تامر أمين: أنا أحسن إعلامي في مصر ومؤهلاتي تخليني أقول كده
علق الإعلامي تامر أمين، على تصريحات رئيس نادي الزمالك حسين لبيب، بأن نادي الزمالك هو أكبر قلعة رياضية في مصر.
وقال تامر أمين، خلال حديثه ببرنامج "آخر النهار"، المذاع على قناة النهار: "هو مين أكبر قلعة رياضية في مصر، تفتكروا مين؟ كل واحد هيرد عليا وفقا لانتماءه الكروي، ولذلك دي خناقة بدون لازمة".
وأضاف: "أنا متضايقتش لما حسين لبيب قال إن الزمالك من وجهة نظره أكبر قلعة رياضية في مصر هو حر، لو نادي المحلة قال نفس التصريح مكنش حد أتكلم ولا اعترض".
وتابع: "لو الإسماعيلي قال إحنا مدرسة الكرة أو نادي إنبي قال نفس الكلام، مكنش حد هيتكلم، طالما اللي بقولوا في نفسي ليس فيه إهانة لأحد يبقى أنا حر وبراحتي".
وأكمل: "بره الملعب كل واحد يعمل اللي هو عاوزه، الأهلي لما قال إنه فوق الجميع، محدش اتكلم، طالما لم تتجاوز في حق الآخرين يبقى اعمل زي ما أنت عاوز".
تامر أمين: كل واحد حر يعمل اللي عاوزه طالما لم يضر
وواصل: "أنا بقولكم أنا أحسن إعلامي في مصر وأنا حر وشايف نفسي كدا، ممكن حد يقولي أنت أسوأ إعلامي، براحته، أنا شايف نفسي أحسن واحد، ومؤهلاتي تخليني أقول كده، ولذلك خلونا نتخانق على الحاجات اللي بجد، ونتنافس عليها، لكن تمجيد وتعظيم النفس، كل واحد حر، أنت حر ما لم تضر".
