هشام البنا لـ"الأيام المصرية": ممكن أوزع لعصام صاصا ودي رسالتي لشيرين عبد الوهاب
تألق الموزع الموسيقي ومهندس الصوت هشام البنا، مؤخرًا في مجموعة من الأعمال الغنائية، وكان نجاحه الأكبر في أغنية "ومعاك" للمطربة نداء شرارة والتي حققت نسب مشاهدات عالية، تصل لـ 50 مليون مشاهدة.
وتحدث هشام البنا في حوار خاص لـ "الأيام المصرية" عن تفاصيل تعاونه مع نداء شرارة وعمله المقبل مع المطرب محمد نور، ورسالته لشيرين عبد الوهاب كونها من وجهة نظرة صوت مصر.
ما الأصعب من وجهة نظر التوزيع الموسيقي أم هندسة الصوت؟
أنا شايف إن مفيش أي حاجة صعبة ممكن تتعمل في أي مجال، أهم حاجة الموهبة والممارسة تكون موجودة ثم الأدوات طبعاً والخبرة اللي بتساعد إن العمل يطلع بأفضل صورة.
ما هو الاختلاف بين الموزع الموسيقي ومهندس الصوت؟
الموزع الموسيقي هو المسؤول عن تحويل لحن الأغنية إلى عمل موسيقي متكامل بالقيام بتوزيع الآلات والإيقاعات الموسيقية المناسبة للحن والقيام أيضا بتأليف الفواصل الموسيقية لهذا اللحن ثم تقديم ملف موسيقى جاهز للتسجيل، أما مهندس الصوت فهو المسؤول عن تسجيل الأصوات وتعديلها ودمجها لتحقيق أفضل جودة صوتية، وفي بعض الحالات قد يجمع شخص واحد بين الدورين إذا كانت لديه مهارات في المجالين.
ما الذي يمكن إلغاءه التوزيع الموسيقي أم هندسة الصوت؟
مينفعش نلغي أي حاجة منهم عشان الاتنين بيكملوا بعض، يعني مش هيبقى في أغنية ببساطة.
هل من الممكن أن تقوم بعمل توزيع موسيقي لأغاني مهرجانات؟
مدخلتش في تجربة زي كده بصراحة بس أنا بحب أسمع كل أنواع الموسيقى وبحب الاختلاف جدًا، وشايف برضو إن كل واحد بيكون حلو في الحتة بتاعته وأغاني المهرجانات فيها الموزعين بتوعها اللي بيعرفوا يعملوا التوليفة اللي بتبسط الناس.
من مِن مطربين المهرجانات تود عمل توزيع موسيقي له؟
ممكن عصام صاصا بحب صوته.
ما هو اللون الغنائي الذي تفضله؟
أنا عملت بالفعل ألوان كتير وشايف إن الموزع الموسيقي لازم يبقى ليه كذا لون ويبعد عن فخ اختيار نفس الأصوات الموسيقية بس أنا عن نفسي بفضل اللون الدرامي والرومانسي في التوزيع.
من هو أكثر مطرب ارتحت معه في التعامل؟
يعنى بنسبة كبيرة كل اللي اشتغلت معاهم الحمد لله كنت مرتاح معاهم عشان كده الأغاني بتتطلع حلوة، لو مفيش راحة في التعامل فده بيأثر بالسلب على الأغنية ومبتتطلعش بالروح المطلوبة، فمهم جدًا التعامل يكون كويس بين التيم وورك والمطرب بشكل عام.
حدثنا عن كواليس أغنية ومعاك لنداء شرارة والنجاح الذي حققته؟
نداء شرارة لم تغني الطابع الرومانسي منذ فترة طويلة، لذلك أرسل لها الملحن الكبير عمرو الشاذلي وتم تنفيذها بعد أن صنعنا لها شكلًا موسيقيًا، وبالفعل نالت إعجابها وبدأنا في العمل عليها.
ما هي تفاصيل العمل الجديد الذي تستعد له مع محمد نور؟
تم الانتهاء من عمل أغنية باسم "رجوع مفيش" للفنان الكبير محمد نور هتنزل قريب جدًا انتظروها وبإذن الله تعجبكم.
ما هي الرسالة التي تود أن توجهها لشيرين عبد الوهاب؟
عايز أقول لشيرين أنا بحبك وبحب صوتك أوي يلا ارجعلينا ومعايا أغاني كتير حلوة مينفعش حد غيرك يغنيها.
تود أن تتعامل مع من مِن المطربين؟
أكيد مطربين ونجوم كتير وبسعى دائمًا أنا والتيم وورك اللي معايا إن ده يحصل وهيحصل بإذن الله.
من وجهة نظرك من هو "نمبر وان" الغناء؟
اعتقد بقالنا فترة بقى صعب جدًا نحسب المعادلة دي خاصة ظهور أشكال وأصوات موسيقية جديدة وبيحتلوا المرتبة الأولى على المنصات، ومتغيرات السوق ممكن تخلي حد نمبر وان وبعديه بشوية يجى حد مكانه، بس شايف نمبر وان اللي يقدر يكون دائمًا قريب للناس والشارع.
من هي صوت مصر من وجهة نظرك؟
ستظل شيرين عبد الوهاب بالنسبالي هي صوت مصر.
