أبطال لام شمسية مع لميس الحديدي.. أحمد السعدني: أنا ضد التصنيف العمري للمسلسلات (فيديو)
أبطال لام شمسية مع لميس الحديدي .. حل أبطال مسلسل لام شمسية ضيوف في برنامج كلمة أخيرة مع الإعلامية لميس الحديدي، وكشفوا خلال الحلقة عن رأيهم في التصنيف العمري للمسلسل، حيث رأى البعض أنه من الأفضل أن يتابع المسلسل كل الأطفال ليكون بمثابة توعية لهم.
أبطال لام شمسية مع لميس الحديدي .. كل طفل المفروض نوعيه حسب سنه
رفضت الفنانة يسرا اللوزي مشاهدة الأطفال للمسلسل حيث قالت: لا أولادي مش المفروض يتفرجوا، هو كل واحد حسب سنة، بس أنا بخاطب بناتي حسب سنهم في النقطة دي بس مش المفروض يتفرجوا، وأنا بوعيهم من قبل اصلا المسلسل يعني أنا متابعه سارة عزيز من زمان فبخاطب كل واحد حسب استيعابه وبحاول اوعيهم على قد ما أقدر.
وتابع المخرج كريم الشناوي: احنا احترمنا السن إللي الرقابة شافته بس أنا رأيي الشخصي أنه كان ينفع جدا ولاد من 14 سنة ومن 13 سنة، خصوصًا إن سن المراهقة نفسه أتغير بقى من 11 سنة فصعب إني أقول من 16 سنة متكلمنيش في ده، لكن في النهايه الحمد لله المسلسل خلص كله بدون ولا ملحوظة رقابيه وده علامة صحية جدا بس في الأخر زي ما الرقابه ساعدتني جدا إن المسلسل يطلع زي ما أحنا كنا شايفينه، زي ما أحنا احترمنا قرارهم في التصنيف العمري بس يعني رأيي الشخصي مختلف.
أحمد السعدني: أنا ضد التصنيف العمري
وأكد الفنان أحمد السعدني أنه ضد التصنيف العمري لهذا العمل، وقال: أنا ضد تماما التصنيف العمري والكلام ده لأنه دلوقتي انا ابني ده بيدخل على أي حاجة، وبالعكس ده موضوع مهم يعني أنا ابني الكبير أنا قعدت معاه أنا فاكر اليوم ده كويس على قهوه كان 13 أو 14 سنة كده، وقعدت كلمته في كل حاجه مش بس في موضوع التحرش ده في أي افكار أو أي تصرفات غلط، لكن الصغير أنا قعدته اتفرج معايا على المسلسل وحبيبي مش فاهم و يسألني هو إيه إللي حصل فأقوله حصل كذا، واشرح له فهو أنا كنت مع أنه مثلا يتقال أنه بإشراف عائلي إنما فكرة أنه محدش يتفرج دي لا هما بيتفرجوا على الإنترنت وبيشوفوا كل حاجة وفي حاجات أصعب من كده.
أمينة خليل: أصعب حاجة خلال المسلسل إني حاولت أفهم نيللي حاسة بإيه
وأوضحت الفنانة أمينة خليل أن أصعب ما واجهته خلال مسلسل لام شمسية قائله: يمكن من اصعب الحاجات إللي أنا كنت بحاول افهمها في خلال رحلة المسلسل، إني كنت بحاول أفهم هي حاسه بايه، أنه المشاعر إللي بتحسها هي إللي هتديني أقصى درجة صدق، يعني مشاعر الأمومه يعني أنا مش أم، بس أنا لازم أحس كل المشاهد إن أنا ام جدًا، وكمان لازم أحس التجربه السابقه إللي حصلتلها وهي صغيرة.
