قطايف سامح حسين .. فلوسك وصحتك عهدة لازم تعدي بيها سليمة |فيديو
قطايف سامح حسين .. تحدث الفنان سامح حسين خلال الحلقة 28 من برنامج قطايف، الذي يعرض على قناته الرسمية على يوتيوب، خلال شهر رمضان المبارك، عن أضرار التدخين، وأنه يسبب في إيذاء الشخص المدخن، ومن حوله، واستنكر من الأشخاص الذين يضيعون أموالهم وصحتهم في أمر الشركة المنتجة له تحذر من أنه يسبب الوفاة.
حيث قال سامح حسين: لو اتفقنا بقى إن فلوسك وصحتك دي عهدة يبقى أنت لازم تعدي بالعهدة دي سليمة وتسلمها مافيهاش خربوش عشان أنت وأنا هنتحاسب عليها ينفع بقى حد عارف إن صحته عهدة ويبددها.
وتابع سامح حسين حديثه قائلًا: في فيلم سلام يا صاحبي الفنان عادل إمام أو مرزوق يعني قال للفنان سعيد صالح إللي هو بركات جملة عظيمة جدًا أهم حاجة نعدي بالبطيخ سليم ولما لقى نفسه داخل الخناقة خلاص قال له خوليو، جملة أعظم لو بطيخة أتكسرت قصادها رقبتك صحيح بعد كده اثناء الخناقه بدأ يحدفوا البطيخ نفسه أصلًا بس مش مهم أنا عجباني الجملة إللي في الأول نعدي بالبطيخ سليم.
سامح حسين: فلوسك وجسمك وصحتك مش بتوعك
وأضاف سامح حسين: أنت إنسان ربنا جابك الدنيا دي عشان تخوض رحلة طويلة أو قصيرة الله أعلم، ربنا يطول رحلتك ويحسن محطاتها عمومًا ربنا أداك شوية أدوات في الرحلة دي تساعدك عشان تكمل رحلتك دي، فلوس صحة نفسية جسم كل الحاجات دي مش بتاعتك شاورلي كده على حاجه فيهم اشتريتها بفلوسك، ده حتى فلوسك دي نفسها ربنا إللي ادهالك مقابل مجهود أه بس المجهود ده ربنا إللي اداهولك وكل شيء لا تملكه لا تملك حرية التصرف فيه دي بديهيات يا جماعة.
واستأنف: يا جدعان طيب لو أتفقنا بقى إن فلوسك وصحتك عهدة يبقى أنت لازم تعدي بالعهدة دي سليمة وتسلمها مافيهاش خربوش عشان أنت وأنا هنتحاسب عليها ينفع بقى حد عارف صحته عهدة ويبددها، أنا يا جماعة هحاول في الجزئية دي أخفف كلامي على قد ما أقدر عشان محدش يتضايق مني ولو ان الحته دي بالذات ما ينفعش فيها تخفيف، أنت لو شايف صاحبك شقته بتتحرق وهو جواها مش هتروح تخبط على الباب بشويش عشان تزعجه، أنت هتكسر الباب برجلك وتدخل تنقذه، وأنت حبيبي وأنا مش جاي أزايد عليك خالص أنا جاي أفكرك تاخد بالك من نفسك و هعدي حاجات كثير مضرة بالصحة من أكل والعادات في السهر والنوم وحاجات ثانية كثير، وهقف عند حاجة واحدة بس بشوفها أغرب حاجه بيعملها الإنسان في نفسه.
سامح حسين: وسطنا ناس بتشتري الموت بفلوسها
واردف حديثه قائلًا: عمرك شفت واحد داخل سوبر ماركت عدى على كل الرفوف وبعدين وقف قدام علبه تونة مكتوب عليها إن صلاحيتها منتهيه وأشتراها طب لو شوفت علبة شوكولاتة مكتوب عليها إن إللي هيأكلها هيموت بعد الشر عليكم جميعًا ينفع تدفع فيها فلوس وكل ما تغلى تصمم أنك تشتريها، ينفع توفر من مصاريف أكلك وتعليم ولادك عشان تشتري بالفلوس دي الشوكولاتة إللي بتموت، أي افتراض هفترضه هتلاقيه غريب جدًا ومع ذلك وسطنا ناس كثير بتعمل كده بتشتري الموت بفلوسها.
وأضاف حسين: وأنا بعتذرلك قوي لو الحلقه دي كانت مودها غامق غير إللي أنت متعود عليه مني بس بما إن في ناس كثير الحمد لله بتحبني وبتشوفني يبقى أنا عندي أمانه لازم أأديها، أنا عارف إن التدخين بيديك حاجات حلوة مش هننكر ده يعني، بيديك نيكوتين بيقلل عندك الإحساس بالتوتر وبيخليك مبسوط شوية، وماسكة السيجارة نفسها بتديك إحساس بالثقه في نفسك، والعادات المرتبطة بالسجائر يعني سيجارة بعد الأكل سيجارة مع الشاي سيجارة وأنت فرحان أو وأنت متضايق، كل دي حاجات بتزود ارتباطك بالعادة اللعينة دي لكن لو جيت بقى حسبتها في الآخر هتلاقيها أقل بكثير من المخاطر والأضرار إللي بتحصل بسببها.
سامح حسين: 60 ألف طفل بيموتوا سنويًا بسبب استنشاق دخان السجائر
واستكمل سامح حسين حديثه قائلًا: أنا مش هقولك إن التدخين بيموت بسببه كل سنة أكثر من 8 مليون إنسان حوالين العالم دي معلومة أكيد حضرتك بتسمعها كثير، في بقى معلومة مابتسمعهاش كثير وهي إن التدخين يتسبب في موت حوالي مليون و300 ألف إنسان كل سنة، المفاجأه الغير سعيدة بقى إن العدد ده أصلا من الوفيات هو عدد ناس مبتدخنش أصلا لكنهم بيتأثروا بالتدخين السلبي طب تعرف إن في 60 ألف طفل أقل من خمس سنين بيموتوا سنويا برضو بسبب استنشاق دخان السجائر، الناس دي ذنبها إيه لو مش خايف على نفسك خاف عليهم.
وتابع: يا صديقي المدخن أنت مش بتقتل نفسك أنت بتقتل أبرياء ملهمش أي ذنب يعني مش بس بتبدد عهدتك أنت بتبدد عهدة غيرك، كمان تأكد إن كل خلية في جسمك ربنا خلقها علشان مهمة واحدة بس أنك تعبد بيها ربنا، الكلام ده مش معناه أننا نعيش طول حياتنا في المسجد أو في الكنيسة، بس الحياه كلها عبادة، العمل عبادة، رعايتك لأسرتك عبادة، خدمتك لبلدك عباد، دي وظيفتك إللي استلمت علشانها العهدة المتمثلة في جسمك وفلوسك وصحتك، ينفع بقى تهلك جسمك وتضرب أعضائك عضو ورا الثاني، وتضيع فلوسك وصحتك على شيء كل الدنيا أتفقت أنه مضر وقاتل.
سامح حسين: التدخين قاتل مش مستاهل المغامرة
وأضاف حسين: والشركات المنتجه له نفسها كتبتلك على العلبه بتاعته أنه مضر وقاتل مش مستاهلة المغامرة دي يعني، أنا عارف إن الموضوع صعب بس مش مستحيل بدليل أننا في شهر رمضان بنقدر نمتنع فيه عن العادة دي بسبب الصيام، فبلاش يا سيدي بقى سيجارة بعد الفطار دي ما أنت قاعد طول اليوم من غيرها فرقت إيه يعني.
واختتم حديثه قائلًا: جرب واستعين بالله وقول يا رب أنا عايز أبطل علشانك ساعدني وصدقني إن شاء الله هيساعدك والله علشان تحافظ على عهدتك، ولو مالقيتش حافز قوي فكر دائما في الناس إللي بتحبك، الناس إللي هيفرق معاهم قوي أنهم ميشوفوش فيك أي حاجة وحشه لا قدر الله ربنا ما يجيبلكش اي وحش، وربنا يتوب على كل مدخن يا رب ويثبت كل إللي بطلوا تدخين زي حالاتي وكل سنة وأنتم طيبين.
