أطيب مني، لكن الحاجة اللي بتخلي الإنسان ياخد اتجاه الشدة هي الغلط أو التعدي على الحدود وهي من أصعب الأمور في الدنيا، حق الغير للغير دي حاجة صعبة ولما بنوصل للنقطة دي خلاص لازم يكون فيه شدة.

-ما انطباعك عن محافظة الشرقية؟

قرأت كثيرا عن محافظة الشرقية، وجمعت معلومات جيدة، ووجدت أن أهل الشرقية مفيش أطيب منهم، اللي بيسمع منهم الحوار وجها لوجه بنوصل منه للي احنا عاوزينه، بدليل أن المجتمع المدني هنا بيساعد معايا في أمور كتير جدا، خاصة  الناس في المستشفيات، أنا شوفت هنا مستشفى بالمجان بالكامل وكمان فيه مركز أشعة في العاشر من رمضان بالمجان بالكامل، وفيه تنسيق حاليا مع نفس الشخص أننا نعمل مركز أشعة في الزقازيق بالمجان بالكامل.

-ذكرت قطاع مهم جدا وهو قطاع الصحة داخل محافظة الشرقية.. ما تقييمك له؟

احنا عندنا مستشفى بالسعديين ومستشفى الأربعين بالعاشر بالمجان بالكامل، يؤديان خدمة فوق الممتازة كأجهزة وتعامل أطباء ونظافة، لم يتم إرسال حالة تستحق ومخدهاش، وراضي عن المجهود، الذي يتم بذله في القطاع الصحي لكن لسه موصلناش للرضا الكامل، والحاجة تتم في حدود الإمكانيات الموجودة.

-ماذا عن قطاع القوي العاملة وتوفير فرص العمل لأبناء المحافظة؟

أي مواطن يرغب في الحصول علي وظيفة ويحضر معنا لقاءات المواطنين، نقوم بتوفيرها له في الحال "وقبل الخروج من باب المحافظة بيطلع واخد وظيفته"، هذا بالنسبة للمواطنين الراغبون في السعي والعمل بجد،وهناك نوعين موجودين من الناس، واحد عاوز يشتغل في شغل جنب البيت وواحد في الحكومة فقط ومبيشتغلش قطاع خاص

-وماذا عن ذوي الهمم والاحتياجات الخاصة ؟

الإهتمام بذوي الهمم له أولية كبري وتوفير فرص عمل لهم في المصانع "ووزارة العمل عاملة شغل محترم معانا في الموضوع ده" فالمحافظة لا تترك أحدا من ذوي الهمم زي ما وصانا الرئيس عبد الفتاح السيسي، سواء يقدر يروح الشركة أو معندوش الإستطاعة يروح، وبيكون له راتب ثابت"، وأتحدى أي حد يكون لجأ للدولة في النقطة دي وملقهاش موجودة.

-ترأست حملة كبرى لإزالة الإشغالات المخالفة بشارع البوسطة بالزقازيق؟ هل تتكرر مرة اخري؟

هناك نوعين من الإشغالات، إشغالات محدودة وقانونية وصالحة، والقانون يسمح بإشغالات معينة، وهناك استثناءات في رمضان، وهذه تكون برسوم معروفة للجميع، وذلك يجعلك واثق وضامن أن المنتج المعروض ليس مضروب وسليم، ولو حصل اختناق في مكان هتقدر ترجعله.

أما عن حملة شارع البوسطة الأخيرة بمدينة الزقازيق ،  اللي اشتغلنا عليهم في الحملة دي حاجتين، المنظر كان قدام السكة الحديد صعب جدا، والفئة اللي كانت موجودة لا تصلح لمحلات، لأنهم باعة جائلين بصورة فجة شوية، هل احنا منعنا خالص لا طبعا، الفج كله اتشال خالص، وكان فيه رضا من الناس مش طبيعي ولم يكن هناك حد معترض، وفيه حملات تانية خلال شهر رمضان، واحنا مستمرين دلوقتي سواء داخل الزقازيق أو خارج الزقازيق، وهنزل تاني.

-مواقع التواصل الاجتماعي والسوشيال ميديا انتفضت بعد تقبيل وكيلة مدرسة بالشرقية يد زوجها داخل الطابور .. لم تعلق مطلقا علي تلك الواقعة؟

العمل في الموضوع ده عمل أخلاقي وأدبي فقط لا غير، نرسي أصول احنا اتربينا عليه ونفسنا ولادنا يتربوا عليها، وده كان الغرض الأساسي من الجزاء الذي وقع عليهما، لكن مبنقطعش عيش حد أو نتعامل معاملة سيئة مع أحد، لدرجة أنهم هما نفسهم مقتنعين جدا باللي حصل، حتى بعد التحقيقات

-السوشيال ميديا انقسمت بين مؤيد ومعارض في قصة المدرسة وزوجها؟

ده طبيعي جدا، لأن المتلقي تلقى المعلومة بطريقة ما، إنما لما أقعد وأقولهم الحقيقة أن ده فعلا كان غلط، قالولي فعلا حضرتك عندك حق

-هل أنت راضِ عن ملف رغيف الخبز المدعم؟

لا طبعا، وطبيعي يكون فيه قصور، لكن المفاجأة أن المشاكل في العيش السياحي أكثر من المدعم، والمخابز اللي قفلتها وألغيت نشاطها في وقت من الأوقات وحاربت فيهم، معظمهم مش من المدعمين، لأن الدولة دعمت المخابز كتيرا جدا وقادر تسيطر على مشكلاتها، لكن السياحي مختلفين شوية، احنا ركزنا معاهم في حاجات كتير أبرزها حاجات بيئية وصحية أكتر من موضوع الوزن، كنا بنهتم أن المكان اللي يخبز فيه المنتج أنه يطلع خبز نظيف.

-وماذا عن التصالح في مخالفات البناء داخل المحافظة؟

احنا بندير الموضوع بكل شفافية، والدولة حاطة كل الخطوات السليمة على الشاشة وواضحة للناس كلها، وإزاي هتتعامل، الدولة قالت قدم أوراقك بشكل كامل وهتاخد خدمة فورية

-هناك طرق ملتوية وأبواب خلفية في هذا الأمر ؟

لجوء بعض الناس للطرق الملتوية والأبواب الخلفية، بنقومها وبإيد من حديد على أي حد بيعمل كده، وعندنا من الخبرة الكافية نكتشف الأمور دي، وده بيكون من خلال تغيير في الأجهزة الإدارية اللي بيحصل عندها أي خلل بدون نقاش، وبيحصل تدوير في الهيئات الهندسية وتدوير لرؤساء المراكز التكنولوجية وبيحصل تغيير لرؤساء المدن أو الإستبعاد.

-العملية التعليمية داخل المحافظة .. ما تقييمك لها؟

طبعا احنا ماشيين على خطوات وزير التعليم، ونسير على خطوات جيدة، دورنا هنا بنأمن نظافة المدارس والتعامل مع الكثافات والتجاوزات في نقل طلبة ودخولهم دون الإلتزام بالتنسيق، أنا بسهله كل مهمته وبساعد الوزير أننا نوفر أراضي لبناء مدارس زيادة وفيه تعاون كامل مع هيئة الأبنية التعليمية.

-ملف الطرق من أهم الملفات المطروحة.. ماذا عن طرق الشرقية؟

بنعمل محور اتجاهين بإتساع كافٍ جدا، لأنه بيعمل كثافة،وتكلفة المجرى المائي اللي بيتردم كبيرة جدا، وهناك أكتر من محور كان فيه مشاكل بسيطة واتحلت، معمول في الشرقية محاور جديدة تنفذها هيئة الطرق

-وماذا عن الطرق المتهالكة والطرق الداخلية والشوارع؟

احنا بنروح للأسوأ الأول نعمله ولازم يكون فيه ناس بتسأل ان الشارع الفلاني ده لسه متعملش،اشتغلنا بالأنترلوك في أماكن كتير جدا، وغطينا أماكن حيوية جدا في بعض المدن وأماكن كتير اتعملت بالأنترلوك وشوفت فرحة الأهالي بيها لا توصف، أماكن تم رصفها بالأنترلوك لم يستطيع أحد السير فيها على الأقدام يوما ما، وشوفت الناس بتكنسها خوفا من اتساخها بالأتربة كأنهم في بيوتهم

-تقييمك مشروع حياة كريمة؟ وماذا عن توجيهات الرئيس السيسي؟

احنا وصلنا لـ95% تقريبا، واللي فاضل في مركز الحسينية كلها أنها تلتزم بالطرق اللي لسه فيها مرافق بتخلص، المشروع كمشروع عملاق على مستوى الجمهورية، ودي مش توجيهات لكن دي أوامر يتم تنفيذها طبقا لتعليمات الرئيس عبد الفتاح السيسي، وكده بنقول لكل الناس أن المنطقة دي مش محتاج تدخلها تاني لمدة 30 سنة، لما بتخلص من المدن دي بالوحدات الصحية والمدارس وكل ما هو يحتاجه المواطن.

-هناك تأخير في إنهاء بعض المشروعات الخاصة بالطرق؟

اللي مأخر الطرق في المدن، لأن تعليمات القيادة السياسية بتقول لازم أكون مخلص المرافق كاملة، لأن كل شيء لازم يتعمل صح، فيه نتيجة إن شاء الله الناس كلها حساها، حياة كريمة ترقى لحياة القاهرة والجيزة .

-هناك بعض القرى فقيرة خدميا وليست مدرجة في مشروع حياة كريمة.. ما تعليقك؟

عندي حاجتين في القصة دي، كل ما هو مبقدرش أوصله كرصف لازم يكون فيه بلاغات أو شكاوى من الأهالي، الشرقية بلد مش صغيرة وفيها مجاري مائية كتير جدا، نحن نعاني في التعامل مع بعض الطرق، تصميمها ووضعها الأساسي، ودي مشاكلها كتير جدا، عشان تتوسع بتتكلف مبالغ ضخمة،وعشان تحمي الطريق نفسه تحتاج إلى مبالغ مالية ضخمة، لكن في نفس الوقت بنحاول نوزن الأمرين مع بعض

-إيه الحاجة اللي فرحتك ونفسك تعملها في الشرقية؟

أي مسؤول في الدنيا بيفرح لما بيلاقي إنتاج على الأرض، أي حد بيشتغل في العمل ده، بيحتسبه لوجه الله تعالى عشان هيتحاسب عليه يوم القيامة، والرضا اللي بنشوفه في وجه المواطن ده لوحده بالدنيا، أنت ربنا أكرمك أوي، المفروض منك أنك تشكره بالعمل، مش ممكن يكون في إيدي حاجة ومعملهاش، بندور على الاستثمار فيها، حاليا نتعاقد على 3  مصانع تدوير قمامة دون تكلفة الدولة أي جنيه واحد، وهما في حالة الدراسات وبنرسي العروض، أول ما هيبدأو هتكون نقلة كبيرة.

-حدثنا عن موقف أثر فيك منذ توليك منصب محافظ الشرقية؟

الشراقوة طيبين وفيه مواقف كتير جدا أثرت فيا، يكفي النهارة لما أقول أنا عاوز تريلات تروح لغزة، يكفي أنها طالعة من الشرقية، ده غير حضور الكثيرين أمام المحافظة بشكل رسمي وكانوا 49 تريلا، أقصد فيه جمعيات تبع التضامن ده غير المجتمع المدني طلعوا تريلات محملة بالأغذية والأدوية وغيرها لأهل غزة، فيه خير كبير جدا.

-هل أنت راضٍ عن آداء التنفيذيين ورؤساء المدن؟

أنت بتتعامل مع أسماء بتديها خبرتك أول بأول وبتصلح فيها وبنعدل لكن الرضا بتاع ربنا ولكن احنا بنجتهد على قد الإمكانيات المتاحة، ولو مفيش رضا عن أي واحد فيهم هيمشي فورا، إذا وصلني أن فيه واحد قصر في آداء واجبات وظيفته استحالة هيستنى وهما كلهم عارفين كده.