عمر خورشيد: الفنان عرض وطلب والشللية بتحكم .. والتيك توك قدم عاهات |خاص

كشف الفنان عمر خورشيد عن رأيه في مشاركة بعض مشاهير التيك توك في الأعمال الفنية، ويشير إلى أن طلب الفنانين مشاركتهم في الأعمال ليس صحيح لأنه بهذا التصرف "يقلل من نفسه".

وقال في تصريح خاص لموقع الأيام المصرية أن المشاركة في الأعمال الفنية رزق من ربنا، وأن التيك توك كما قدم نماذج جيدة، ساهم في تقديم نماذج سيئة وصفهم بـ "العاهات".

عمر خورشيد: لودامت لغيرنا مكانتش جاتلنا

وقال عمر خورشيد عن قلة الأعمال المعروضة عليه وعلى أبناء جيله من الموهوبين: "لا هو دي أرزاق ربنا
يعني أنا مقدرش أقول قلة الأعمال المعروضة مهو لو كانت دامت لغيرنا مكانتش جاتلنا، ولو كانت دامت لينا مكانتش راحت لغيرنا، فدي أرزاق ربنا وربنا وحده هو إللي بيوزع الأرزاق وبندعيه إن هو يرزق".

وتابع: "وممكن على فكرة تعمل عمل بطولتك ومياخدش حظه من النجاح ولا من التقدير ولا ياخد حظه من الدعاية
فكل ده بيبقى بتاع ربنا وممكن تعمل عمل وحش جدًا ومهمل جدًا وفجأه يكسر الدنيا وكل الناس يشوفوه ويبقى علامة من علامات الفن في العصر إللي أنت فيه، أنا لسه عامل السنة إللي فاتت فيلم ويزو سكول مخدش حقه في العرض ومخدش حقه في الدعاية ومخدش حقه في النجاح مع إن هو فيلم لطيف يعني جدًا فملهاش مقياس غير ربنا سبحانه وتعالى وتوفيقه يعني".

عمر خورشيد: الفنان إللي بيطلب شغل مش بيقلل من نفسه

وأضاف عن مشاركة بعض النجوم في أكثر من عمل في حين يطالب البعض الأخر بالمشاركة في أي عمل بسبب قلة الأعمال المعروضة عليهم : "دي أرزاق ربنا، وطبعًا مع ده شطارة وعلاقات وحب يعني، أنا كعمر ليا علاقاتي الناس بتحبني، وفي مسلسلين دلوقتي في رمضان أنا معتذر عنهم والمنتجين والمخرجين صحابي جدًا بس أنا يعني مش علشان شغل وخلاص اشتغل لأ أنا بنقي الشغل إللي بعمله، ولازم أكون مستريح للدور ويكون حافظلي مقامي وحافظلي مركزي، وأقدر أبين فيه شغلي حتى لو فيلم زي ويزو سكول مخدش حقه ولا حظه في النجاح، بس أنا كنت حابب إن أنا أعمل الدور ده، وحابب إن أنا أعمل الشكل ده بس ده كل الموضوع يعني ملهاش علاقة بمين شغال ومين قاعد دي أرزاق ربنا".

وتابع عن النجوم الذين يطلبون المشاركة في الأعمال الفنية قائلًا: "الفنان إللي بيطلب الشغل مش بيقلل من نفسه، أنت طول عمرك عرض وطلب وطول عمرك سلعة مفيش حاجة اسمها أنك تقلل من نفسك إن أنت تطلب شغل أنا ياما طلبت شغل وياما روحت كاستنج وياما وقفت قدام كاميرا واتقالي اديني جنبك وبصلي كده وأضحك ضحكة طب كشر مش عيب ومش غلط هو غلط إن موظف قطاع عام يسيب الشغل ويروح يدور على شغل في شركات استثمارية فيروح يخبط عليهم يقولهم مساء الخير في شغل ولا لا".

واستكمل: "عمر ما السعي للرزق كان غلط أو يقلل من الفنان، هو بس عشان الفنانين بيقولوا إن ده بيقلل من نجوميتنا، أيوة ماهو أنت لو نجم عمرك ما هتطلب شغل ولو أنت قديم وعريق كانت الناس جريت وراك، ومكنتش هتحتاج تطلب شغل فلا خالص، وعلى فكرة أنا عملت تيستات الكاميرا دي بعد فيلم كاريوكي وبعد فيلم ما تيجي نرقص وبعد ما شاركت في بطولة 31 مسلسل مفيهاش أي مشكلة خالص عادي جدًا، وعلى فكرة كنت بعمل الحاجات دي وباخد الدور ارفضوا وأقولهم مش عاجبني فعادي جدًا، يعني ما هو عرض وطلب أنا بعرض نفسي أنت بتطلبني أنا من حقي أوافق أو أرفض مفيهاش أي مشكلة خالص".

عمر خورشيد: اللي منجحش في الفن يدور على حتة تانية 

ووجه عمر خورشيد رسالة للفنانين الذين لم يصيبهم الحظ: "غيروا المجال بجد يعني أنتم مش محتاجين إن أنتم تبقوا فنانين فقط، ومش محتاجين إن أنتم تكونوا ممثلين فقط، ممكن يكون رزقك مش في المجال ده جرب في حته تانية ولو أنت مُصر وعايز تنجح وده طموحك ومصر يبقى أستمر و أسعى وروح وخبط على ده وشوف ده وروح كاستنج وقابل الناس دي، واتصاحب على الناس دول وعرف نفسك وخلي الناس تحبك، وخد ورش وأتمرن كويس جدًا علشان تكبر وتبقى باين وسط الناس".

عمر خورشيد: التيك توك قدم عاهات للوسط الفني 

وأضاف عمر خورشيد عن الفنانين الذين يتجهون للتيك توك بغرض الربح المادي قائلًا: "والله أي حاجة يعني هم أحرار، أنا والدتي بتعمل تيك توك وحقها، وعلى فكرة مامتي بتخلص مسلسل بتخش مسلسل هو الموضوع مش موضوع مش لاقيه شغل، هي بتحب تقابل الناس وتقعد تتكلم مع الناس وكده، بتعمل لايفات وتقعد الناس تسألها اسئلة وتجاوبهم يعني هي بتحب ده، وفي فنانين تاني بيعملوا ده من أجل الربح المادي وأنا واحد من الناس ضد تمامًا تطبيق التيك توك وتطبيقات اللايفات ديي، لأن زي ما قدمت ناس كويسة زي الفنانين وزي الناس المحترمة قدمت برضو عاهات كتيرة فأنا رافض إن أنا أدي شرعية للبرامج دي وبس يعني دي آراء".

عمر خورشيد يكشف رأيه في دخول مشاهير التيك توك مجال الفن

وكشف عمر خورشيد عن رأيه في مشاركة مشاهير التيك توك في الأعمال الفنية قائلًا: "عالم الفن من زمان كان بتخشوا بتاعت الذرة والرقاصة يعني أي حد كان بيخش عالم الفن وبياخد فرصته وحقه، والناس هي إللي بتحكم وشغله هو إللي بيحكم وشطارته وذكاءه هما إللي بيحكموا، إن مشاهير التيك توك يخشوا عالم الفن يآنسوا وينوروا ويمثلوا وياخدوا أدوار وأدوار بطولة كمان ويا هيثبتوا نفسهم يا هيفشلوا وسلام عليكم بس خلاص، الفن من أيام الأبيض وأسود وهو كده يعني عادي، الناس بتاخد فرصة ويا تنجح يا تفشل بس"

لا يفوتك

ملك زاهر: أهلي في ضهري دايما .. وشخصيتي في سيد الناس ملهاش أي علاقة بنوال| خاص

ملك زاهر تكشف أبرز الصعوبات التي واجهتها في ساعته وتاريخه وتعلن مفاجأة عن الدور الذي تتمنى تجسيده|خاص

عمر خورشيد: مجال الفن زي أي مجال فيه شلليه واجتهاد

وتابع عن وجود الشلليه في المجال الفني: "الوسط الفني يجماعة فيه كل حاجة زي أي مجال عمل زي مجال البنكينج، ما البنكينج في شلالية وفي اجتهاد وفي ناس كويسة وفي ناس وحشة وفي كل حاجة، يعني الوسط الفني لا يختلف عن أي وسط عملي في العالم كله، ممكن توصل وأنت صاحب مخرج أو منتج وممكن توصل علشان أنت فعلًا بتشتغل وكويس، يعني كل حاجة موجودة منحصرهوش في بوتقة واحدة لأن مش ده الصح".