ماذا قالت شقيقة نيرة أشرف في هجومها على صناع مسلسل ساعته وتاريخه؟
ردت شروق أشرف شقيقة نيرة أشرف، على الأخبار التي تداولها رواد السوشيال ميديا، عن تجسيد قصة قتل نيرة على يد زميلها في الجامعة، بعدما رفضت الارتباط به، من خلال مسلسل بطولة مايان السيد.
شقيقة نيرة أشرف تهاجم صناع مسلسل ساعته وتاريخه
نشرت شروق شقيقة نيرة أشرف، خلال الساعات القليلة الماضية، مقطع فيديو تهاجم من خلاله صناع مسلسل ساعته وتاريخه، عبر حسابها بموقع فيس بوك.
وقالت في الفيديو: احنا اتفاجئنا النهارده أنا وأهلي، إن فيه مسلسل بيتعمل عن قصة اختي نيرة، واحنا هنتخذ إجراءاتنا القانونية، ومش هنسمح لحد إنه يظلمنا أو ييجي علينا تاني، واحنا اتوجعنا بما فيه الكفاية، وكفاية كده مش هنقدر نستحمل ولا هنقبل إن حد يظلمنا تاني".
شقيقة نيرة أشرف تطرح سؤال على مؤلف مسلسل ساعته وتاريخه: "جبتوا معلوماتكم منين وأنتوا مرجعتولناش؟
تابعت شقيقة نيرة أشرف في الفيديو، قائلةً: الكلمتين دول للمؤلف والمخرج منين بقى جبتوا المعلومات بتاعتكم؟ منين بقى جبتوا المعلومات بتاعة المسلسل وأنتوا لا كلمتونا ولا رجعتولنا ولا استأذنتوا أهل الضحية، ولا عرفتوا معلومات، يبقى جبتوا معلوماتكم منين! جبتوها من السوشيال ميديا.. من الإشاعات اللي كانت بتطلع علينا، ده احنا كل يوم كان بيطلع علينا إشاعات، كنا بنام ونقوم ونصحى نقول يا ترى هيطلعوا علينا إشاعة ايه النهارده".
أضافت شروق شقيقة نيرة أشرف في الفيديو، "أنتوا متعرفوش معلومات كتير أوي، أنتوا متعرفوش إن نيرة الله يرحمها عاشت سنتين في رعب وخوف وألم، متعرفوش إن نيرة كانت بتاخد مهدئات، نيرة في أيامها الأخيرة مكنتش بتنام، متعرفوش إننا عملنا 5 محاضر في القاهرة والمحلة ومفيش حاجة حصلت، يمكن لو محضر واحد منهم وقتها مشي والواد ده اتقبض عليه، كانت نيرة دلوقتي زمانها عايشة وسطينا، يا ترى اتكلمتوا عن كل ده، اتكلمتوا عن قد ايه نيرة اتظلمت وهي عايشة وحتى بعد ما ماتت".
شقيقة نيرة أشرف تهاجم المنصات التي روجت شائعات عن شقيقتها
استطردت نيرة أشرف في الفيديو، مهاجمة المنصات التي خاضت في شرف شقيقتها نيرة، ولم يحترموا قداسة الموت وما كانوا يعانوه من ضغوط وصعوبات.
وقالت: "المنصات طلعت خاضت في عرضها وشرفها، احنا اتبهدلنا كتير علشان نبعده عنها ومقدرناش، وروحنا لأهله وأخواله علشان يبعد عنها ومفيش حد عرف يوقفه، عايزه اعرف بقى المؤلف والمخرج قعدوا مع بعض كده وكتبوا القصة إزاي؟ عايزه أعرف انتوا ألفتوا القصة إزاي من غير ما ترجعوا لأهل الضحية؟ جبتوا معلوماتكم منين؟ أنا عايزه أفهم جبتوا معلوماتكم منين؟ إزاي احنا نتفاجئ كده مرة واحدة إنكم عملتوا قصة نيرة من غير ما ترجعوا لأهلها إزاي؟".
اختتمت شقيقة نيرة أشرف الفيديو، قائلةً: "مش من حقكم على فكرة.. مش من حقكم ومينفعش وميصحش، هتعرفوا تقدموا نيرة أشرف الشخصية المجتهدة، الطموحة اللي كانت عايزه تطلع مضيفة طيران، اللي كانت بتشتغل وتدرس علشان تطلع حاجة كبيرة، اختي كانت هتطلع حاجة في المستقبل، أما الواد ده كان معدوم كرامة ومعدوم الإحساس، أنا عمري ما شوفت واحد معندوش كرامة قده، مش عارفه أوصفه إزاي بجد".
يذكر أن شروق شقيقة نيرة أشرف، كتبت أكثر من منشور عبر حسابها الرسمي على موقع فيس بوك، بخصوص مسلسل ساعته وتاريخه بطولة مايان السيد والذي يتعرض لقصة مقتل نيرة أشرف، وكتبت شروق: "المسلسل ده اتعمل على أي أساس! احنا بنحاول نتعايش ونتخطى اللي حصلنا والمسلسل ده هيرجعنا لنقطه الصفر تاني، إزاي مشاعر الناس عندكم ملهاش قيمه بالشكل ده !".