شريف الشعشاعي عن وتر حساس: بقدم تركيبة نفسية.. والناس بتهاجمني بشكل سئ | خاص
تألق الفنان الشاب شريف الشعشاعي في الأيام القليلة الماضية في أداء دور "عبد الرحمن" الذي يجسده في مسلسل "وتر حساس" الذي يعرض حالياً.
وتحدث شريف الشعشاعي في حوار خاص لـ "الأيام المصرية" عن تفاصيل شخصية "عبد الرحمن" وردود الفعل عليها، ووجه رسالة لمنتقدي دروه بمسلسل وتر حساس.
من رشحك لدور عبد الرحمن؟
المؤلف أمين جمال هو أول حد شافني في الدور ده، وبدأ يرشحني لأستاذ وائل المخرج والإنتاج والحمد لله حصل قبول.
ما الذي جذبك للدور؟
كل تفصيلة في الدور مهمة جداً، أي نعم الصدى كله دلوقتي شتيمة ده معناه إننا وصلنا للي إحنا عايزينه.
الدور كله أبعاد وتركيبات نفسية وكله زوايا في التحضيرات بتاعته كانت صعبة جداً وكله دوافع، وأنا بالنسبالي ده دور مهم جداً وتركيبة.
كيف قمت بالتحضير للشخصية خاصةً أن فيها عوامل نفسية وخيانة؟
خدنا وقت طويل وخدنا بروفات، وخدت من أول المسلسل لآخره عندي مزيكا خاصة وعندي حالة خاصة وعندي عزلة معينة أنا عاملها للشخصية واستحضرتها بشكل طويل.
على مدار 3 شهور أنا عايش في الشخصية دي بشكل معين، واخدت وقت طويل ومجهود كبير نفسي وكان ليه أثر عليا.
ماهو أصعب مشهد واجهت صعوبات فيه وأثر فيك نفسياً؟
أصعب مشهد واجهت صعوبة فيه هو في الحلقة 42 وده أصعب مشهد واجهت فيه صعوبات نفسية جداً، وخدت طويل على ما احضرله ومن قبلها كنت بحضرله من أول يوم في المسلسل، من أول ماخدت المسلسل وأنا بحضر للمشهد ده.
هل ترى أن دور عبد الرحمن يعد انطلاقة قوية لك في الفن؟
كل خطوة هي انطلاقة وكل خطوة لقدام هي تحقيق حاجة من الحلم، ومشوار الألف ميل يبدأ بخطوة.
وطبعاً أنا شايف إن هو انطلاقة كبيرة كان فيها انتشار واسع، أي نعم في ناس كتير منتقداه جداً بسبب الفعل اللي عمله، بس ده معناه نجاح مسلسل "وتر حساس" ونجاح العمل في إنه يطلع بالشكل ده.
من وجهة نظرك من الدافع القوي للخيانة الرجل أم المرأة؟
من وجهة نظري الإتنين، ده ممكن يبقى دافع كبير جداً وده ممكن يبقى دافع كبير جداً، هو مفيش حاجة حقيقية تبرر الخيانة استحالة.
بس أنا لو راجل أهملت الست بتاعتي بشكل كبير جداً هتقولي طلقني مش هتخوني بس هتقولي خلاص، ولو أنا ست أهملت جوزي طبيعي يحس مشاعر لحد تاني.
حسب كل إنسان نسبياً، لو أنا حسيت مشاعر تحسب خيانة ولا لا ده عامل نسبي طبعاً، لكن ده أو ده عليهم مسؤولية كبيرة سواء في الإلتزام أو الخيانة.
هل ترى أن طيبة البنت وسذاجتها سبب لأذيها ولا أم أن الشخص نفسه مؤذي؟
في كل الأحوال مش شرط إن ده يبقى مؤذي ولا نيته أذية بس السذاجة الزايدة بتؤدي لأماكن غلط.
يعني ممكن ميبقاش عندي النية إن أنا أذي واحدة خالص ومن كتر سذاجتها وقربها مني بمساحة كبيرة أوي غصب عني قلبي يحسلها مشاعر ده احتمال كبير جداً ووارد، والعكس صحيح ممكن يبقى راجل عادي وبيحترم صديقة وهي تاخد مساحة أكبر من مساحتها عنده في حياته لدرجة إنه يتأثر بيها.
فأنا شايف إنه مش شرط يبقى مؤذي، وممكن يحصل أذية من خلال مشاعر بتحصل.
من وجهة نظرك هل الحب يجعل الشخص يتسبب في أذى لمن يحبه لمجرد أنه مع شخص آخر؟
الحب ده أخطر سلاح في العالم، بيسبب الأذى وبيسبب الجرح اللي مالوش دوا، الحب ده أقوى وأصعب سلاح في العالم وهو السمة القوية.
في حاجة عندنا في الحياة إن القلب ده مالوش ذاكرة ولكن ليه ذاكرة ودي حاجة غريبة جداً، تبقى ناسية كل حاجة بس القلب يشوف الشخص يدق، فالقلب أو الحب عامة هو أقوى وأسرع سلاح في العالم.
ما هي الرسالة التي تود توجهيها لمن مثل عبد الرحمن؟
السذاجة والطيبة وأنك تبقى مسالم زيادة عن اللزوم مش هيخليك في أمان هيحطك في خطر.
الجبن أو أنك تبقى مسالم بشكل كبير أوي هتضطر يجي عليك أحمال زايدة لدرجة إنك هتبقى جبان عشان هتبقى مضطر تمشي أمورك عشان خايف تواجه.
فدي أخطر حاجة في العالم لازم تواجه حتى لو هتتأذي فترة لازم تواجه.
من وجهة نظرك هل حب المرأة للرجل ينقلب ضدها ويجعله يمل منها؟
لا مش الحب، هو إن الست متعرفش قيمة نفسها متبقاش بتحترم نفسها فبالتالي الراجل هي هتنزل من نظره وهيشوفها سهلة وبسيطة، لو ده حصل هيفقد احترامه ليها وهيفقد شغفه عليها.
التقل صنعة زي ما بيقولوا ولازم الست تبقى ذكية وحويطة، على ماقد مابحبك وبديك بس لازم طول الوقت تبقى عارف قيمتي ومينفعش تهيني وعادي، فأنا مقتنع إن الترمومتر ده في إيد الست
من وجهة نظرك هل الحب سبب أن الشخص يضع نفسه في مأزق؟
لا مفيش أي حاجة تخلي أي إنسان يفقد أعصابه ولا يقطع نفسه حتى لو كان الحب دي اسمها قلة عقل، طول ما أنت راجل لازم تبقى واعي وعارف أنت بتعمل ايه مفيش حاجة تهينك أو تمرمطك وتودي نفسك في داهية أي كان.
ماهي الاشياء التي تعد بمثابة وتر حساس لشريف الشعشاعي؟
الاحترام وإن الشخص يحترم نفسه، لازم تحترم نفسك والناس تحترمك إجباري، احترم نفسك بشكل كافي وده يخلي الناس تحترمك، وإنك تحترم الناس بشكل كافي بأنك متحطش نفسك في موقف يخليك مش محترم.
ده بالنسبالي الوتر الحساس إنه يبقى الاحترام هو أساس كل شيء في الحياة.
كيف ترى ردود الأفعال على المسلسل وعلى دورك؟
مفاجأة غير مسبوقة وغير طبيعية بالنسبالي، أنا اشتغلت كذا مسلسل ولكن وتر حساس شبه الصاروخ طلع لفوق بقوة.
النقد اللي على شخصية عبد الرحمن قوي جداً والتفاعل غير طبيعي، والتريند بتاع إنه عبد الرحمن زعل نص مصر ده مرعب الناس بتغلط في عبد الرحمن بشكل هجومي شديد، وبيجيلي رسائل فيها هجوم على عبد الرحمن بشكل كبير جداً لدرجة إن الناس مش شايفة إن أنا شريف.
الناس بتهاجمني بشكل سيء وبكلمات تقيلة وإني واطي ودمي تقيل ومنك لله، أنا رايح أعمل دور ياجماعة هو شكله دمه تقيل ولا ملزق ده نوع الشخصية، والناس بتحطها في شريف أوي ومضايقة من شريف عشان هو عمل عبد الرحمن.
هل ترى أن المسلسلات تأخذ حقها في المشاهدات خارج الموسم أم داخله؟
الإتنين كل واحد على حدا والناجح بينجح في أي وقت وتحت أي ظروف، والمسلسل الحلو وورقه حلو مكتوب صح وممثلين كويسين بيتشاف في أي وقت حتى لو متشافش في السيسزون ده هيتشاف بعدها بشوية وهيتشاد بيه مفيش عمل حلو مش بيتشاف، أنا مقتنع إن الفن بيبان لو فين.
هل في أعمال جديدة بتحضرلها؟
في فيلم بصوره ورجعت أكمله وكان واقف قبل وتر حساس والفترة الجاية إن شاء الله هعلن عن أبطال جديدة.
