مسلسل العتاولة الجزء الثاني ..محمد التاجي يكشف سر عدم مشاركته| خاص
ينتظر الملايين من محبي الأعمال الدرامية عرض مسلسل العتاولة الجزء الثاني، وذلك بعد النجاح الساحق الذي حققه في الموسم الأول، والذي من المقرر عرضه ضمن مسلسلات السباق الرمضاني 2025.
وكان لـ موقع الأيام المصرية حوار خاص مع الفنان محمد التاجي كشف من خلاله عن سبب تغيبه عن المشاركة في مسلسل العتاولة الجزء الثاني:
وبسؤاله: ماهو سبب تغيبك عن مسلسل العتاولة الجزء الثاني ؟
أجاب قائلًا: "مسلسل العتاولة الجزء الثاني كان عليه لغط كتير قوي وكان كل الصحفيين بيكلموني هتعمل إيه في الجزء الثاني مضيت ولا لسه قولتلهم يا أخوانا محدش كلمني ومحدش مضى معايا ومحدش قالي حاجة عن المسلسل".
وتابع، "وقعدت حوالي شهرين أو ثلاثة الصحفيين كلهم بيكلموني كل يوم وأنا لا أعلم شيء عن المسلسل لحد ما كلمني في يوم الأستاذ علي حسن المشرف العام على الإنتاج في الشركة وبعتلي العشر حلقات الأوائل وقالي أنا مش عارف أكلمك أقولك إيه لأن مفيهمش غير مشهدين في العشر حلقات قولتله لا يعني إذا كان موضوع المشهدين ف ألغوا المشهدين".
وأضاف، "وأنا طبعًا مش هعمل حاجة زي كده يعني أنا بعد ما كنت من أسباب نجاح المسلسل زي باسم سمرة وزي طارق لطفي وزي أحمد السقا وزي مي كساب وزي زينة كل دول كانوا من أسباب نجاح المسلسل وأنا كنت معاهم من ضمن أسباب نجاح المسلسل".
وأردف، "فأما تيجي تقولي يعني هيبقى من 10 حلقات الأوائل ليك مشهدين فيبقى الموضوع إحنا بنهزر فقولتله لا حضرتك شيل المشهدين وألغوا الشخصية خالص أو شوفوا ممثل غيري يعمل الدور لكن أنت ما دام بادئ من 10 حلقات الأوائل بتعمل كدا يبقى أنا لا مش هعمل العمل ده وأنا معرفش هما حذفوا الشخصية من المسلسل أو جابوا ممثل ثاني يعمل الشخصية الله أعلم معرفش عنهم حاجة خالص".
وبسؤاله : ماهو ردك على الانتقادات التي وجهت لك بسبب مشاهدك مع هدى الأتربي ؟
أجاب، "والله يعني الانتقادات اللي اتوجهتلي مع هدى الأتربي ده يعني أنا اعتبرت إن هو برضو شيء من المديح إن الشخصية وصلت للناس هي طبعا معمولة في إطار كوميدي وكده".
وتابع، "لكن برضو إن هي مش من الشخصيات اللي ممكن يعني تبقى أنت بتقدمها عشان الناس تاخدك نموذج سليم ليهم لا هو ده نموذج خاطئ من الأول إن راجل كبير في السن راجل عجوز يجري وراء بنت من دور ولاده لا نموذج مش سليم بالإضافة إن هي بنت صاحبه أو جاره وكمان انتيمو وحاجات كده ده لدرجة إن لما بنته عرفت إنها رايحة تقابله بوظتله كل هدومه ووديتها تتغسل فطلع استلف من جاره هدوم اللي هو رايح يقابل بيها بنته".
وأوضح، "يعني الشخصية مش قويمة ومش مستقيمة لكن النقد لما يبقى في حدود إن أنت متفهم الشخصية اللي اتقدمتلك وإنت بتنقدها".
وأضاف، "إحنا نرفض طبعا الشخصية دي حاجة وفي النقد إن أنت بتشتمني أو بتتطاول عليا أو بتسبني بأهلي ده يبقى شيء تاني لكن مثلًا محمود المليجي الله يرحمه كان بيقدم الشر وكان الناس بتكره الشر لكن مشتمش محمود المليجي بأبوه وأمه فده اللي كان النقطة الغريبة والتطاول اللي بقى زيادة عن اللزوم عند الناس أو يعني الله أعلم بقى أو دي ناس غاوية أو دي لجان زي ما بيقولوا انهم بيبقوا مستنيين حاجه زي كده عشان يقعدوا يشتموا في الفن والفنانين دي حاجه تانية بقى أنا معرفش عنها حاجة".
