ياسمين عز للفتيات: سيبي الفرعون ينام وبلاش المكالمة اللي أطول من نهر النيل
وجهت الإعلامية ياسمين عز، مجموعة من النصائح للفتيات، بشأن التعامل مع خطيبها، قائلة: "لما يقولك عاوز أنام سيبيه ينام".
وقالت ياسمين عز، خلال حديثها ببرنامج "كلام الناس"، المذاع على قناة إم بي سي مصر: "وانتي بتتكلمي مع خطيبك أو حبيبك بالليل، المكالمة اللي أطول من نهر النيل، ويقولك اقفلي عايز أنام دلوقتي يبقى سيبيه ينام، متقوليش هو أنت هتنام وتسيبني، هو أنتي تايهة؟ ولا في الصحراء الغربية".
وأضافت ياسمين عز: "أنتي قاعدة على سرير بيتكم وبتاكلي إندومي، ومفيش حاجة اسمها لا خليك معايا شوية، عايز ينام سيبيه ينام، بلاش تقوليله أنت كنت مع صحابك وسيبيه يرتاح الغليان الشقيان".
وتابعت: "قمة الرعب بالنسبة للراجل، أنه يفتكر أنها نامت ويبعتلها يقولها صاحية، فجأة يلاقي الرسالة القاتلة أيوه صاحية، هنا يلاقي شرايينه بتتسد، والأوعية الدموية بتتقفل عنده".
ياسمين عز: سيبي الراجل ينام ويرتاح عشان عنده شغل الصبح
وأكملت: "مش لازم نعرف سر حب الرجالة للنوم وقدرتهم على النوم بارتياح، فسيبيه ينام عنده شغل الصبح، الشغل هيجيبلك بيه الشبكة وفي الآخر تعمليله الرز المعجن".
