حسن عيد: شخصية مطاوع في الحلانجي مختلفة ومحمد رجب بيخلق حالة من الحب في اللوكيشن|خاص
يعيش الفنان حسن عيد حالة من النشاط الفني، من خلال مشاركته في المارثون الرمضاني بشخصية مطاوع، في مسلسل الحلانجي بطولة الفنان محمد رجب، ومن المتوقع أن يقدم شخصية مختلفة تمامًا عن أعماله السابقة.
وكشف حسن عيد في تصريح خاص لموقع الأيام المصرية عن تفاصيل دوره في مسلسل الحلانجي، وكواليس مشاركته مع الفنان محمد رجب.
حسن عيد يكشف تفاصيل شخصيته في الحلانجي
تحدث الفنان حسن عيد عن مشاركته في مسلسل الحلانجي، قائلًا: "بقدم شخصية مطاوع، هو صاحب محل أجهزة كهربائية وبنت عمه سماح اللي بتقوم بدورها الفنانة أيتن عامر، وبعد ما عمه مات هي وأمها عايشين لوحدهم، وفي صراع ما بين مطاوع وبين طه إللي بيقوم بدوره محمد رجب، وهي بتحب محمد رجب ففي صراع كده بين الطرفين على الفوز بسماح".
وأضاف عن النجوم التي تجمعه مشاهد معهم، قائلًا: "بيجمعني مشاهد مع محمد رجب، نجم العمل، وآيتن عامر، ومحمد لطفي، وأحمد وفيق، وسامح الصريطي، وناس كثيرة جدًا".
حسن عيد: متحمس للعمل مع ميمي جمال
كما أعرب الفنان حسن عيد عن سعادته للمشاركة مع الفنانة ميمي جمال، قائلًا: "الفنانة ميمي جمال من أطيب الشخصيات إللي قابلتها، ربنا يديها الصحة وطولة العمر، سعيد جدًا بالمشاركة معاها، ومتحمس للمشاركة مع كل الشخصيات لأن الورق مكتوب حلو أوي من المؤلف محمود حمدان، كاتب لكل شخصية خط درامي، وراسمها صح، يعني ممكن تسمع الحوار بس تعرف أنهي شخصية إللي بتتكلم، فالحمد لله ربنا رزقنا بمؤلف كبير زي الأستاذ محمود حمدان".
حسن عيد: معتز حسام عمل نقلة في الدراما المصرية
وتابع: "واتشرفت جدًا بالعمل مع المخرج الكبير أوي إللي عمل نقلة في الدراما المصرية، هو شاطر أوي، ورزق لأي ممثل أنه يشتغل مع الأستاذ معتز حسام، دي تاني تجربة ليا معاه، أول مرة كان في مسلسل وجوة بطولة الفنانة حنان مطاوع، فأنا أتشرفت بالعمل معاه في المسلسلين".
وأضاف: "العملين مختلفين تمامًا، من الأعمال إللي نقول عليها بره الصندوق، صورة جديدة، وإخراج جديد، وهو من المخرجين اللي بيحبوا يجربوا الممثل في أكثر من شخصية، يعني ممكن يكون فيه ممثل معروف أنه بيعمل رومانسي على طول، لكن هو بيكون شايف الشخصية كويس أوي على المستوى الإنساني، فبيعرف يسكنها صح".
حسن عيد: شخصية مطاوع مختلفة تمامًا عن الأدوار اللي قدمتها قبل كده
وتابع الفنان حسن عيد عن شخصيته في مسلسل الحلانجي قائلًا: "الشخصية جديدة تمامًا عليا، فسعيد بالتجربة لأنه دور جديد وخط أنا ملعبتوش قبل كده، الشخصية فيها نقلتين، وفيها حاجات كتيرة جدًا ما بين الدراما وما بين الأكشن ويعني في تنوع، وهو ده إللي خلاني يعني أبقى محظوظ السنادي بشخصية مختلفة خالص أنا بلعبها".
وأضاف: "يعني ممكن أكتر أعمالي من بعد مثلًا ما أشتغلت آدم وجميلة، إني أقدم شخصيات غير سوية، لأن شخصيتي في آدم وجميلة كان شخص مش سوي برضو وهو بيحاول اغتصاب بنت عمه، وبيحاول يسرق الذهب من أمه وبيشرب مخدرات، وبيتجوز واحدة أكبر منه في السن، فكانت شخصية برضو غير سوية لكن مش شعبية قوي للدرجة إللي أنا بعملها في الحلانجي فالشخصية مختلفة خالص عني معملتهاش قبل كده".
وأستكمل حديثه: "شخصية مطاوع فيها مصطلحات وفيها شخصية وفيها ماشيه وفيها كلام وفيها تون صوت، في شخصية مبنية كويس جدًا من خلال الورق إللي مكتوب ومن خلال المخرج إللي ساعدني على ده ودخلني في المود وقعدنا نتكلم عن تاريخ الشخصية، هو مخرج فاهم إوي بيحضر كويس قوي الديكوباج، وبيبقى جاي مذاكر الشخصية ومذاكر المشهد إللي هيصوروا، وشركة الإنتاج mgr أستاذ ممدوح شاهين طبعًا من الشركات إللي مبخلتش على العمل خالص، ووفرت لكل الممثلين إللي هما عايزينه ووفرت للمخرج إللي هو عايزه فعشان كده بنشتغل وإحنا مبسوطين كلنا في طاقة إيجابية كده في اللوكيشن".
حسن عيد: محمد رجب بيخاف على شكل وأداء الممثلين اللي معاه
وكشف الفنان حسن عيد عن تفاصيل مشاركته مع الفنان محمد رجب قائلًا: "محمد رجب من النجوم القليلة جدًا إللي أنا أشتغلت معاهم في تفاصيل عملية كبيرة جدًا أنا بحبها طبعًا فيه، بعيدًا عن الجانب الإنساني ومساعدته لكل الممثلين في كل المشاهد، وفي ضهر أي واحد في اللوكيشن، لكن إللي حببني فيه أكتر إن هو بيخاف على شغله وشكله جدًا، وبيخاف على الممثلين إللي معاه وعلى شكلهم ادائهم، وبيخاف على العمل جدًا".
وتابع: "وحتة الخوف دي بتعمل حالة إيجابية جدًا بتؤدي في الآخر إلى نجاح العمل لإن بتحاول تثبت أحسن ما عندك وأحسن ما عند اللي قدامك اللي انت شغال معاه".
