بسنت صيام تكشف أسرارًا عن حياة سعاد حسني المهنية : مقدرش أعمل السيرة الذاتية لها | خاص

كشفت الفنانة الشابة بسنت صيام، عبر حسابها الشخصي بموقع تبادل الصور والفيديوهات إنستجرام، عن قيامها بأداء عمرة لـ سندريلا الشاشة العربية الراحلة سعاد حسني، حيث وعدت وعدًا بأن تؤدي عمرةً لـ سعاد حسني عند أول عمرة يكتب الله لها.

وتواصل موقع الأيام المصرية مع الفنانة بسنت صيام، والتي كشفت عن كواليس تأديتها العمرة للفنانة الراحلة سعاد حسني، قائلة:

بسنت صيام : عملت عمرة للسندريلا وحققت ونفذت وعدي

فعن سر تأديتها العمرة لـ سعاد حسني تحديدًا ولماذا لم تؤديها لغيرها من نجمات زمن الفن الجميل، أوضحت بسنت صيام: "أنا متعلقة بيهم كلهم، بس هي تعلقي بيها بشكل شخصي، يعني غير إن هما كلهم فنانات جمال أنا بحبها من وأنا صغيرة لحد دلوقتي حب استثنائي كأنها بني آدمة أنا أعرفها".

وأضافت: "يعني أنا ماقدرش أختار مين ممثلة هعملها العمرة، هي دي حاجة من زمان، أنا بعملها حاجات كتير، بس كنت قايلة إني لما هعمل عمرة هعملها إن شاء الله".

بسنت صيام تكشف عن أقرب أفلام سعاد حسني لها

وحول أكثر الأفلام التي تحبها لـ سعاد حسني، قالت بسنت صيام: "ماقدرش أقولك كتير كلهم، بس أنا بحب أوي بئر الحرمان، غروب وشروق، بحب القاهرة 30، دول الأفلام المفضلة، زوزو بحبه لأني بحسه قريب منها من روحها، بس كله ماقدرش أقولك حاجة معينة، مافيش حاجة أعتقد مابحبهاش، بس ممكن دول يكونوا أقرب أفلام ليا".

وفيما يتعلق بأن أفلام سعاد حسني المفضلة لديها هي أفلام تراجيدية وإذا كان ذلك يعني أنها تفضل الأفلام التراجيدية أكثر من الكوميدية، أوضحت بسنت صيام: "يمكن مش عارفة، ماركزتش في إن هما أفلام تراجيدي ولا لأ، بس مش عارفة ممكن أكون بحب الأفلام التراجيدي أكتر".

بسنت صيام تكشف عن أسرار في حياة السندريلا المهنية

وبشأن أكثر ما يميز سعاد حسني من وجهة نظرها، قالت بسنت صيام: "أكتر حاجة بتميزها بالنسبة لي من مذاكرتي ليها إنها ماكنتش بتستسهل، هي كانت جميلة ونجمة وكل حاجة، ومع ذلك كانت بتروح تعمل أدوار لو بصيت عليها هي صعبة جدًا ومركبة جدًا".

وأشارت: "فيه أدوار كتيرة كانت بتتنازل عن جمالها، هي جميلة كده لوحدها مش عايزة تبقى جميلة أو عايزة تبقى فيديت، وبحس إنها لحد آخر أفلامها كانت بتذاكر للأفلام، موصلتش لحتة معينة وقالت خلاص".

وأضافت: "ده بالنسبالي اللي بيميزها وبرضو أنا ماعاشرتهاش، أنا دي من قراءتي للحاجات اللي عنها، ناس كانت بتتكلم عنها مثلًا، قابلت حد قابلها في الحقيقة، أو من طريقة فرجتي للأفلام، يعني كل الحاجات دي أنا ماعاشرتهاش ده تصوري الشخصي".

بسنت صيام : مقدرش أعمل السيرة الذاتية لـ سعاد حسني

وبشأن إمكانية تقديم السيرة الذاتية لـ سعاد حسني في عمل، قالت بسنت صيام: "ماقدرش"، وعما إذا كان السبب في ذلك قلقها من المقارنة بينها وبين سعاد حسني، أوضحت: "ماحسبتهاش كده بس هي حاجة نفسيًا ماقدرش أعملها".

ولفتت: "يعني حتى عند أستاذ خالد جلال كنا بنعمل عرض التخرج اسمه سينما مصر، كنا المفروض نختار مشاهد من أفلام السينما المصرية القديمة كلها ونعملها، أنا مافكرتش أعمل ولا مشهد لـ سعاد حسني".

وتابعت: "لأني لو في إيدي أعيد أعمالها، علشان أنا بحب الأعمال دي، أعيدها، لكن إني أروحلها هي أنا ماحبش، فيه حاجات في حياتها كتير أوي ماقدرش أتعمق أكتر من كده بسبب حبي ليها، ماقدرش أروح أذكرها أكتر وأجسد معاناتها أكتر، لأن حياتها ماكنتش سهلة، أحس إني نفسيًا ماقدرش أعمل كده".

وحول المقارنة بينها وبين سعاد حسني من حيث الشكل وعدم وجود تشابه بينهما، قالت بسنت صيام: "طبعًا أنا مش شبهها، بس أنا أصلًا مش دي الفكرة اللي فكرت فيها، لأن في السيرة الذاتية أنا بحس إنك تقرب من روح الشخص، وإنك تقرب من روح الشخص دي بتبقى من إنك تعرف تروحله أد إيه، فحتى في الأفلام العالمية بتلاقي إن الاعتماد مش على الشبه".

وأكملت: "ومش بفكر في الناس هتقارن تقول إيه، لأن أي حد هيتقارن بـ سعاد حسني هيتظلم، أي حد بيتقارن بأي حد زمان، أي حد بيتقارن بسيرة ذاتية لحد من الزمن ده كده كده هيتظلم، لو أنت بتتكلم على رأي الناس يعني، فدي حاجة كده كده هتتقال فمابشغلش نفسي بيها، بس دي حاجة ماقدرش أعملها في كل الأحوال".

وبخصوص إمكانية تقديمها للسيرة الذاتية لإحدى نجمات زمن الفن الجميل بخلاف سعاد حسني، أوضحت بسنت صيام: "آه آه، ماعنديش مشكلة في السيرة الذاتية، أنا مشكلتي بس في سعاد حسني إنك بتروح جوه شخصية أوي أصلًا في العادي يعني، بتلاقي فيها صعوبة وأنت جواها علشان تخرج منها، فتخيل لما تكون الشخصية قريبة مني".

وواصلت: "أنت بتتكلم في فترة تحضير كبيرة، عمل عن سيرة حياة حد، سواء مسلسل أو فيلم، ده فترة تحضير كبيرة وفترة تصوير كبيرة، فأنا ماقدرش أدخل جوه روحها الفترة دي كلها وأعتقد مش هعرف أخرج تاني".

أما عنها إذا كانت قلقةً من أن تتوحد مع شخصية الفنانة الراحلة سعاد حسني في حال تقديمها في عمل فني، علقت بسنت صيام: "لأ مش للدرجة دي، بس قصدي أنت فيه وقت بتعرف إزاي تخرج وتعرف تعمل كده، بس قصدي تأثيرها النفسي عليا هيبقى مش كويس، وفي نفس الوقت هي بالفعل اتعملت، فمافيش وجهة نظر إن حد يعملها تاني، ماعتقدش إن ليها لازمة".

بسنت صيام : بشغل نفسي بمشاهدي.. وظروف العرض متخصنيش

ونفت بسنت صيام عدم مشاركتها في رمضانين متتاليين موضحةً: "لأ مش حقيقي، هو رمضان اللي فات كنت بعمل مسلسل رحيل مع ياسمين صبري، في رمضان كان بيتعرض في أبو ظبي ولسه معروض دلوقتي في on".

وتحدثت عن ظروف عرض المسلسل قائلةً: "ظروف العرض دي حاجة ماتخصنيش، يعني أنا وانا بمضي المسلسل أنا عارفة إنه 15 آه، بس ماعرفش هيتعرض على قناة إيه، هما قرروا يبيعوه حصري، يبيعوه بعد كده عرض تاني لـ on".

واستكملت: "يعني فيه حاجات ماتخصنيش ومابشغلش دماغي بيها، لأنها لو حاجة حلوة فهي حلوة للكل، لو وحشة دي حاجة تخص الإنتاج وبطل العمل، بشغل نفسي بدوري بس لكن إنه بقى اتعرض فين ماتعرضش فين، دي حاجة مش بتاعتي".

وأوضحت أن كل تركيزها يكون منصبًا على دورها قائلةً: "أنا أركز إن المسلسل كله إن الورق اللي قرأته يكون كويس وإن دوري أطلعه بشكل كويس، غير كده هتاخد من تركيزي في حاجات مش بتاعتي".

لا يفوتك

نجوم الفن يشيدون بدور الشركة المتحدة بعد دعمها لـ أحمد عزمي

بسنت صيام تحكي تفاصيل مشروعها المسرحي

وعن مشروعها المسرحي مع الفنانة يسرا والفنانة عبير صبري، قالت بسنت صيام: "كانت ساعتها أستاذة يسرا إحنا عملنا بروفات وكده، وكان ساعتها كان وقت الكورونا كانت هي تعبت، فهي المسرحية وقفت".

وأتمت الفنانة بسنت صيام موضحة إذا ما كان المشروع مازال قائمًا أم لا، حيث قالت: "لأ، مش قائم خلاص، لأن أعتقد أن موسم الرياض بيبقى كل سنة تعاقداته المسرحية بتختلف، فالمسرحية دي كانت من اتنين موسم رياض فاتوا".