ملك زاهر: أهلي في ضهري دايما .. وشخصيتي في سيد الناس ملهاش أي علاقة بنوال| خاص
تحتل ملك زاهر مواقع التواصل الاجتماعي بعد عرض حلقتها "لعبة الديب" من مسلسل ساعتها وتاريخه، حيث حازت الحلقة على إعجاب الجمهور، وحصلت على تفاعل كبير من الجمهور، الذين تفاعلوا مع شخصية "نوال"، واعتبروا أن ملك زاهر أدت الشخصية بنجاح.
وفي هذا الإطار كشفت الفنانة ملك زاهر لموقع الأيام المصرية ردود فعل والدها الفنان أحمد زاهر على شخصية "نوال"، ورأيها في توقيت عرض المسلسل وهل هذا سيخدم شخصيتها التي تقدمها في مسلسل سيد الناس.
ملك زاهر تكشف رد فعل والدها على شخصية "نوال"
وقالت الفنانة ملك زاهر عن رد فعل والدها وأصدقائها: "بابا وماما وصحابي مبسوطين، وبابا قعد يقولي هايلة، وفخور بيكي، وماما نفس الحكاية، فأنا واخده رد فعل من المقربين والجمهور حلو أوي وباسطني".
ملك زاهر شخصيتي في مسلسل سيد الناس مختلفة تمامًا عن نوال
وتابعت الفنانة ملك زاهر عن توقيت عرض المسلسل واختلاف شخصيتها عن شخصية نوال قائلة: "توقيت عرض لعبة الديب مميز جدًا لأن شخصيتي في سيد الناس ملهاش أي علاقة بنوال، فنحس أن فيه اختلاف رهيب، وده باسطني جدًا، عشان الناس تتفاجئ".
وأضافت: "يارب يجعل في وشي القبول وإن شاء الله ساعتها وتاريخه يعمل فيدباك حلو، وسيد الناس يكسر الدنيا بإذن الله".
ملك زاهر: عرض القضايا بينبه بيها
وأكدت ملك زاهر عن أن عرض القضايا ينبه بها، ويقلل من وجودها في المجتمع، ويوضح للجمهور كيفية التعامل معها، قائلة: "عرض القضية تبيه بيها، لأن لما بنعرض القضية في المجتمع لناس متعلمة وفاهمة، فأكيد الناس مش جاهلة أنها تروح تعمل زيها، لكن هي تنبيه خصوصًا إن آخر كل حلقة فيه موريل، بيبقى في العقوبة إللي حصل عليها المتهم".
وتابعت: "فعندك هنا مثلًا في المسلسل الديب ده أتحبس خمس سنين ومعتصم إللي هو خطيب نوال خد مؤبد عشان قتلها ما هو مش معنى إن أنت شايف أنها غلطت أو أن أنت بتدافع عن شرفك أن أنت تقتل البنت، ما هو دي حاجة مهمة كنت عايزة أوصلها أنه البنات ممكن تغلط على فكرة البنت ممكن يتضحك عليها وممكن تغلط وممكن كل حاجه، بس ده ميديش الحق لأي حد أنه يقتلها الحساب ده بتاع ربنا مش بتاع حد، الحقيقة أنا كنت مبسوط أن أحنا بنعرض قضيتين مهمين في الحلقة دي مش قضية واحدة".
ملك زاهر: لو أتعرضت لإبتزاز هروح لأهلي لأنهم في ضهري
وأكدت ملك زاهر أنها في حال تعرضها للإبتزاز ستلجأ لأهلها أول شئ لأنهم داعمين لها: "الحمدلله متعرضتش ولا حد من صحابي للإبتزاز بس طبعًا أنا أول حاجة هعملها إن أنا هروح لأهلي، وأقولهم يتصرفوا لأنه أنا أهلي الحمد لله يعني في ضهري، المشكلة إن الأهالي بتوع الناس دايمًا بيخوفوهم عشان كده بيحصل بقى المشاكل دي عشان كده يفضلوا يبتزوهم وممكن توصل بعد الشر للإنتحار فـ لا هروح طبعًا أقول وكده وأشوف أهلي هيتصرفوا إزاي لأنه الحاجات دي مفيهاش يعني هزار".
