عايشة باسم ولد وبتنام في المقابر.. «تقى» فتاة أجبرتها الظروف على التخلي عن أنوثتها

في قصة مأساوية تقشعر لها الأبدان، اضطرت فتاة تدعى "تقى"، تعيش في محافظة المنوفية، إلى حلق شعرها وتحويل نفسها من أنثى إلى ذكر يدعى "مصطفى" ويلقب بـ "ديشا الأسطورة".

تقى تفتح قلبها وتتحدث عن الصعوبات التي مرت بها

وبدأت تقى حديثها لـ موقع "الأيام المصرية"، بأنها يتيمة الأم والأب ووحيدة، وتعرضت لكثير من المشاكل، وأصبحت حياتها غريبة، بعد أن تزوجت وهي في عمر 16 سنة.

وأضافت تقى: "عشت حياة صعبة كنت بنزل اشتغل وجوزي مكنش بيعمل حاجة وقاعد في البيت وخلفت رضا، وكنت شغالة وبسافر كل 13 يوم وأرجع يومين، جيت ملقتش العفش ولا ابني وكنت حامل".

وتابعت أنها ذهبت إلى أهل والدتها، لمساعدتها، لكن لم تجد منهم جدوى، معلقة: "روحت لأهلي عشان يساعدوني ملقتش منهم أي فائدة، وقعدت من الشغل ونفسيتي اتدمرت، مبقتش اشوف ابني ولا اخده في حضني وبعدين خالي طردني وبقيت في الشارع وأنا حامل".

وأكملت: "لقيت بشر ميتعاشروش، الكل عايز ينهش في لحمي بس، كنت بنام في المقابر أو أي مكان، ملقتش حد، بعد ما ولدت جبت رحيم روحت لأهلي وحصلت مشاكل تاني وسيبت لهم الواد عشان يتربى".

ما العوامل التي دفعت تقى إلى التحول لمصطفى؟

وواصلت: "بقيت بطولي في الشارع، ظهرت شخصية مصطفى اللي هو أنا دلوقتي، واشتغلت كل حاجة في كافيتريا وسباك ونجار ونقاش".

وأكملت: "مصطفى أمان لتقى وهو الضهر ليها، تقى شيء ومصطفى شيء تاني، لقيت نفسي لوحدي مرة واحدة، دلوقتي كل صحابي شباب، وبقيت مصطفى عشان عايز أعمل حاجة لعيالي، وأنا بالنسبة لهم بابا".

وواصلت: "بقيت مصطفى عشان كنت عايز كدا، وربطت رباط ضاغط عشان أبقى زيي زي الولد، وأنا مش عايزه أعرف جوزي فين وعايزه اتطلق منه، وطلباتي كتقى الأمان وألم عيالي، وطلباتي كمصطفى أعيش تقى مرتاحه وأخليها تحس بالأمان ومتبقاش محتاجة لحد".