ياسمين رحمي تكشف ملامح الفيلم الصيني العالمي وتفاصيل مشاركتها فيه|خاص

تخوض الفنانة الشابة ياسمين رحمي أولى تجاربها العالمية من خلال الفيلم الصيني one upon a time in the middle، والذي تشارك في بطولته مع النجم الصيني شين تينج والمخرج الذي حصل على العديد من الجوائز وين مووي.

وقد كشفت ياسمين رحمي في تصريحات لـ الأيام المصرية عن ملامح الفيلم الصيني العالمي once upon a time in the middle east وتفاصيل مشاركتها فيه.

ونستعرض في السطور التالية أبرز تصريحات الفنانة ياسمين رحمي عن مشاركتها في فيلم once upon a time in the middle east. 

ياسمين رحمي: "الفيلم فيه شوية كوميديا بس بعد كده الأحداث بتقلب رعب"

فحول تصريحاتها التليفزيونية بأن بطل الفيلم في مثل نجومية الفنان محمد هنيدي في مصر، وهل الفيلم سيكون به كوميديا، قالت ياسمين رحمي: "فيه كوميديا في الفيلم، هو زي محمد هنيدي بس هما عندهم في الصين مابيصنفوش أوي الممثلين، مع إن الممثل الكوميدي عادي جدًا يعمل دراما ويعيط الناس، هما بيحبوا ده جدًا".

وأردفت: "فهنا في الفيلم هو هيبقى فيه في بداية الفيلم شوية كوميديا، بس بعد كده مابيبقاش فيه كوميديا أوي، يعني بالعكس بتقلب الأحداث بيبقى فيها رعب أكتر منه كوميدي".

ياسمين رحمي: "الشغلانة في مصر قايمة على العمل بوكيل أعمال بس عادةً مع كبار النجوم"

وعن صعوبة أن العمل بوكيل أعمال يطبق داخل مصر، بينما يتفرغ الفنان للتمثيل فقط بدلًا من أن يقوم بالاتفاقات الخاصة بالأعمال الفنية بنفسه، أوضحت ياسمين رحمي: والله هي هنا في مصر الشغلانة قايمة على كده فعلًا، بس في كبار النجوم عادةً بيبقى ليهم وكيل أعمال وهما بيتفرغوا فقط للتمثيل".

وأضافت: "ووكيل الأعمال ده يبقى هو مسئول عن كل حاجة في حياة الممثل، حتى السوشيال ميديا بتاعته، حتى تصريحاته، حتى تعاملاته مع الصحفيين، التعاملات المادية مع الإنتاج، المطلبات اللي هو بيحتاجها، توفير الحاجات اللوجستية ليه أثناء التصوير، بيبقى مدير أعماله هو المسئول عن كل ده".

ياسمين رحمي: "وكيل أعمالي في الصين هو اللي كان مسئول عن كل حاجة"

ولفتت: "هو ده اللي حصل معايا بس في الصين من خلال وكيل أعمالي، هو اللي كان مسئول عن كل الحاجات دي بس في الصين في مصر يمكن أنا لسه شوية مش في مرحلة إني يبقى معايا وكيل أعمال أوي جوه مصر".

وتابعت: "لأن وكيل الأعمال هنا جوه مصر، عادةً عشان يبقى وكيل أعمال كبير ويقدر يساعدني فعلًا، لازم يكون اسم مهم واسم كبير، والاسم المهم بيبقى عايز عادةً بشتغل مع نجم كبير، علشان هو ياخد نسبة من أجره، أنا يمكن أجري مش كبير زي أجور النجوم".

وأشارت: "فلو معايا وكيل أعمال مش هيبقى بيكسب كتير أوي من ورايا، ففي المستقبل لما يبقى شغلي مثلًا بأرقام كبيرة، ساعتها أقدر ببقى معايا وكيل أعمال جوه مصر".

ياسمين رحمي: "لسه ماعنديش حاجة أكشن جاتلي لحد دلوقتي"

وبشأن تصريحاتها بأن الفيلم به مشاهد أكشن، وعما إذا كنا سنراها في أعمال أكشن داخل مصر مثل العتاولة 2، كشفت ياسمين رحمي: "يعني مش عايزة أتكلم عن مسلسل بعينه، أنا لسه ماعنديش حاجة أكشن جاتلي لحد دلوقتي".

وعما إذا كانت لا تفضل أن تشارك في عمل من جزئه الثاني، أوضحت: "أتمنى إني أشتغل في أي حاجة جديدة أو حتى لو جزء جديد من مسلسل ناجح هبقى سعيدة جدًا إني أشتغل فيه". 

واستكملت: "بدون ذكر اسم مسلسل محدد يعني، بس مسلسل هترشح له والدور هيبقى مناسب سواء كان جزء أول، جزء تاني، كان ناجح الجزء الأول أو لأ، هي الفكرة في الدور اللي أنا متشرحة فيه وهل مناسب ليا فعلًا ولا لأ، مش في اسم العمل".