سامح حسين قطايف رمضان : لو أتكلمنا عربي كلامنا هيكون أشيك (فيديو)
سامح حسين قطايف رمضان .. تحدث الفنان سامح حسين خلال الحلقة 24 من برنامج قطايف، الذي يعرض على قناته الرسمية على يوتيوب، خلال شهر رمضان المبارك، عن أهمية اللغة العربية، وأبدى استنكاره من الحديث باللغة الإنجليزية وتجاهل لغتنا الأم.
سامح حسين: ممكن نعمل إنترفيو في شركة أمريكية باللغة العربية
قال الفنان سامح حسين: بقابل ناس علاقتهم باللغة العربية بقت عاملة زي علاقة واحد بيستعر من أبوه وبيفتخر في جاره مع أنه لو ركز هيعرف إن أبوه ده أجدع وأجمل وأعظم من جاره ألف مرة، أنا مش عايزك تحب العربي بالعافية أنا عايزك تعرف قيمته وأنت هتحبه وهتحترمه لوحدك.
وتابع سامح حسين قائلًا: أنا مش فاهم ليه بقينا عايشين في زمن إللي مبيعرفش يتكلم إنجليزي فيه على أعلى مستوى، يتعاملوا معاه أنه دون المستوى مع إن إللي دون المستوى بجد أنك متكونش عارف لغتك الأم لغة بلدك ودينك، ليه محتاج أحشر بين كل سطر عربي بقوله خمس ست كلمات إنجليزي، عشان متصنفش يعني في وسط الناس إللي بتكلم معاهم إني جاهل، إيه الفايدة إني أدخل شركة مصرية إدارتها مصرية وموظفيها مصريين وعملائها مصريين والباركية إللي بمشي عليه في الأرضية مصري، والشاي الكشري إللي في البوفية مصري ويعملوا معايا الإنترفيو بالإنجليزي، الحركة دي مجنناني قوي والله، هل ده ممكن يحصل في أي بلد في العالم هل ممكن موظف أمريكي مثلًا يعمل إنترفيو في شركة أمريكية بالعربي ويقولوله شايف نفسك فين كمان خمس سنين.
سامح حسين: الكلمات في اللغة العربية أكثر حميمية ودفئًا
واستأنف حسين حديثه حول معاني الكلمات في اللغة العربية: يا سيدي أتعلم إنجليزي وأتعلم أي لغة هتفيدك في شغلك ده حلو قوي ومطلوب وضروري، لكن مفيش داعي في عيد ميلادي تقول لي happy birthday to you أنت أصلا مش جايب هدية تسمحلك بكده، وبعدين أنت عندك جملة حلوة قوي وحميمية ودافية اسمها كل عام وأنت طيب، بتتمنالي فيها أكون على حال طيب كل عام وطول العام مش زي الثانيه ابقى سعيد يوم عيد ميلادي بس، مفيش داعي تبارك لي على حاجه فتقولي congratulations أنا مش عارف أقولها، قول لي مبروك يا سيدي كلمة حلوة على اسم خالك، مبروك دي أعمق وأحلى بكثير قوي معناها أنك بتطلب من ربنا سبحانه وتعالى يباركلي في النعمة إللي عندي ويحافظ لي عليها مش دي أظرف وأجمل.
وأضاف حسين: ليه تكلم واحد مصري بلغة ثانية غير لغته الأم، أنت عمرك شوفت واحد إنجليزي بيقول نهارنا أبيض بالصلاة على النبي، أنا فاهم إن ده جزء من عقده الخواجه أحنا للأسف حاسين من جوانا إن الناس دي أحسن مننا فبنقلدهم بس هم في الحقيقه لا أحسن مننا ولا لغتهم أحسن من لغتنا وإللي عايز يعاركني يعاركني بقى، في العربي ممكن الكلمه الواحده يكون لها أكثر من معنى كلمة ملك بكسر اللام يعني حاكم أما ملك بفتح اللام يعني ملاك كلمه مناخ بضم الميم يعني جو أما كلمة مناخ بفتح الميم يعني المكان إللي الجمل بيقعد فيه بينخ فيه، كلمة هوية بفتح الهاء يعني المكان العميق إللي الشيء بيسقط فيه جاي من فعل هوا أما كلمه هويه بضم الهاء يعني كينونه الإنسان زي أصله، تاريخه ولغته.
سامح حسين: اللغة العربية بتخلي الخيال شغال دايمًا
وأردف سامح حسين قائلًا: طب أقولك على حاجة شوفت دقه اللغة العربية وأنت بتقول كسرت الطبق فتفهم وأنت مغمض أنك جبته نصين، لكن كسرت الطبق بتشديد السين يعني خليته 100 حتة، وسوره الكهف وربنا سبحانه وتعالى بيوصف حال يأجوج ومأجوج مع السور إللي بناه ذو القرنين قال "فما اسطاعوا أن يظهروه وما استطاعوا له نقبا" الطاقه والقوه إللي محتاجينها علشان يعدوا السور للناحيه الثانية أقل بكثير من إللي ممكن يحتاجوها عشان يعملوا فتحه في السور ده عشان كده زود حرف في الكلمه الثانيه استطاع.
وتابع: اللغة العربية لغة غنية إللي تخلي الخيال شغال دائمًا وتخليك وأنت بتسمع كأنك بتشوف وده من جماليتها، يعني لما يقولوا عن حد كريم يقولوا إيه لا تطفئ له نار طول الوقت مشغل البوتاجاز عشان يعمل أكل للضيوف شفت الجمال، واحد شجاع يقول عليه أسد واحد صبور أقول عليه جمل ست جميله نقول عليها بدر التشبيهات دي بتخليك تشوف الكلام مش تسمعه، اللغة العربية كمان لغة متجددة مش جامدة، لغة قادرة تمتص أي كلمات من لغات ثانيه وتضمها للقاموس زي كلمة البنك أو الإستاد أو التليفون أو غيرها كثير قوي يعني لغة مش منغلقة على نفسها ولا لغة قديمة ورجعية زي ما البعض متخيل.
وأضاف: الموسيقى غللي في اللغة العربية ليها سحر خاص لأن تركيبة الكلمات والحروف مع القاموس الضخم إللي فيه ألاف الكلمات ساعد في ده، عشان كده هتلاقي الشاعر العربي ليه تراث لوحده ضامم مخزون كبير وضخم هي لغة اصلًا اتخلقت عشان يتكتب بها شعر يعني سمعت مثلًا عمنا الاصمعي وهو بيقول صـوت صــفير البلبل، هيج قـــلبي الثمــلي، المـــــــاء والزهر معا، مــــع زهرِ لحظِ المٌقَلي، و أنت يا ســـــــــيدَ لي، وســــــيدي ومولي لي، فكــــــــم فكــــم تيمني، غُـــزَيلٌ عقــــــــــيقَلي، قطَّفتَه من وجـنَةٍ، من لثم ورد الخـجلي، فـقال لا لا لا لا لا، وقد غدا مهرولي، والخوذ مالت طربا، من فعل هذا الرجلي، فولولت وولولت، ولي ولي يا ويللي، فقلت لا تولولي، وبيني اللؤلؤ لـي، تعرف تقولها بالإنجليزي دي.
سامح حسين: الكلام لما تقوله بالعربي ليه وقار
واستأنف حديثه قائلًا: يا أخي ده حتى الكلام لما تقوله بالعربي ليه شياكه ووقار كده مثلًا لما تقول أهلًا وسهلًا إللي بنستخدمها في الترحيب دي هي إختصار لجملة طويلة بتقول حللت أهلًا ونزلت سهلًا، يعني أنت في بيتك ومطرحك وسط أهلك يا حبيب أخوك، تعبيرات حميمية قوي ودافئة قوي ولما حد يقولك شكرًا وتقوله عفوًا، عفوًا دي تعبير مؤدب قوي يا جماعة كأنك بتقوله أعفيني من الشغل أنا معملتش حاجه استاهل عليها الشكر رد في منتهى التواضع.
واختتم حديثه قائلًا: حد قالك كلام عجبك وأنت عايز تعبر عن إعجابك بتقوله لا فض فوك يعني ربنا ما يحرمك من نعمه الكلام الجميل ده حد بيطلب منك طلب وأنت عايز تعبر عن موافقتك له على الرحب والسعة جمله تحسسك بالكرم والترحيب، اللغة العربية لغة جميلة قوي والله العظيم بس لغة محتاجة إللي يحسها ويفهمها، وأنا شايف أننا محتاجين نتكلم عربي كلامنا هيكون أجمل وأشيك وبعدين يا أخي ده حتى النبي عربي وكل سنة وأنتم طيبين
