مسلسل قلع الحجر الجزء الثاني ..عمر رياض يكشف تفاصيل مشاركته في العمل| خاص

يستعد الفنان عمر رياض نجل الفنان محمد رياض للمشاركة في مسلسل قلع الحجر الجزء الثاني ، والذي من المقرر أن يتم عرضه في الموسم الرمضاني المقبل لعام ٢٠٢٥.

وكشف عمر في تصريح خاص لموقع "الأيام المصرية" عن تفاصيل أحداث الجزء الثاني من المسلسل.

عمر رياض عن المقارنة بين أجزاء العمل

وتحدث عن فكرة المقارنة بين أجزاء العمل، موضحًا: "والله فكرة إن أنت تتقارن بحاجة أصلًا هي حاجة صعبة عامةً يعني أنت بتتقارن بالجزء الأول فدي فكرة دايما بتبقى صعبة على أي جزء تاني وفي نماذج كتير جدا نجحت كجزء تاني وفي نماذج كتير جدا فشلت فأنت بتبقى عايز تبقى زي الناجحين دول وأكترفبيبقى عليك ضغوط كتير جدا".

عمر رياض: نجاح الجزء الأول حط علينا مسؤولية إن إحنا نعمل حاجة أحسن 

وتابع، "أصلًا فكرة إن أنت يعني تفوق النجاح بتاع الجزء الأول، وطبعا لو مكنش الجزء الأول ناجح مكناش عملنا جزء تاني أكيد، ولا كان في حد طلب إن إحنا نعمله ولكن الحمد لله النجاح الكبير ده يعني على قد ما هو حلو بس حط علينا مسؤولية إن إحنا نعمل حاجة أحسن بكتير".

وأضاف، "التحديات اللي قابلتني زيي زي أي حد من أفراد العمل، عايز أتفوق على الجزء الأول خاصةً الدور في الجزء ده أقوى كمان بالذات يعني".

عمر رياض عن ممارسته للهجة الصعيدية

كما تحدث عن ممارسته للهجة الصعيدية، قائلًا: "فكرة اللهجة مخوفتش منها لأن أنا ممثل ولازم أعمل أي دور ولازم أكون قد المسؤولية أنا مش داخل الموضوع لسه بجرب".

وأشار إلى "اللي بيخش حاجة لازم يكون محضر كويس وعارف بيعمل ايه والباقي طبعًا خلاص بتاع ربنا يعني لما الواحد بيجتهد وبيعمل اللي عليه خلاص بس لازم ما يكونش خايف ولازم يكون قد المسؤولية اللي هو اتحط فيها".

عمر رياض عن تحضيراته لـ مسلسل قلع الحجر الجزء الثاني

واستكمل، "والشغل على نفسك والدراسة بتفرق جدا يعني برضو شغلي في المسرح مع أستاذ خالد جلال أكيد دي فرقت معايا في تحضير أي دور عامة مش دور صعيدي بس وبصراحة برضو اللهجة بشكل عام ساعدني عليها كتير جدا المخرج الأستاذ حسني صالح وهو ليه لمعة خاصة في الاعمال الصعيدية لأن هو أهم مخرج عمل أعمال صعيدية في مصر وكمان المؤلف أحمد وفدي ساعدني كتير جدا على الحوار اللهجة كمان أكتر وأكتر يعني فكان في طريق لازم أعمله إن أنا أجتهد والناس كمان ربنا جعلهم أسباب إنهم يساعدوني في حاجة زي كده ولكن بشكل عام مينفعش أخاف أصلاً أخاف ليه".

عمر رياض عن أحداث مسلسل قلع الحجر الجزء الثاني

وكشف عمر عن تفاصيل أحداث الجزء الثاني، موضحًا "مقدرش أحرق الأحداث اللي حتى تخص الشخصية بس أقدر أقول إن الشخصية من الجزء الأول شخصية وصولية جدا وشخصية طماعة جدا وشريرة تجاه حتى أقرب الناس ليها فده بيتبروز أكتر وبيبان أكتر في الجزء ده".

وأكد "المسلسل بيقدم رسالة جديدة تماما عن الجزء الأول، الجزء الأول كان ليه رسالة معينة والجزء التاني رسالة مختلفة خالص وأحداث أسرع وأقوى بكتير جدا جدا، مضيفًا: "الشغل الصراحة في الجزء التاني يعني فعلًا وإحنا كلنا بنشتغل وإحنا بنقرأ كنا متحمسين لده أكتر من الجزء الأول بكتير كمان في إن شاء الله الجزء ده يبقى أحلى من الجزء الأول 200,000 مرة".

وأردف، "يعني فكرة إن هي مستوحاة من الواقع أو من الخيال دي مش بشوف إن هي بتفرق، هي كل الحكاية إن أنت ازاي تعمل مسلسل تخلي الناس تتابعه وتحبه وتتسلى وتعيشهم مع الحالة دي وتوصلهم الموضوع بواقعية ويكون حقيقي جدا ميبقاش في أي حاجه فيك ولا في أي حاجة مش واقعية الناس بتفهم جدا وجمهور واعي جدا فأنت لازم  تحققله ده حتى لو هتعمل حاجة خيال يعني".

وأشار إلى "إحنا طبعًا أحداثنا مستوحاة من حقائق ووقائع عاشها المؤلف أحمد وفدي اللي هو من الصعيد ف ده ساعدنا جدا إن احنا نعرف نقرب للناس جدا في النقطة دي".