سامح حسين: سر النجاح في الامتثال لقضاء الله (فيديو)

تحدث الفنان سامح حسين خلال حلقة "على خريطة ربنا" من برنامجه قطايف، الذي يعرض على قناته الرسمية على اليوتيوب حول سر النجاح، حيث قال: الحياة مش عملية حسابية، 1 + 1 = 2، لا ده حساباتك أنت بحسابات ربنا سبحانه وتعالى، ممكن 1 + 1 يساوي 3، وممكن يساوي مليون، عادي جدًا، في حاجات جرينا وراها سنين ولما أخدناها طلعت عينينا، وياما حاجات جرينا منها، وعرفنا بعد كده إنها هي إللي فيها الخير كله.

سامح حسين: السعي للكمال هو سعي بشري أزلي

وتابع سامح حسين قائلًا: تعال نفترض فرضية خيالية مع بعضينا، مش هتحصل على أرض الواقع، افترض أننا جبنا شخص ما، نسميه مثلًا "الأستاذ سين"، وقلنا له: أديني ورقة فلوس كانت فاضية من وش وظهر، أكتب كل إللي نفسك فيه، كل أحلامك"، وقعد الأستاذ سين مع الورقة بتاعته نصف ساعة، ولقيناه كاتب كل إللي يتمناه: فلوس، صحة، استقرار اجتماعي، نجاح، سعادة، 3 كيلو بانيه، وبعدها قلنا له: "معلش يا أستاذ سين، الأوردر بتاع حضرتك كله موجود ماعدا الصحة ممكن نشيلها؟"، تفتكر هيوافق؟ أكيد هيرفض، طب يا أستاذ سين، في أوردر لسه مطلعش، كان رايح للأستاذ صادق تأخذ منه الصحة وتدي له الفلوس إللي معاك يتعالج بيها، لا، برضو، أنت بتاخذ الصحة والفلوس وتدي السعادة برضو؟ لا، وأعتقد مش هيوافق يفرط في البانية كمان، ده مش اسمه طمع، ده سعي بشري تاريخي وأزلي، اسمه البحث عن الكمال أو المثالية.

وأضاف: متستغربش موقف الاستاذ سين، عشان أبوه نفسه كان في الجنة زمان، وربنا سبحانه وتعالى قال له: "خذ كل إللي نفسك فيه، بس متجيش جنب الشجرة دي"، وبرضو أكل منها، هل في مثالية في الحياة دي كلها؟ الواقع بيقول لا، بس أنا عندي رأي ثاني: المثالية في الامتثال، يعني إيه الكلام ده؟ تعرف تعمل لي جرد لكل النجاحات إللي في حياتك؟ أي نجحت في حياتك؟ جواز مستقر؟ نجاح وظيفة كويسة؟ ده نجاح، 20 جرام ذهب من أيام ما كان بـ 800 جنيه؟ ده نجاح، وهكذا كام نجاح من دول كنت عارف نتيجته قبل ما تمشي في الطريق بتاعه؟ كم حاجة من دول مكنتش رافضها في الأول، وكنت شايف إنها تخيب منك، وطلعت فيها الخير؟ طب حصلت معاك كام مرة؟ عمومًا مصلحتك بتتحقق من آخر طريق كنت تفكر تمشي فيه أصلًا.

سامح حسين: حياتك رحلة وأنت مسافر متعرفش أبسط المعلومات عن رحلتك

وتابع حسين: وإيه العمل؟ أنا أقول لك: لو أنت رايح تزور واحد صاحبك في عنوان أنت ما تعرفوش ولا عمرك رحته، هتعمل إيه؟ هيبعث لك اللوكيشن، هل وأنت مش عارف العنوان، عندك فرصة تجود، عندك فرصة تجرب طرق مختصرة، ولا هتمشي وراء الجي بي إس لحد ما توصل؟ حالة واحدة بس من حقك فيها: متمشيش وراء العنوان إللي صاحبك أداهولك، إنك تكون مش واثق لو عارف إنه بيهزر كثير، مثلًا عنده متلازمة رامز جلال وبيحب يعمل مقالب.

وأضاف الفنان سامح حسين: أنت حياتك إيه غير رحلة؟ رحلة وأنت المسافر إللي معندكش أبسط المعلومات عن رحلتك، لا أنت كان عندك علم بميعاد التحرك ولا عندك علم بميعاد الوصول، مين معاه الجي بي إس؟ ربنا، تعرف حد غيره عنده خط السير إللي المفروض تمشي عليه؟ حد غير ربنا يعرف الغيب؟ حد غير ربنا يعرف إيه القرار إللي فيه مصلحتك وإيه القرار إللي يضرك؟.

سامح حسين: أعمل إللي عليك وملكش دعوة بالنتايج

واستأنف سامح حسين حديثه قائلًا: عشان تخرج بره دائرة المراهنات وما تعيش حياتك كمقرر مش عارف هيكسب إيه، خسر إيه، إللي هو ضد فكرة المثالية أصلًا، لازم يكون عندك امتثال تام، ربنا هنا قال لك إيه "فاستقم كما أمرت" يعني امشي على التعليمات بالحرف، اجتهد واعمل إللي عليك، وإللي ربنا سبحانه وتعالى قال لك عليه وبس، وملكش دعوة بالنتائج، لأن دي بتاعته هو مش بتاعتك أنت.

وقال سامح حسين: أنت قدامك طريقين للرزق: واحد حلال وفلوسه ومستقبله مش قد كده، وواحد حرام بس إغراءات كثير وأنت مغمض متفكرش، خذ الحلال، مش عشان الآخرة بس، لا عشان الدنيا كمان، عشان أنت مفيش أي حاجة في أيدك، لا أنت إللي في أيدك الرزق، ولا أنت إللي في أيدك المستقبل، ده بقى اسمه الامتثال.

وتابع: هل الامتثال ده أنا عايزه، أيوه، وهقول لك إزاي ربنا سبحانه وتعالى أداني صحة وقالي حافظ عليها، مشربتش سجائر، مسهرتش، مشربتش خمرة، مدخلتش علاقات محرمة، معملتش أي حاجة حذرني منها، فضلت معايا الصحة خير وبركة، طب عملت كل ده وراحت الصحة برضو، وده احتمال وارد ساعتها مش هقول إن ده حصل بسبب مخالفاتي وإن ده نتيجة أخطائي، لا هكون فاهم وعارف إنه ابتلاء، ابتلاء في ثواب وأجر كبير قوي وقتها لازم أرضى، والرضا ده بقى يا صديقي هو وسيلة الغنى الوحيدة في الدنيا مفيش حد مش راضي وغني، حتى لو كان ملياردير، هو برضو فقير لأنه لسه حاسس بذل لكل الحاجة إللي مش في إيده.

لا يفوتك

سامح حسين: قلوب الناس زي بيوتها لو دخلتها احترم حق الضيافة (فيديو)

سامح حسين ينفي مقولة "الجمهور عايز كده" ويتصدر التريند بمحتوى نافع

واختتم سامح حسين حديثه قائلًا: الخلاصة إن ملناش فيها طريق غير إللي ربنا سبحانه وتعالى أمرنا به، ملناش منها نجاة غير بالاستقامة، ملناش فيها حيلة غير بالامتثال، نعمل إللي علينا وبس، والنتائج دي ربنا سبحانه وتعالى هو إللي بيحطها بناءً على تقديره وحكمته ورحمته، وكل سنة وأنتم طيبين.