مسلسل النص أحمد أمين ..ميشيل ميلاد: أصعب موقف واجهته في التصوير هو مشهد التفجير| خاص

مسلسل النص أحمد أمين .. تصدر مسلسل النص أحمد أمين محركات البحث على مواقع التواصل الاجتماعي، حيث نال إعجاب الكثير من المشاهدين بسبب فكرته المقتبسة عن رواية مذكرات نشال الذي خطفت انتباه المشاهدين.

وكان لموقع الأيام المصرية حوار خاص مع الفنان ميشيل ميلاد أحد أبطال مسلسل النص، كشف من خلاله كواليس العمل.

ميشيل ميلاد: دوري في مسلسل النص في التلاتينات بيوازي دلوقتي الهكر

وكشف الفنان ميشيل ميلاد عن سبب ترشيحه لدور إسماعيل المخترع الذكي في زمن الثلاثينيات، قائلًا: "والله هو اسمي اطرح أنا مش عارف مين اللي قاله بالضبط بس هو يعني أخد موافقة من كل الموجودين من المنتج أستاذ تامر مرتضى من المخرج أستاذ حسام علي والأستاذ أحمد أمين يعني كل الناس يعني وافقوا عليه".

وتابع ميشيل، "اللي جذبني للدور إنه مختلف عن الحاجات اللي كنت بعملها يعني دور مختلف في شكل كوميديا جديد، الكاركتر نفسه، الحقبة الزمنية اللي بتدور فيها الأحداث فكرة التلاتينات وقت التلاتينات ده، طبيعة الشخصية، طبيعة الرواية، أصلا بتاعة فكرة مذكرات نشال لأنها حدوته شيقة أصلا في المقام الأول يعني، والشخصية نفسها يعني فكرة المخترع اللي في زمن التلاتينات اللي هو بيوازي دلوقتي الهكر فطبعا الشخصية نفسها فكرتها ظريفة فحسيت أن يطلع منها حاجات كتير لطيفة يعني مختلفة عنها".

ميشيل ميلاد: كنت بقعد مع أحمد أمين نتكلم في الفن ونتكلم عن الحدوتة والشخصيات 

وعن كواليس مسلسل النص، قال ميشيل: "الكواليس ممتعة جدًا وبتضحك جدًا طول الوقت مع الأستاذ أحمد أمين القعدة معاه أصلا لوحدها ممتعة جداً مليانة كلام في الفن وكلام عن الحدوتة نفسها وكلام في الشخصيات وكلام يعني كلها وقت قضيت وقت ممتع جدًا جدًا وقت التصوير الكرو كله بصراحة جميل يعني إن كان أستاذ أحمد أمين، حمزة العيلي، عبد الرحمن محمد، صدقي صخر، أسماء أبو اليزيد كل الناس كانت جميلة جدًا جدًا، كرو الإخراج كله ظريف أستاذ حسام علي المخرج، وشريف حسين المساعد الأول، وكل الناس يعني الصراحة كانوا ناس ظريفة جدًا جدًا".

ميشيل ميلاد: أصعب مشهد واجهته هو مشهد التفجير اللي كان في الحلقة السابعة

وكشف عن التحديات التي واجهته أثناء التصوير، قائلًا: "أصعب مشهد واجهته هو مشهد التفجير اللي كان في الحلقة السابعة لأن أنا كنت أول مرة أمُر بفكرة التفجير ده، فكانت لحظة صعبة جدًا فكرة إن انت تبقى معدي ومحدش قالي إيه اللي هيحصل، كنت سايق أنا العربية وفجأة الكامب اللي ورايا كله بيتفجر فكان تفجير رهيب أنا كنت أول مرة أحس الإحساس ده، كان تفجير عظيم يعني كأن قنبلة انفجرت جنبك شيء مرعب جدًا يعني".

ميشيل ميلاد: قعدت أذاكر الحقبة الزمنية واتفرج على نجيب الريحاني وعلي الكسار

وأوضح، "ذاكرت الحقبة نفسها يعني قبل ما أعمل أي حاجة ذاكرت الزمن نفسه اتفرجت على أفلام كتير لها علاقة بوقت التلاتينات ده، كل حاجة بقى نجيب الريحاني، علي الكسار، كل الأفلام اللي عاملة كده عشان نكتسب اللغة اللي نتكلم بيها حاولت على قد ما أقدر يعني واتفرجت على أفلام وثائقية لها علاقة بالفترة دي عشان خاطر اعرف طبيعة الحياة في الوقت ده عاملة ازاي، الناس كانت حالتهم الاجتماعية عاملة ازاي، كانوا بيتكلموا بأني شكل الطبيعي بتاعهم كان هل الطريقة اللي احنا بنشوفها في الأفلام ولا طريقتهم كانت طبيعية زي دلوقتي".

واستكمل، "وبعد كده دخلت في الكاركتر بشوف إيه السمات اللي بتميزه هو لما يبقى مخترع في الوقت اللي لسه مظهرش فيه حاجات كتير هيبقى تفكيره في الحاجات عامل ازاي لحد ما وصلنا لفكرة المخترع اللي بيخترع حاجات دموية شوية بتفيدهم هما نفسهم في الحدوتة بتاعتهم في حدوتة السرقة والحواديت فكان الموضوع ذاكرت الشخصية من هنا يعني بدأت الحدوتة من هنا وديتها لأقرب مرجع حاولت أشوف إيه في الفكرة الأقرب ليها دلوقتي فلاقيت أنه الهكر هو أقرب حد ممكن يكون إسماعيل في الوقت الحالي فقعدت أذاكر لما يكون في هكر في التلاتينات شكله هيبقى عامل ازاي طريقة كلامه هتبقى ازاي وملامحه هتبقى عاملة ازاي لحد ما وصلت لإسماعيل".

ميشيل ميلاد: مستعانتش بمدرب تمثيل عشان أجسد شخصية إسماعيل 

وعن استعانته بمدرب تمثيل أوضح، "أنا الحقيقة مستعانتش بمدرب تمثيل عشان أجسد الشخصية، في ناس معينين في حياتي ببقى واثق في رأيهم لما بعمل الحاجة أسألهم إيه رأيكم في الحدوتة دي عاملة ازاي بتاع الشكل ده عامل ازاي لكن ما فيش حد يدربني على حاجة".

من هو ميشيل ميلاد ؟

• تخرج في كلية الألسن بجامعة عين شمس
• بدأ ميشيل ميلاد مسيرته الفنية من خلال المشاركة في مسرح جامعة عين شمس،
•  ثم انضم لمركز الإبداع الفني مع المخرج خالد جلال
•  شارك في العديد من العروض المسرحية، مثل "سينما مصر"، الذي قدم فيه شخصية "الشيخ حسني"
• حاز ميشيل ميلاد العديد من الجوائز خلال مشاركته في مهرجانات المسرح، منها جائزة أحسن ممثل في مهرجان إبداع الشارقة ومهرجان نجوم المسرح.