قطايف سامح حسين.. متحبسش روحك وترجع تشتكي أنك مش عارف تحقق حاجة (فيديو)
قطايف سامح حسين .. متحبسش روحك العظيمه دي في قزازه وترجع تشتكي أنك مش عارف تحقق حاجه، متخليش الناس تقصقص جناحتك وترجع تزعل علشان مش عارف تطير، صدق نفسك لأنك جميل وقوي وتقدر تعمل أي حاجه لو بس قررت.
قصة الشاعر صلاح شاهين
قال الفنان سامح حسين خلال الحلقة الـ 17 من برنامج قطايف بعنوان "صدق نفسك": الشاعر الكبير صلاح شاهين، إللي كلنا عارفينه وبنحبه، كان في يوم من الأيام مجرد طالب في كلية الحقوق، بيأخذ السنة في سنتين، ومش عارف يخلص الكلية، وفي الوقت ده كان والده المستشار بهجت حلمي، قاضي ورجل قانون كبير، وصل في المناصب لدرجة إنه بقى رئيس محكمة استئناف المنصورة، فتخيل تبقى قاضي قد الدنيا وابنك بيسقط في كلية الحقوق.
وفي يوم من الأيام قال والد صلاح جاهين له: "تعال يا ابني، مش عيب يا ولد يا صلاح لما يبقى أبوك مستشار وأنت مش عارف تخلص كلية الحقوق"، لكن صلاح الشاب الصغير، إللي لسه محدش يعرفه، قال لأبوه: "أنا مش عايز الناس تشاور عليا وتقول ده ابن المستشار بهجت حلمي أنا عايزهم يشاوروا عليك أنت، ويقولوا ده أبو صلاح جاهين".
في الوقت ده لو أي حد كان في مكان سيادة المستشار كان هيتفاجأ، ولكن صلاح كان مصدق نفسه، وبعد ذلك أصبح صلاح جاهين من أعظم الشعراء والمبدعين في مصر، ونجح في كل شيء تقريبًا في الفن، كتب سيناريو، مثل، رسم كاريكاتير، وكتب شعر، وأصبح شاعر ثورة يوليو ومقرب جدًا من الرئيس جمال عبد الناصر.
الإيمان بالنفس أهم سبل النجاح
أبوه كمان نجح وتدرج في السلك القضائي لحد ما بقى رئيس محكمة استئناف المنصورة، وفي يوم كان الرئيس جمال عبد الناصر بيكرم القضاة وكان من ضمنهم المستشار بهجت حلمي، فالرئيس عبد الناصر سلم عليه وهو ميعرفوش، فواحد من إللي واقفين ورا الريس قال له: "على فكرة يا فندم، سيادة المستشار يبقى والد الشاعر صلاح جاهين".
ابتسم عبد الناصر وسلم عليه بحرارة أكبر، وسلم عليه تحية لابنه صلاح شاهين، ومن هنا تحققت نبوءة الولد إللي كان أبوه بيقول عليه خايب، والناس شاورت على أبوه وقالت ده "أبو صلاح جاهين"، وكمان مش أي ناس، ده كان رئيس الجمهورية.
وكان الدكتور أحمد زويل، العالم المصري الكبير، من وهو طفل في الابتدائي كان حاطط على باب غرفته يافطة مكتوب عليها "الدكتور أحمد زويل"، يمكن كانت حاجة تضحك في وقتها، لكن الطفل الذي صدق نفسه أصبح واحدًا من أعظم العلماء في تاريخ مصر.
سامح حسين: سر النجاح أنك تصدق نفسك
لو دورنا في كل قصص النجاح إللي سمعتها في حياتك، هنلاقي شئ مشترك في كل القصص، وهو إن أصحاب هذه القصص صدقوا أنفسهم واشتغلوا على أنفسهم فالدنيا صدقتهم، كل انسان ربنا سبحانه وتعالى خلقه مميز نسخة فريدة من نوعها بصمة إيدك مش هتتكرر، وكمان بصمة روحك مميزة كل شخص مننا لديه كنز بداخله، سواء كان يعرف أن يمثل أو يكتب أو صوته حلو أو ذاكرته قوية أو أي مهارة أخرى.
ربنا خلق كل إنسان بقدرات ومواهب فريدة من نوعها، كل واحد فينا لديه شيء مميز يمكن أن ينجح فيه، المهم أن تكتشف هذا الكنز وتحافظ عليه، ربنا عادل جدًا يا جماعة مش ممكن يدي حد حاجة ويحرم حد ثاني لكن علشان الحياة تستمر لازم الكنز بتاع كل واحد فينا يكون مختلف عن غيره وعلى رأي عمنا توفيق الدقن لما كلنا نبقى فتوات أمال مين إللي هيضرب مهمتك أنت بقى أنك تلاقي الكنز بتاعك وتحافظ عليه وتستثمر فيه ولما تحس أنك ماشي في طريق مش بتاعك ما تكمل لف عند أقرب يوتيرن وترجع.
سامح حسين: رحلة اكتشاف كنزك الحقيقة بتأخد شوية وقت
متخافش يعني أنك تخرج من الكونفرت زون بتاعك ومتنجحش في أسامي نجحت جدًا في حاجات وكانت بداية حياتها في حاجات ثانية خالص، عندك مثلًا عبد الحليم حافظ كان عايز يطلع ملحن، بليغ حمدي كان بادئ حياته مطرب، ونجيب الريحاني مكنش عايز يبقى كوميديان كان عايز يمثل تراجيدي، طالما أنت ماشي في طريقك هتلاقي نفسك وتكتشف كنزك ودي مسألة وقت مش أكثر المهم قبل كل ده أنك تصدق نفسك، ومتسمعش لأي مخلوق يقلل منك أو يحبطك أو يكسر مقاديفك.
جايز لما تفكر تعيد تقييمك لنفسك وتعرف أنك أجمل وأعظم مخلوق في الدنيا ربنا لما خلقك خلق جسمك من طين الأرض لكن خلق روحك من نفخه الهية من روح الله جسمك يمكن يكون محدود لأنه من الأرض المحدوده لكن روحك مش ممكن أبدًا تكون محدودة لأنها من روح ربنا وأنت طبعًا مش محتاج أقولك إن قدره ربنا غير محدوده الفرق بين امكانيات الروح وامكانيات الجسد فرق هائل زي الفرق كده بين الموبايل إللي مفيهوش نت وموبايل فيه نت الأولاني بيديك شويه عمليات مش قليلة صحيح لكن محدودة لكن الثاني تقدر تعمل به حاجات كثير.
فمتحبسش روحك العظيمة دي في قزازه وترجع تشتكي أنك مش عارف تحقق حاجه متخليش الناس تقصقص جناحاتك وترجع تزعل علشان مش عارف تطير، صدق نفسك لأنك جميل وقوي وتقدر تعمل أي حاجة لو بس قررت، لما تصدق الكلام ده كله الدنيا هتصدقك وكل سنة وأنتم طيبين.
