أحمد غزي: كنت بعيط مع كل كلمة قريتها ومثلتها في مسلسل قهوة المحطة لأنها جزء مني| فيديو

أحمد غزي قهوة المحطة، تألق الفنان الشاب أحمد غزي في موسم درام رمضان 2025، بأداء دور مؤمن الصاوي الشاب الصعيدي الذي يسافر إلى المدينة القاهرة بحثًا عن حلمه في الالتحاق بصفوف الفنانين في القاهرة، وذلك من خلال المشاركة في مسلسل قهوة المحطة، الذي شارك في موسم دراما رمضان 2025، ضمن فئة المسلسلات القصيرة 15 حلقة.

ومن خلال استضافته في برنامج معكم منى الشاذلي، مع الإعلامية منى الشاذلي كشف أحمد غزي، عن تشابه شخصيته الحقيقية ورحلته في لندن للبحث عن فرصة فنية، وفي نفس الوقت ملتزمًا بدراسته، وذلك ما جعله يتشابه مع مؤمن الصاوي الذي سافر للمدينة القاهرة للبحث عن فرصة لتحقيق حلمه.

أحمد غزي: عيشت رحلة مؤمن الصاوي في لندن للبحث عن الفن

كشف أحمد غزي، عن رحلته في السفر من مدينة بإنجلترا إلى لندن العاصمة، للالتحاق بصفوف الفنانين، وللبحث عن فرصة في مجال الفن، قائلًا: "المدينة اللي كنت عايش فيها في لندن مكنتش العاصمة، كان بيني وبين لندن ساعتين ونص، وعلشان أدرس تمثيل كنت بنزل لندن يومين في الأسبوع أدور على الأستوديوهات علشان أدرس تمثيل، وكانت نفس فكرة المدينة اللي فيها ناس كتير ومنافسة عالية أوي، وكنت الغريب وسطهم، أنا المصري الوحيد وهما كلهم إنجليز، فكان بالنسبالهم في سؤال وهو  أنت ليه جاي تحقق حلمك عندنا، ووقتها كان لازم أعمل كده لأن لو مكنش أتعمل وقتها، واستنيت لما أرجع مصر كنت هبقى ضيعت وقت كبير معملتش فيه حاجة، بس قدرت أوفق بين محاولة دراسة التمثيل ودراستي".
 

أحمد غزي : أول دور مثلته في لندن كنت من المجاميع وكنت مبسوط

وتحدث أحمد غزي عن أول كاست تمثيل اتقبل فيه أثناء تواجده في لندن، قائلًا: "أول كاست قدمته فيه في لندن، كلموني بعدها بـ 4 أيام قالولي أحنا عايزينك معانا في دور في مسلسل هيتذاع نتفليكس، لما روحت هناك، وقفوني مع مجاميع ووسط الناس، فضلت 4 أيام بروح وماليش دور أنا مجرد واحد من المجاميع بس، وبالرغم من كده التجربة دي فادتني وكنت مبسوط ومكنتش محبط خالص".

 وأضاف: "وكنت دايما بقول لنفسي يمكن الفرصة متأخرة عشان أنا مش جاهز، ولما بذلت مجهود وبدأت الفرص الصغيرة تجيلي وتكبر واحدة واحدة".

أحمد غزي : وأنا بقرأ قوة المحطة كنت ببكي

وأشار أحمد غزي إلى تأثره بورق وقصة قهوة المحطة، قائلًا: "كان في حاجة من جوايا بتتحرك بشكل غير عادي، وكل حلقة كنت بقراها كنت بعيط من إحساسي بالكلام المكتوب في ورق مسلسل قهوة المحطة، لأنه خرج مؤمن الصاوي اللي جوايا". 

واختتم أحمد غزي، مقدما الشكر لملقن اللهجة الصعيدية في مسلسل قهوة المحطة، وعن حبه لأهل الصعيد قائلًا:" وحابه أشكر أستاذ عبد النبي الهواري لأنه كان في ضهري وواقف معايا وكان بيجيلي في أي وقت، ومكنش في صعب في تعلم اللهجة غير الروح بتاعة اللهجة، لأني بحب أهل الصعيد جدا لأنهم ناس طيبين جدا، وكانت روح الشب الصعيدي أهم حاجو بالنسبالي".