ميشيل ميلاد: حملة الهجوم على عبد الرحمن محمد ممنهجة ومش طبيعية| خاص

مسلسل النص أحمد أمين .. تصدر مسلسل النص قائمة المسلسلات الأكثر مشاهدة ضمن مسلسلات السباق الرمضاني الحالي 2025، حيث يعد مسلسل النص من أفضل المسلسلات الكوميدية في رمضان 2025.

وكان لموقع الأيام المصرية حوار خاص مع الفنان ميشيل ميلاد أحد أبطال المسلسل، كشف من خلاله عن كواليس العمل.

وكشف الفنان ميشيل ميلاد عن رأيه في الأعمال المقتبسة من روايات تاريخية في تصريحاته لموقع "الأيام المصرية" قائلًا: "لا والله هي بتبقى ليها عالم خاص بتاعها كده بيبقى ظريف يعني وبيبقى مختلف عن الكتابات حتى الموجودة دلوقتي يعني فكرة إن انت تقتبس رواية ده أولًا هو الشخص اللي كتب الرواية ده كتبها في وقت مش مستعجل عشان يلحق السيزون ولا في الحاجات دي فكان مكتوبة بشكل من الروقان والصفاء كده يعني انا بحب الفكرة دي".

وتابع ميشيل: "فكرة إن انت تخلي رواية تقلبها مسلسل أو تقلبها مسرحية أو تقلبها فيلم الموضوع ده بالنسبة لي ظريف يعني بحس إنها بتطلع في الغالب أعمال كويسة طبعا مبنقولش إن كل الحاجات تبقى مقتبسة من زمان لأن هنيجي في وقت من الأوقات ونخلص كل الحاجات بس يعني يبقى مفيش مانع إن وسط السيزون كله يبقى فيه مسلسل أو اثنين واخدين رواية ولا حاجة معمولة يعني شيء بيبقى ظريف".

ميشيل ميلاد: مسلسل النص متشاف كويس واحنا في زحمة السيزون

وعن رأيه في أيهما أفضل عرض المسلسل في رمضان أو خارج السباق الرمضاني، قال ميشيل: "لا أنا في حاجة دايما بحسها كده إن الكواليتي بيفرض نفسه يعني هو متشاف كويس الحمد لله الناس كتير بتتكلم عنه بشكل كويس، لما طبعا بيبقى أوف سيزون الحياة بتبقى أفضل شوية فبياخد راحة أكبر يعني بس أعتقد إن هو الكواليتي بتاعه مخليه يتشاف كويس حتى واحنا في السيزون يعني".

ميشيل ميلاد: الهجوم اللي اتعرضلوا عبد الرحمن محمد ممنهج ومش طبيعي

وحرص الفنان ميشيل ميلاد على الرد على الهجوم الحاد الذي تعرض له زميله الفنان عبدالرحمن محمد، قائلًا: "تابعت الهجوم اللي اتعرضلوا عبد الرحمن محمد وحاسس إن هو مش طبيعي وحاجة ممنهجة خصوصا إن عبد الرحمن ده موهوب جدا جدا ومنور جدا في المسلسل، وهو أصلًا شخصية ظريفة محترم جدا ومتربي جدا في الحياة عمومًا وفنان فحاسس إن ده شيء مش طبيعي يعني حاسس إن هي حاجة مش طبيعية لأنها بتحصل فجأة وتحس أن الاسكريبت بيتعاد والاسكريبت واحد من ناس كتير كده فمحسيتهوش حقيقي بصراحة".

وتابع ميشيل: "معنديش تفسير للموضوع بس أنا حاسس إنه مش طبيعي لأنه يعني انت برضوا بتاخد بالأسباب أو بتاخد بالمعطيات اللي عندك، والمعطيات إن هو شخص كويس جدا، سنه لسه صغير، شاطر جدا، موهوب، وكوميديان لطيف جدا وبيضحك جدا، وكانت روحه حلوة جدا جدا في الكواليس وطالعة في المسلسل حلوة جدا فأنا بالنسبة لي دي المعطيات اللي عندي فلما الاقي هجوم عامل كده أقول لا يبقى في مشكلة".

وعن رأيه في المسلسلات القصيرة المكونة من 15 حلقة قال: "جه الوقت إن احنا المسلسلات الـ 30 حلقة تبدأ تقل هو لان فكرة الـ 15 بتديك اريحية أكتر في إنك تتناول بعض المواضيع اللي هي هتبقى زيادة عليها 30 حلقة، في مواضيع لو عملتها في 30 هتبقى كتير عليها وقتها هتضطر إن انت تبدأ تضيف خطوط درامية جديدة وتضيف حاجات برا الموضوع عشان تكمل الـ 30 بتملى فيهم، لكن الـ 15 في مواضيع كتير جدا تحتمل إن هي تبقى 15 حلقة وتبقى ظريفة جدا، فشايف إن هو شيء إيجابي عشان منبقاش مضطرين طالما رمضان فنعمل مشاريع مش احسن حاجة، بس فيه طبعا حاجات 30 بتكون لطيفة".

ميشيل ميلاد: كان معايا في الكلية واحد شبه شخصية إسماعيل

وصرح الفنان ميشيل ميلاد عن اقتباسه شخصية إسماعيل من زميله في الكلية، قائلًا: "كان معايا في الكلية واحد شبه شخصية إسماعيل، كان له طريقة معينة، بس أنا في الغالب كل الحاجات اللي بعملها بتكون حقيقية، الصور بتكون مستمدة من الواقع اللي موجود يعني هتلاقي طريقته طريقة كلامه طريقة حد تعرفه الضحكة حد تاني خالص، وأنا بدور في المرجع بتاعي بشوف شخصية إسماعيل ده أقرب لمين في الحياة، يا إما حد شوفته في الشارع، يا إما يا جاري، يا إما قريبي، يا إما حاجة أنا جوايا جديدة عايز اطلعها، يعني إسماعيل ميكس من بين ناس كتير وحاجات كتير في حياتي، يعني هو دائما الممثل بيبقى عامل كده إن هو دائما بيطلع من المخزون اللي عنده".