قبل رأس السنة 2025.. بسنت النبراوي تكشف عن لقطات من 2024| خاص

رأس السنة 2025، أيام تفصلنا عن وداع عام 2024 وبداية عام جديد رأس السنة 2025، يأمل فيه الناس أن يكون عام خير وسعادة وتحقيق الأمنيات.

وكشفت الفنانة بسنت النبراوي لموقع الأيام المصرية عن أبرز أحلامها وأمنياتها لعام 2025، وذلك قبل احتفالات رأس السنة 2025.

إليكم تصريحات بسنت النبراوي:-

أكتر لقطة إنسانية بالنسبالك في 2024؟

إن دكتور مجدي يعقوب اتكرم على إنجازاته في مهرجان وشوشة ودي حاجة فرحتني جداً وفرحت كل الناس اللي حضرت المهرجان، لإن دكتور مجدي يعقوب من الناس اللي بصمة في تاريخ الطب بتعمل شرف لكل المصريين.

أكتر لقطة غير إنسانية في 2024؟

كان فيه راجل في إسكندرية بيضرب ست في الشارع والناس صورت ومحدش حاش عنها ومحدش أدخل وسابوها تضرب ضرب مبرح، ودي كانت لقطة بشعة أوي.

رسالة تقوليها لـ 2024؟

بقول الحمد لله على ما مضى وهي كانت صعبة في حاجات وكويسة في حاجات زي أي يوم بيعدي علينا في حياتنا فيه الحلو وفيه الوحش، كانت بالنسبالي سنة صعبة أوي لأنها أول سنة تعدي عليا من غير بابا الله يرحمه كانت سنة مش سهلة أبداً، وبقول الحمد لله إن إحنا احسن من غيرنا في حاجات كتير، والحمد لله على الستر والصحة.

رسالة تقولها لـ 2025؟

بتمنى من ربنا أن يكون عندي طفل وبتمنى إنها تكون سنة كويسة وأعوض حاجات كتير أنا مقدرتش أحققها السنادي وأتمنى لكل الناس كل الخير.

أكتر فيلم شاهدته في 2024 وعجبك؟

أكتر فيلم كان إكس مراتي لهشام ماجد ومحمد ممدوح كان كوميدي جداً وبيضحكني ويخرجني من المود وعجبني أوي.

أكتر مسلسل عجبك في 2024؟

أكتر مسلسل كان موعد مع الماضي لـ آسر ياسين، طريقة التصوير والإخراج والتمثيل كلهم كانوا فوق الممتاز.

أغنية بتوصف حالتك بشكل عام في 2024؟

الأغنية المناسبة لـ 2024 مخاصماك.

إيه الخسائر اللي خسرتها في 2024؟

الخسائر اللي خسرتها إنها كانت سنة من غير والدي الله يرحمه وده أهم حاجة في حياتي.

إيه المكاسب اللي كسبتها في 2024؟

المكاسب اللي كسبتها اتعرفت على ناس جديدة في حياتي نفعتني وشغلي والبرنامج نفعني طبعاً جداً وكان من مكاسب 2024.