خالد الصاوي : كنت بتسرمح كتير ومراتي لو مخدتش إجابة مباشرة بتبقى اللية طين
كشف الفنان خالد الصاوي عن تعاطيه المخدرات في فترة من حياته، مشيرا إلى أنه تعرض لعيش أصعب 4 دقائق في حياته كلها، ولم يعش مثلها أبدا.
خالد الصاوي يكشف عن تعاطيه مواد مخدرة
وقال خالد الصاوي في تصريحاته ببرنامج كلام الناس مع الإعلامية ياسمين عز، عبر قناة إم بي سي مصر، أنه كان يتعاطي المواد المخدرة، حتى تعرض لـ 4 دقائق، وصفها بأنها من أصعب اللحظات في حياته.
وتابع: كنت بشرب وبتعاطى حاجات، وكنت متخيل بقى إني مسيطر على حياتي وعلى كل حاجة، لحد ما في مرة تعبت جدا واتضايقت من نفسي جدا، لحد ما حسيت إن الموضوع بدأ يأثر على صحتي وعلى شغلي".
وتابع: المهم آخر مرة شربت جامد، وفي لحظة حسيت إن قلبي هيخرج بره صدري، فدخلت السرير بحاول أنام مش قادر، وعدى عليا 4 ساعات بحاول أنام، ومش عارف، فرفعت وشي للسما ودعيت ربنا وقولتله أرجوك يارب طلعني من الحالة دي وأنا أوعدك مش هارجع للحالة دي تاني".
وأضاف: ممكن تغلطي مرة أو اتنين لكن بتفضلي محافظة على حياتك، ونمت 4 دقايق وقمت بعدها نشيط جدا وجريت حرقت كل حاجة، وصليت واستمريت على الصراط كده 4 شهور، وبعدين رجعت غلطت بس وكأني كنت بقرأ نفسي اللي فاتت، فعادة بتبقى غلطة مرة كده أو كام مرة وخلاص بتنتهي الحكاية.
تصريحات خالد الصاوي عن زوجته
تحدث الفنان خالد الصاوي عن علاقته بزوجته، معلنا رأيه في دور المرأة في حياة الرجل وأيضا دور الرجل في حياة المرأة، على هامش لقاءه مع الإعلامية ياسمين عز في برنامج كلام الناس.
وقال: الرجل مسئول عن الأمان والمرأة مسئولة عن الحنان، طبعا لازم تتوافر الصفتين في كل طرف، بس الست هي دايما اللي بتمسك البيت بحنانها، واللي يقدر يحاوط الأسرة الراجل بالأمان".
وتابع: زمان عيشت كتير قصص سرمحة، فلما ارتبطت بمراتي قعدنا سنتين قبل الجواز، أول سنة قضيتها بالطول والعرض، بس السنة التانية قررت إني لا لازم أوصلها للأمان اللي بتكلم عنه، وقطعت علاقتي تماما بحياتي اللي فاتت، وتعمدت إني أعزم صديقاتي وأصدقائي مرة كده أو اتنين ورا بعض، علشان أعرفها حياتي ماشية ازاي وتبقى شايفة الدنيا حواليا، علشان محدش يقولها حاجة في ودانها، وهي عاقلة فكان لازم أقولها كل حاجة".
واضاف: مرة كنت متفق على معاد مع ممثلة في المكتب عندي، واتأخرت على الميعاد، لحد ما كل الناس مشيت ومبقاش فيه حد في المكتب غيري، فاتصلت بمراتي وقولتها فلانة هتبقى موجودة، فتعالي هتتبسطي ونقعد شوية وقعدت معانا شوية وبعدين لاقيتها بتستأذن علشان نعرف نشتغل، فالممثلة ارتبكت كده وقالتلها ليه خليكي معانا، قالتلها اقعد ايه ده الوحش ده هيعمل بروفة دلوقتي مش هتعرفي تنفدي منها".
واستطرد: الزميلة دي بعد ما مراتي مشيت بقولي ده انت مراتك واثقة في نفسها أوي، فقولتلها لا دي واثقة فيا أنا، فالحقيقة مراتي عمرها ما دورت ورايا، ولا فتشت في حاجة تخصني، لما بتحتاج تعرف حاجة بتساءل مباشرة ولو مخدتش إجابة مباشرة بتبقى اللية طين".
