الفنان تامر فرج عن منشور «أبيع نفسي»: كنت بهرج.. والسؤال لغير الله مذلة (خاص)
قال الفنان تامر فرج إن المنشور الذي شاركه على مواقع التواصل حول طلبه المشاركة في عمل فني، من باب المزاح، وليس من باب الجدية، موضحا أنه لا يحتاج لمثل هذه الطريقة كي يجد عملا فنيا.
أضاف في تصريحات خاصة لموقع الأيام المصرية، أنه لا يحتاج لمثل هذه الطريقة للبحث عن عمل، وأن أعماله تتحدث عنه، ونشر التدوينة كان من باب المزاح، ليس إلا.
قائلا: أبدا، لأنى لا أستجدى أو أطلب العمل من أحد بدليل أننى لم أشير(منشن) لأى شخص أو جهة، فالسؤال لغير الله مذلة وأنا لا أطلب إلا منه، فهو من يحدد الأرزاق".
وتابع: أما البوست فهو للسخرية والهزار مع متابعينى، فأنا فى الأصل كاتب ساخر".
رأي تامر فرج في تسويق الفنان لنفسه
كشف الفنان تامر فرج في تصريحاته الخاصة لموقع الأيام المصرية، أنه ليس لديه أي مانع في أن يسوق الفنان لنفسه، ويطلب أن يشارك في أعمال فنية مع المنتجين، ولكنه لا يفضل ذلك على المستوى الشخصي.
قائلا: والله الفكرة نفسها مقدرش ألوم حد عليها لو عملها، لأن مش عيب إن الواحد يطلب شغل طالما غير الموهوب بيحتل مكانه، لكن أنا شخصيا بحب إن شغلى هو اللى يتكلم عنى لكن للأسف مش هو ده اللى بيمشى دلوقتى".
تامر فرج: المهم الفنان يطلع تريند علشان يشتغل حتى لو هيطلع بفضيحة
رأي وقد أكون مخطئ، كل واحد وله شغله، أنا راجل بمثل وبكتب يعني سيناريست، أنا دوري إني أمثل كويس وأكتب كويس، ولكن المنتج أو المخرج شغلتهم إن هما يدورا على الشخص المناسب لأداء هذه الشخصية، أو يدوروا على الشخص اللي ورقه كويس، ويجيبوا ورقه وينفذوه، لكن دي مش شغلة الممثل ولا السيناريست إن هو يسوق لنفسه، وطبعا ده مش غلط، لكن الرأي الشخصي المفروض إن شغلي هو اللي يتكلم عني".
وتابع: لكن حضرتك كمنتج أو مخرج، المفروض حضرتك بقى عايز تعمل عمل كويس، انت بتدور، كان فيه ناس بتنزل المسارح بتاع الأقاليم علشان يجيبوا ناس كويسة، ولكن مش ده اللي بيحصل دلوقتي، فيه فرق بين الصح والمطلوب".
واضاف: الصح هو إننا ننزل ندور، لكن المطلوب إن انت على طول تبقى تريند، وإن انت تبقى على طول متشاف وعلى طول متواجد، ولو حتى بحاجة وحشة، وده الخطأ إن المهم تجيب تريند سواء بطريقة حلوة أو وحشة، أو أجيبه بفضيحة، أو كلام وحش عليا، مش مهم المهم إني أفضل تريند ومتشاف، وهي قدرات أنا كشخص مقدرش أفضل طول الوقت بتكلم عن نفسي، وأفضل ظاهر وأحضر حفلات هنا وحفلات لده وده".
استطرد: أنا المفروض كمخرج أو منتج إني بيبقى عندي دور كويس المفروض أدور على مين الفنان اللي يليق على الدور، لكن المعادلة دلوقتي مغلوطة، دلوقتي احنا بنشوف مين التريند، مين اللي الناس بتتكلم عنه، مين اللي الناس عايزاها، ونقدمه مرة واتنين وتلاتة".