أميرة البيلي في معرض الكتاب 2025.. ما علاقة ديوان لكن لإمتى بسيد مكاوي؟ | خاص
أميرة البيلي في معرض الكتاب 2025، تستعد الشاعرة أميرة البيلي لطرح أحدث أعمالها الكتابية ديوان لكن لإمتى، والذي من المقرر أن تشارك به أميرة البيلي في معرض الكتاب 2025، والذي كشفت عن العديد من التفاصيل عنه وسبب اختيارها لذلك الاسم في حوار خاص لموقع الأيام المصرية.
حدثينا عن السنة الرابعة ليكي في معرض الكتاب 2025؟
أميرة البيلي في معرض الكتاب 2025 ، السنة الرابعة ليا في معرض الكتاب مخلياني أحس بشعور مسؤولية أكبر بكتير تجاه القراء وتجاه تحسين مستوى الكتابة وتجاه التحسين من المواضيع المطروحة، خصوصاً إن الجيل بتاعنا بيكبر معانا.
وعشان الجيل بتاعي بيكبر معايا لازم أكون محترمة جداً عقول القراء اللي في سني وفي جيلي واللي أكبر مني واللي بيتبعوني.
وكتاب "لكن لأمتي" بالنسبالي تجربة جديدة أوي لأن الحالة اللي مكتوبة حواليها قصائد حاجة مختلفة تماماً مش مجرد قصائد هي كلها إجابات على سؤال لكن لأمتى تجاه حاجات كتير جداً في حياتنا.
يعني بنسأل نفسنا دائماً لكن لأمتى لحلم، لكن لأمتى هستنى، لكن لحب، لكن لأمتى هستمر في علاقة، لكن لأمتى لحاجات كتير أوي، لكن الأهم إننا نعرف الإجابة على سؤال لكن لأمتى، وهنلاقي إجابة لكن لأمتى في آخر صفحة في الكتاب.
فديوان "لكن لأمتى" حالة مختلفة لأن كل القصايد بتدور حوالين محور واحد وهو الإجابة على سؤال لكن لأمتى، وهو حالة مختلفة أتمنى تنال إعجاب الناس وخصوصاً إنها أفضل مجموعة قصائد أنا كتبتها، لأني ارتقيت بمستوى الكتابة إلى حد كبير أوي ويارب ينال إعجاب الناس.
ديوان لكن لإمتى .. فكرته جاتلك منين؟
ديوان لكن لأمتى فكرته كانت في خيالي من زمان أوي لما يبقى إجابة على سؤال لكن لأمتى والأسئلة اللي بسألها لنفسي، يعني أنا بسأل نفسي كتير أوي لكن لأمتى هتفضلي مستمرة في الحلم ده، لكن لأمتى هتفضلي منتظرة النجاح، دايماً السؤال بيدور حوالين التوقيت إمتى ده هيحصل، إمتى هتبطلي تتعشمي في الناس، إمتى هتبطلي تنتظري الخير من علاقات مبتديش، إمتى هتنتظري المقابل من علاقات بتاخد بس.
فالسؤال لكن لأمتى دايماً في بالي، وعشان كده قررت أعمل مجموعة كاملة من القصايد بتدور حوالين الإجابة على سؤال لكن لأمتى تجاه كل شيء، تجاه العلاقات تجاه الأحلام وتجاه كل حاجة بتدور في حياتنا مستنيين توقيتها يجي.
ديوان لكن لإمتى .. أخد وقت قد إيه في كتابته؟
الديوان كتبته أخدت مني ٦ شهور.
إيه علاقة ديوان لكن لإمتى بأغنية سيد مكاوي؟
سيد مكاوي كان بيقول في أغنية متفوتنيش أنا وحدي كان بيقول فيها لكن لأمتى ياحبيبي إمتى نفضل حبايب ومش حبايب لحد إمتى.
وكان تسأل سيد مكاوي هو أهم شيء اقتبس منه اسم الديوان، لأنه كان بيتسأل هفضل لأمتى أنا وإنت حبايب ومش حبايب يعني ساعة شوق ومحبة وشهر بعاد وخصام، فهو بردو تساؤل.
وأنا كان بالنسبالي عايزة أخلي الديوان كله في اللمسة العتيقة القديمة حتى غلاف الديوان اختارت فيه كل حاجة ترجعنا للزمن لورا.
وتساؤل لكن لأمتى هو كله تساؤلات بنسألها من زمان، فالكتاب نفسه اسمه ماضي والغلاف بتاعه بيدور حوالين الماضي، التساؤلات اللي جوا فيه قصائد كتير مقتبسة من تساؤلات في أغاني زي الست لما كانت بتسأل ويفيد بايه العتاب في أغنية المعاد، فأنا عملت ديوان كامل اسمه يفيد بايه فقررت أن أنا أرد على تساؤل يفيد بايه في لكن لأمتى كمان، بالرغم من إن يفيد بايه رديت عليه في الديوان، الا أن ديوان لكن لإمتى بيرد على تساؤل هيفيد بايه الانتظار، هيفيد بايه الندم بعد ما الوقت هيكون فات.
لكن لإمتى هو حالة كلها بترجعنا للزمن لورا، وسيد مكاوي عشان أنا بحبه جداً فكان بالنسبالي تساؤله في الأغنية تساؤل مهم أوي، هنفضل لحد إمتى حبايب ومش حبايب هنفضل لحد إمتى اسمنا مع بعض ومش مع بعض هتفضل لحد إمتى بتخاصمني، فكان في تساؤل وفي قصيدة كاملة عن تساؤل سيد مكاوي لكن لإمتى في قصيدة كاملة جوا عن مضمون الأغنية وفيها رد عن لكن لإمتى.
إيه الإيجابيات اللي ممكن تقولي للقارئ أنه هيطلع بيها بعد ما يقرأ ديوان لكن لإمتى ؟
الإيجابيات كلها باذن الله ومتأكدة هتلاقي إجابة لسؤال لكن لإمتى اللي في خيالك لو إنت في بالك بتسأل سؤال لكن لإمتى عن حلم هتلاقي إجابة، لو إنت في خيالك بتسأل سؤال لكن لأمتى عن العلاقات هتلاقي إجابة، لو إنت في خيالك بتسأل سؤال عن أي شيء بيدور في حياتك هتلاقي إجابة.
الكتاب كله اجابات عن كل شيء إحنا مرينا بيه وهنمر بيه وبنمر بيه، والكتاب بالرغم من إن الحالة بتاعته بتدور حوالين الماضي لأن الكتاب نفسه في قصائد عتيقة جداً وكلها فيها لمسة من الزمن الجميل، الا أن كله هتلاقي في إجابات عن كل شيء.
الكتاب بالنسبالي حالة مختلفة لأنه في اجابات عن كل شيء ومش هخليك تخرج من الكتاب الا وانت معاك إجابتك على سؤالك.
إيه رأيك في مشاركة البلوجر بكتب في معرض الكتاب.. حتى لو مكنش عندهم موهبة سابقة أو حتى دراسة؟
مقدرش أحكم عل كتاب بلوجر في معرض الكتاب غير لما اقرأه، مينفعش أحكم عن شيء إلا لما أقرأه عشان أقدر أحكم بشكل فيه مهنية أكتر.
وادام اختار إنه يكون كاتب ويكتب أتمنى إنه يكون عنده الموهبة دي وأتمنى يكون عنده مهارة الكتابة ومهارة التعبير عن نفسه وعن الناس.
إنما أنا مقرأتش ولا كتاب لبلوجر فمقدرش أحكم غير لما اقرأ، والسنادي هجيب كتب لكام رمز نازلين عشان أشوف بيقولوا ايه ومقدرش أحكم غير بعد ما اقرأ لأنه ممكن يكون عامل حالة حلوة جداً، فمقدرش عشان هو بلوجر احصره في خانة البلوجر ممكن يكون كاتب وموهبته طلعت للنور بعد ما بقى بلوجر فمقدرش أحكم غير لما اقرأ الكتاب وأتمنى إنه يكون عندهم محتوى هادف يقدموه للناس وأتمنى إنه أي حد قرر يكتب ويمسك القلم يبقى قد القلم وقد الرسالة اللي هيقدمها ويفيد القراء ويقدم للكتابة ويقدم للقراءة ويقدم لمتذوقين الفن عموماً وربنا يوفق الجميع.
تفتكري أي حد عنده دار نشر تطبعله وتوزعله من حقه يعمل كتاب حتى لو مفتقد للمقاومات الأساسية؟
لو مفتقد المقاومات الأساسية للكتابة لو مفتقد الموهبة، فأنا محبش إنه ينزل غير لما يكون عنده الثقل في موهبته وإنه يقدر ينزل يقدم فن للناس، لأنه مادام شخص معروف ومشهور فهيكون مؤثر في فئة كبيرة من الشباب أو من الأطفال أو من اللي بيتبعوه.
ومادام مؤثر فلازم يبقى عنده ضمير في إنه يقدم كتاب، ومينفعش أقدم شيء وأنا مش قده علشان المتأثرين بيا، يا إما أفيدهم يا إما متكلمش خالص، يا إما أنزل أفيدك بحاجة يا إما منزلش.
حتى لو فيدتك على المستوى الفني، حتى لو فيدتك على أنك هتحس إنك مبسوط وإنت بتقرأ لأن في صياغة عالية، ممكن ميكنش فيه فكرة أو رسالة ولكن في صياغة عالية فكده أنت هتفيدني بأي شيء.
إنما أنا بطلب من أي حد قرر أنه يطبع كتاب وينزل يكون قد المسؤولية دي ويكون قد مسؤولية إنه بيقدم رسالة وإنه ليه متابعين وليه ناس متأثرة بيه، فلازم يحس إنه عليه مسؤولية لو إنت مش قدها متعملش ده علشان في ناس متأثرين بيك، إنت ممكن تضر فئة الكتاب كلها وتدي انطباع مش حلو للقارئ عن كل الكتاب لأنك مش قد الكتابة، وتدي انطباع مش حلو للجيل اللي لسه طالع اللي لسه بيقرألك أول مرة، فأنت مسؤول عن صورتك وعن صورة الكتابة وعن صورة الكتاب اللي إنت نازل وسطهم لأنك ليك متابعين، وعشان كده لازم تحسن صورة الفن اللي هتقدمه على قد ما تقدر ولو مش قده متنزلش ولما تكون قده إنزل وكلنا هنرحب بموهبتك وكل هندعم الموهبة لو هي حلوة، إنت بتقدم شيء حلو كلنا هنكون داعمين.
مفيش حد في الدنيا هيلاقي حاجة حلوة ويقول لا دي وحشة عشان بلوجر اللي كاتبها، مفيش حد ناضج هيعمل كده.
لو إنت بلوجر بس كاتب شاطر فأنت بالنسبالنا كاتب مؤثر بس تكون بتقدم فن حقيقي وتكون بتقدم شيء يستحق الثناء ويستحق المتابعة ويستحق القراءة ويستحق إنه يبقى في أيد الجيل اللي طالع ولازم تاخد بالك إن ليك متابعين من الأجيال الصغيرة فلازم يكون عندك واعي كافي باللي إنت بتقدمه ليهم لأن دي رسالتك لأن في أطفال كتير متأثرة بيك لازم تاخد بالك من ده.
