سلوى محمد علي: عادل إمام كان رافع شعار الضحك للضحك.. وهو ده الفن (خاص)
نفت الفنانة سلوى محمد علي ما تردد على عدد من المواقع الإخبارية بشأن أنها تقلل من قيمة أعمال الزعيم عادل إمام، إذ ترددت شائعات تفيد بأن الزعيم لم يقدم أعمالا ذات رسالة أو قيمة.
وحرص موقع الأيام المصرية على التواصل مع الفنانة سلوى محمد علي للرد على الشائعات التي ترددت.
سلوى محمد تؤكد على تقديرها للزعيم عادل إمام
قالت سلوى محمد علي في تصريحات خاصة لموقع الأيام المصرية، إنها لم تقصد أبدًا التقليل من قيمة أعمال الفنان عادل إمام، بل سعت لتأكيد وجهة نظرها أنه ليس من الضروري أن يقدم العمل رسالة، بل ربما يكون العمل الفني من أجل الامتاع فقط.
قائلة: عادل إمام مكنش بيدور في أي عمل على رسالة، الامتاع دي كلمة كبيرة أوي، ودور مخصص وهو قام به، وامتع الجمهور ولحد النهارده بيمتع الجمهور، وكلامي كان واضح في النقطة دي، للأسف سابوا كل كلامي وأخدوا الجزء اللي يبان هجومي، وده زعلني جدا لأني بحب عادل إمام جدا، وبعدين مين مبيحبش عادل إمام، يعني أنا بعرف قد ايه عندنا فنان عظيم ومكانته كبيرة لما الناس بتجري ورانا في البلاد العربية ويقولولنا سلمولنا على عادل إمام".
وأضافت سلوى محمد علي: الفن اللي بيقدم رسالة مش بيبقى دمه خفيف، لما تحطي قدام عنيكي رسالة وتحبي توصليها بيبقى الموضوع ثقيل الظل، ولو محطتيش رسالة فهتلاقي العمل لوحده فيه مليون رسالة، الامتاع وقتها بيبقى رسالة، هو ايه رسالة المزيكا ولا رسالة الفن التشكيلي غير الجمال والامتاع، فمعرفش فين المشكلة لما أقول إن فن عادل إمام للامتاع والضحك للضحك".
سلوى محمد علي: أرحب بالموهبة حتى لو أعمال بلطجة
أكدت سلوى محمد علي في تصريحاتها لموقع الأيام المصرية، أنها ليست ضد الأعمال الفنية التي ترصد أعمال البلطجة، وهذا يؤكد وجهة نظرها أن الفن ليس بالضرورة يكون ذات رسالة، فالفن للفن.
وقالت: أنا ولطفي لبيب مختلفين، هو بيقول إن الفن رسالة وأنا بقول إن الفن للامتاع، ومفيس رسالة، اللي يقدملي فن حلو أهلا بيه ويقدم مشهد متناغم وتمثيل حلو أنا تحت أمره أتفرج واتبسط، حتى لو دور بلطجي، ده احنا عندنا فيلم الفتوة من أهم أعمال صلاح أبو سيف وفريد شوقي، وأيضا أعمال نجيب محفوظ مثل الحرافيش قدمت بلطجة بس حبيناها المهم يتعمل حلو، اللي بيحصل إن أعمال البلطجة اللي بيقدموها حاليا الموضوع بيبقى مش معمول حلو، لكن اللي بيتعمل حلو بنتفرج عليه وبيعجبنا".
اضافت: مين اللي يقول على عمل فني حلو “هو الجمهور” يبقى خلاص اللي عليه إقبال يبقى ده كويس، وأنا بثق في ذوق الجمهور المصري، أنا اللي لازم أراجع نفسي، أنا عاجبه الجمهور ولا لا لو مش عجباه يبقى أدور على التقصير عندي، ولو الجمهور أعجب بعمل وأنا مش معجبة بيه يبقى لازم أعرف فين الغلط، ومش كلنا هنتفق على حاجة، ميزة الفن الاختلاف".
أعمال سلوى محمد علي
كشفت الفنانة سلوى محمد علي عن استعدادها للعمل على مشروع مسرحي مازال على الورق، مشيرة إلى أنها ستقوم على العمل عليه بعد موسم رمضان 2025.
كما أنها تقوم حاليا بتصوير دورها في مسلسل أشغال شقة 2، برفقة مجموعة كبيرة من الفنانين، منهم: أسماء جلال، هشام ماجد، وشيرين، وغيرهم من النجوم، والمقرر عرضه في رمضا 2025.