مسلسل الف ليلة وليلة جودر 2 .. محمد التاجي يكشف تفاصيل دوره| خاص
مسلسل الف ليلة وليلة جودر 2 .. يشارك الفنان محمد التاجي في السباق الرمضاني 2025 بدوره في "مسلسل الف ليلة وليلة جودر 2"، وذلك بعد النجاح الساحق الذي حققه بعد عرضه في عام 2024 .
وكان لـ موقع الأيام المصرية حوار خاص مع الفنان محمد التاجي كشف من خلاله عن تفاصيل عديدة أهمها:
وبسؤاله: ماهي معاييرك في انتقاء أدوارك ؟
أجاب: "مفيش يعني في مسلسل كنت أتمنى إن أنا معملوش كنت فاكر أن هو هيبقى شيء أنا للأسف مش فاكر اسمه، كنا أنا وتوفيق عبد الحميد وكانت الله يرحمها دلال عبد العزيز ويمكن ده آخر عمل قدمه توفيق عبد الحميد ده كان قبل بتاع سنة 2011 دي على طول كنا في 2010 كده يعني في الحدود دي فده كان عمل للأسف كتابةً مكانش اللي إحنا كنا متصورين إنه هيطلع بالشكل ده".
وبسؤاله: ماهو الدور الذي تتمنى أن تجسده ولم يحالفك الحظ؟
أوضح، "الدور اللي نفسي أعمله ولسه معملتوش للأسف بيتعمل اليومين دول وبعد ما كنا متفقين إن إحنا هنعمله كمسلسل اللي هو فيلم "شباب امرأة".
وتابع، "وكنت أنا اتكلمت مع شركة الإنتاج وكانوا متفقين إن إحنا هنعمل العمل وكنا مستنيين بس يعني الموسم كان المفروض هيتقدم لو ربنا ادانا العمر في موسم 2026 ففوجئت إن بيتعمل السنة دي بـ غادة عبد الرازق وأنا طبعا كان نفسي أعمل شخصية "حسبو" اللي عملها جدي الله يرحمه الحاج عبد الوارث عسر فكنت مستني إن أنا أعمله".
وأردف، "للأسف غادة السنة دي بتقدمها ربنا معاهم إن شاء الله وينجح المسلسل لكن أنا زعلت على الدور ده قوي لأن ده كان من أمنياتي من زمن كبير جدا إن أنا أعمل الشخصية دي".
وبسؤاله: مَن مِن الممثلين الشباب الذين تعاونت معهم أحببت التعاون معهم وممكن تشاركهم أعمال أخرى؟
أوضح، "معنديش مانع إن كل أعمالي تكون معاهم دي تبقى دويتوهات بقى، لا يعني اللي أنا بحبهم في التعامل طارق لطفي من الشخصيات الجميلة أنا سعدت إن أنا يعني اشتغلت معاه كذا حاجة".
وتابع، "عندك أحمد السعدني، ياسر جلال، رامز أخوه لأن ياسر ورامز دول ولادي لأن أبوهم جلال توفيق الله يرحمه كان صديقي ويمكن من أول الأعمال وهما طلبة في المعهد عملنا عمل مع بعض فأتمنى إن أنا أتعامل معاهم".
وأضاف، "يعني أنا ياسر عملت معاه بعد كده المسلسل "جودر" وعملت معاه ضيف شرف في مسلسل كان قريب يعني من سنتين ثلاثة هو كان مسلسل مسمع يعني كان برضو من المسلسلات اللي عجبت الجمهور أوي، واللي الناس اتخدت لما لاقيتني طالع معاه عملت معاه مشهد كان أو مشهدين في المسلسل اللي هو فيه الوزير المرتشي اللي كان بيعمل غسيل أموال في البنوك فبرضه سعدت بالعمل معاه".
وأردف، "فأنا بحب ياسر جدا وبحب رامز طبعا مع إن متعاملناش غير في المسلسل القديم وهم طلبة بس دول بعتبرهم ولادي".
وتابع: "عندك اللي نفسي اتعامل معاه فعلًا وهو كان في يوم من الأيام قالي أنا نفسي نشتغل مع بعض حتى قولتله روح قول لأبوك يشغلنا في عمل من إخراجه اللي هو كريم عبد العزيز أو كريم محمد عبد العزيز، وأحب اتعامل مع كريم محمود عبد العزيز كمان لأن أنا بحس أنه امتداد لمحمود الله يرحمه وأبقى سعيد وأنا بشتغل معاه لأننا اتعاملنا طبعا في جبل الحلال".
وأضاف، "وفي مسلسل تاني كان اسمه "ابن حلال" باين أو كده كان بتاع محمد رمضان اللي هما قالوا إن هو قصة بنت المطربة دي اسمها ايه بتلخبط دايما بين الاسمين، ففي ناس كتير أحب أتعامل معهم".
وأوضح، "وفي ناس من الممثلين الصف الثاني أنا أبقى سعيد وأنا بتعامل معاهم زي محمود حافظ، خالد كمال، ناس حبايبي كتير يعني دول ممثلين تقال أوي بقى يعني تحس إنك بتشتغل مع ممثل من الجيل القديم اللي مترسأ أوي".
وبسؤاله: هل بتحضر لأعمال أخرى في رمضان أو خارج رمضان ؟
واختتم، "لا أنا السنة دي مليش أعمال غير جودر والهوجة اللي حصلت على نون النسوة دي وأنا معرفش إذا كان ده حقيقي ولا لا، غير كده لا مفيش أعمال جديدة إن شاء الله ربنا يرزق زي ما بيقولوا بأعمال حلوة إن إحنا نرجع بها للناس ونبقى عند ثقتهم ونبقى عند حسن ظنهم وكل عام وأنتم بخير ورمضان كريم عليكم جميعاً يا رب".
