ريهام الشنواني: هقدم أكثر من شخصية في مسلسل عقبال عندكوا مع إيمي سمير غانم | خاص

مسلسل عقبال عندكوا، هو أحد الأعمال المنتظرة في رمضان 2025، حيث تشارك فيه الفنانة ريهام الشنواني إلى جانب إيمي سمير غانم وحسن الرداد، وتدور أحداثه في إطار كوميدي، ويعد فرصة مميزة لريهام الشنواني لتقديم أدوار جديدة ومختلفة في عالم الكوميديا.

ريهام الشنواني تكشف عن تفاصيل شخصيتها في مسلسل عقبال عندكوا

وكشفت ريهام الشنواني عن تفاصيل شخصيتها وعن كواليس تعاونها مع إيمي سمير غانم في تصريح خاص لموقع "الأيام المصرية".

تحدثت ريهام عن دورها في المسلسل وقالت إنه سيكون تحديًا جديدًا لها، حيث ستؤدي عدة شخصيات، وهو شيء لم تجربه من قبل، مما يجعل الدور مميزًا بالنسبة لها، هذا التنوع في الشخصيات يُعتبر تحديًا يعكس رغبتها في تجديد أسلوبها الفني.

وتحدثت ريهام عن تفاصيل دورها، قائلة: " هتشوفوا حاجة جديدة جداً وأدوار أنا معملتهاش قبل كده فده بالنسبالي تحدي فأنا بردو بحب كل عمل أعمله يبقى فيه حاجة تحدي أنا معملتهاش قبل كده، وتفاصيل الدور إن أنا هعمل كذا كاركتر".

وتابعت: "والجديد إني هعمل كذا كاركتر أنا عمري في حياتي ماعملتها خالص فهو ده الجديد".

وأضافت: "مشاهدي معظمها مع إيمي وثروت وحسن دول أكتر ناس أنا اتجمعت بيهم في المسلسل".

ريهام الشنواني عن غيمي سميرغانم “عندها رحمة”

وعن تعاونها مع إيمي، أوضحت: "إيمي جميلة جداً وبتفهم كوميديا، ولما بتديني نصيحة أو بتقولي حاجة أنا بسمعها منها وبيبقى كلامها هي فعلاً الصح لأن هي عندها خبرة في الكوميدي أكتر مني فهي بتفهم ضحك وفعلاً أنا الكلام اللي هي بتقوله أنا بحطه في الاعتبار وبيبقى هي عندها حق".

واستكملت: "إن أشتغل مع إيمي أكيد بستفاد منها طبعاً وإن أنا بقدم كوميدي والدنيا مابينا كويسة جداً فالحمد لله يعني، وهي على المستوى الشخصي إنسانة جميلة وعندها رحمة وجميلة بجد ومبسوطة إني اشتغلت معاها أوي".

وعن رأيها في المسلسلات التي تتكون من ١٥ و ٣٠ حلقة، أشارت: "هو بيبقى حسب قصة المسلسل ايه لو القصة متنفعش غير في ٣٠ يبقى في ٣٠ لو كان ينفع يبقى ١٥ يبقى ١٥ هو  الموضوع هي القصة ايه، وفي حاجات ٣٠ بتبقى ممطوطة وفي حاجات ١٥ بتبقى لا محتاجة إني إنتي تزودي فيها".

تفاصيل شخصية ريهام الشنواني في مسلسل عقبال عندكوا

وعن الذي جذبها للدورها، أكدت ريهام: "اللي جذبني في الدور نفسه إن أنا شغالة مع محمد ثروت واشتغلنا مع بعض كذا حاجة وكيميتنا حلوة مع بعض لأن بحس إن هما عيلتي هو ومنى مراته بحس كده إننا تيم واحد عيلة كده وهما صحابي جداً برا الشغل، وإن اشتغل مع إيمي وعمري في حياتي ما اشتغلت معاها فالنسبالي دي حاجة واحدة من أهم نجمات الكوميديا إن أنا اشتغل معاها دي حاجة مهمة جداً في تاريخي، واللي جذبني للدور نفسه إني بعمل كذا كاركتر فده حاجة أي حد في العالم يبقى حابب يعملها بالذات لو بيعمل كوميدي بتعملي كذا كاركتر في لعب كتير فيه".

وأردفت: "أي مسلسل بيبقى في كوميدي أكيد هيبقى في تنقلات مفيش حد حياته بتبقى كوميدي بحت بس إن شاء الله هتشوفوا حاجة حلوة".

المنافسة في الموسم الرمضاني قوية

واختتمت: "والمنافسة الكوميدي السنادي قوية جداً دي حقيقة وأتمنى إن إحنا نبقى عاملين حاجة حلوة وحاجة كويسة وتعجب الناس والواحد تعب واجتهد ويارب نلاقي على قد التعب والمجهود ده والمنافسة عامة حلوة في إنها بتخليكي تطلعي أحسن ما عندك لأن إنتي حاسة إنك في منافسة وبتبقي عايزة تعملي أحسن ماعندك عشان تثبتي نفسك".