«كان لقمة في الزور ولا مجرد لعبة بريموت».. هل حسن نصر الله بطل شعبي؟
هل حسن نصر الله بطل شعبي؟ علق البعض من مستخدمي مواقع التواصل الاجتماعي على اغتيال الأمين العام لحزب الله اللبناني حسن نصر الله، واصفين إياه بأنه “زي اللقمة في الزور” بالنسبة للاحتلال الإسرائيلي طوال فترة قيادته للحزب.
ليعلق الكاتب الصحفي محمد صلاح عبر صفحته على موقع التواصل الاجتماعي قائلًا :" والله يا افندم الأهم من أني أقف لقمة في زور عدوي اني اوجعه ، مفضلش واقف لقمة كده وخلاص خصوصاً لو الوقفة دي لم تمنعه من طفح المكاسب والمصالح وتحقيق أهدافه".
ويضيف الكاتب محمد صلاح أنه من المهم أن يكون متأكدًا من أن عندما يقف في وجهه، لا يحقق للاحتلال الإسرائيلي أهدافًا مجانية ولا يخلق له صراعات طائفية تفيده ولا تعود عليه بأي شيء، مضيفًا أنه يجب أن يكون مدعومًا بمجهوده وماله وسلاحه، وليس بموارد الآخرين، حتى لا يتمكن أي شخص من استغلاله أو التجارة به لمصلحته.
محمد صلاح : مفهوم المكسب والخسارة لازم يتغير
ويوضح محمد صلاح قائلاً : “ مفهوم المكسب والخسارة في حياتنا لازم يتغير، الصراع ده صراع غير نمطي بالأهداف مش صراع نمطي بنظام العاركة في خمارة ، رؤيتنا للموضوع لازم تتغير علشان نفهم ، فلما نفهم هنعرف أن محدش واقف للكيان ده غير مصر ، ومفيش حد في المنطقة مفرمل مخططات أمريكا ولا الكيان الإسرائيلي غير مصر”.
ويكمل صلاح عبر منشوره عبر الفيسبوك “ : من غير مصر كان زمان خطة كوندوليزا رايس القائمة على نشر الفوضى عن طريق وصول شوية صيع وعواطلية للسلطة نجحت ، وكان زمان خريطة أوباما السنية الشيعية اللي بتقاسم فيها تركيا وإيران دول الشرق الأوسط اتطبقت، وكان زمان صفقة القرن بتاعة ترامب اتنفذت”.
ويشير الكاتب الصحفي محمد صلاح قائلًا :" هو أنا لازم اقعد في الشارع اشتم وأقل أدبي واضرب اللي رايح واللي جاي بالطوب وأخلي العالم كله لما أتضرب يقول يستاهل ده قليل الأدب علشان أعجب حضرتك وابقى في نظر معاليك وطني ومش عميل؟!!"
محمد صلاح : محدش واقف للكيان الإسرائيلي غير مصر
ويتابع :" مفيش حد يقدر يقف للكيان الإسرائيلي ولا اللي وراه في المنطقة دي كلها غير مصر ، والعالم كله عارف كده ، وحسن ذات نفسه كان عارف كده ، واللي مشغلين حسن عارفين كده ، انتوا بس اللي مش عارفين مع الأسف ".
ويردف الكاتب محمد صلاح في منشوره :" أنتوا زعلانين على حسن نصر الله علشان عندكم فوضى في تقييم المواقف السياسية ، فوضى في مشاعركم حتى تجاه أقرب الناس اللي حواليكم ، فوضى في الإدراك والتمييز حتى في حياتكم مش في السياسة وبس ، فتلاقيكم بتحبوا اللي يكرهكم وتبعدوا عن اللي بيحبكم ، بتحبوا اللي يضحككم ويضحك عليكم مش اللي يبكيكم ويبكي عليكم.
ويختم محمد صلاح في منشوره عبر فيس بوك :" ده حقكم في حياتكم انتوا حرين ، انما بعد اذنكم الفوضى اللي جواكم دي تبعدوها عن مصر ، المازوخية اللي فيكم دي تمتعوا بيها بعيد عننا ، احنا عايزين نكمل طريقنا ونحقق أهدافنا ونعطل أهداف الخصم بكل شياكة ، بنحارب واحنا بنسمع أغاني ونلعب كورة ونتفسح ونحتفل ونضحك ، احنا بنحب الحياة وثقافتنا ثقافة حياة، عمرها ما هتبقى ثقافة موت مهما حصل ".
محمد صلاح يرد على المتشائمين: الجو ريحته هزيمة للي اعتمد على غيره
في سياق آخر أكد الكاتب الصحفي محمد صلاح معلقا على المتشائمين قائلاً :"الجو ريحته هزيمة للي اعتمد على غيره في بناء ذاته وتأمين نفسه وحماية أهله ، إنما اللي اعتمد على نفسه وذاكر وخطط صح عمره ما يشعر بالهزيمة".
وأضاف محمد صلاح عبر منشور آخر :"الشخصيات الاعتمادية عيبها كده ، أي حاجة تحصل معاهم يركبهم عفريت وتبقى نهاية العالم ، يركبهم الرعب ، لكن اللي بيعتمد على نفسه بيتحدى ويواجه ويكمل وينتصر ويخش ع التحدي اللي بعده.
وتابع :"ده اللي غلبنا نقوله من 2011 ، جيشنا خط أحمر، أمننا القومي محدش يفكر يقرب منه ، الشأن الداخلي محدش من برا مصر يفتح بوقه فيه ، إحنا النهاردة مطمئنين لسبب واحد بس ، أننا كنا شايفين المشهد من 2011 وبندور على مركب ينجي بلدنا وناسها من الطوفان ، لا كنا بنضحك عليكم ولا بنشتغلكم ".
وأضاف مختتمًا :" اللي حاسس بالهزيمة النهاردة هو اللي كان رافض يفكر او يقتنع ، بالعكس كان بيهد فينا وبيقطعنا حتت ، ريحة الهزيمة دي من جواك وسببها انك مش فاهم من الاول ، اكتشفت انك ضحية لعملية نصب فكري وسياسي ممتدة معاك لحد النهاردة مش بسبب موت حسن خالص".
