ياسمين عز لكولر: وحياة ابنك كيفن خد كهربا في حضنك وحسسه بالأمان
دافعت الإعلامية ياسمين عز، عن لاعب النادي الأهلي محمود كهربا، موجهة مجموعة من النصائح لمدربه مارسيل كولر.
وقالت ياسمين عز، خلال حديثها ببرنامج "كلام الناس"، المذاع على قناة إم بي سي مصر: "محمود كهربا، نجم الأهلي المحبوب اللي ساكن جوه القلوب، لما بقول اسم كهربا في ناس بتضايق، لأن في ناس كتير بتزعل من موهبته".
وأضافت ياسمين عز: "أول ما ظهر قالوا إحنا عندنا كنز، وكل إنجاز بيحققه وكل ما يستقر بيتحط قدامه عقبة أو مشكلة، ولما راح الأهلي قولنا هنشوف إنجازات، وأول ما الفولت العالي اشتغل قالوله هات 2 مليون دولار غرامة للزمالك، حد قال إنه مشارك إيلون ماسك؟".
ووجهت ياسمين عز، رسالة لمدرب الأهلي، مارسيل كولر: "الراجل اتحمل ودفع الغرامة، يقوم جاي كولر مدرب الأهلي يقوله اقعد احتياطي، هو كهربا واكل ورثك، وحياة ابنك كيفن تعتبره زي ابنك كيفن وخده في حضنك وراضيه وحسسه بالاهتمام والأمان، كهربا يجي منه كتير".
وأكملت: "في رابط بينك وبينه حرف الكاف في اسمه واسمك واسم ابنك، ومفيش حاجة بتبقى صدفة، ده لو كان بيلعب عندكم في سويسرا كان زمان حطوا اسمه على الساعات".
