كنت خايفة جدا.. سناء منصور تتحدث عن لحظة وقوفها أمام الرئيس خلال الندوة التثقيفية
كشفت الإعلامية سناء منصور، تفاصيل تجربتها في إذاعة مونت كارلو، وكواليس تكريمها من الرئيس السيسي خلال الندوة التثقيفية الـ 40 للقوات المسلحة.
وقالت سناء منصور، خلال مداخلة هاتفية لبرنامج "حضرة المواطن"، المذاع على قناة الحدث اليوم: "مقولتش تفاصيل كتير خلال الندوة لأن كان معايا وقت قليل أوي، والإعلامي عبده مباشر استأذن الرئيس أنه يزود كلامه، وإحنا كلنا كنا بنتتبع كل كلمة بيكتبها أيام حرب 1973".
وأضافت: "أنا كنت خايفة جدا، لأن من فترة كبيرة معملتش مواجهة وقدام الرئيس، كان شيء مخيف شوية ليا، واتحدثت عن عملي في إذاعة مونت كارلو، ولما كنا في أوروبا، كان يتم احترام المنتصر فقط، لكن مكناش عارفين نرفع راسنا هناك وقتها، كانوا بيقولوا عننا مهزومين، ومجرد ما اتحرك الجيش بتاعنا كنا حاسين الدنيا كلها بتتحرك".
وتابعت: "ده شجعنا نغير الأسلوب من المنوعات، والأشياء اللطيفة، في إذاعة مونت كارلو، وتحولنا بقلبنا والدنيا كلها اتكلمت عن حرب أكتوبر، وكنا رافعين راسنا في وسط الإعلاميين الفرنسيين".
وأكملت: "قدمت استقالتي وقتها للمدير الفرنسي، لأني كنت وحيدة كمان في الإذاعة وكانوا بيعتبروني كرسي ليه 4 رجول، وكنت الدلوعة هناك، لكن فجأة المدير اتخانق معانا لما عرف التحول اللي حصل في الإذاعة بعد حرب أكتوبر وقالي وقفي السيرك اللي أنتي عاملاه ده".
