تامر حسني عن اعتزال محمد سامي: المخرج الوحيد في تاريخ مصر اللي مفشلش

علّق الفنان تامر حسنى على قرار اعتزال المخرج محمد سامي خلال الساعات الماضية واصفا سامي بأنه المخرج الوحيد في تاريخ مصر الذي لم يفشل .

تضمن تعليق  تامر حسنى على قرار اعتزال محمد سامي رسالة قال فيها :"أوعى تكون عايز تبعد عشان أي إحباط جايز يكون فعلاً في بعض المشاهد اللي الناس إنتقدتها و أنا شخصياً إستغربتها شويه و قولت جوايا أنك مش محتاج تعملها أصلاً لأن عندك الحقيقي والأهم .

 وأضاف :"على رأيك الفنون جنون أحياناً فكره مجنونه تنال الإعجاب و فكره لأ … بس ده ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مره و يمكن الحظ محالفكش أوي في عمل ولا ٢ على مدار ١٤ سنه و دي حاجه مينفعش الجمهور ينساهالك".

 تامر حسني : هزعل منك لو هتمشي محبط و أنت أنجح حد

 وأكمل:" انت قدمت مسلسل آدم اللي جمع كل المصريين و كل الوطن العربي يتفرجوا عليه زي ماتشات الكوره بسبب أنه أتكلم عن قضية تخص كل الوطن و  كان بدايه لصوره جديده أول مره كانت بتتقدم في مصر و بعدها سبق الإصرار و حكاية حياه اللي كانوا نقله كبيره في ديكورات الدراما المصريه و بعدين الأسطوره و البرنس و جعفر العمده اللي حققوا نجاحات ساحقه و كانوا أعلى نسبة مشاهدات في الدراما بشكل عام و بعدهم نعمة الأڤوكاتو و إش إش و سيد الناس اللي برضو كل واحد فيهم يا أعلى مشاهده يا تاني أعلى مشاهده  هزعل منك لو هتمشي محبط و أنت أنجح حد .

تامر حسني لـ محمد سامي: سافر و كمل حلمك و أنت منتصر بتاريخك

واضاف تامر حسني :" الشجره الخضراء  الجميله ساعات بيطلعلها  ورق أصفر بسيط عادي بيتقص و بتفضل شجره كبيره و جميله و ده التطوير الطبيعي للبني آدم و اللي بيمر بيه أي ناجح بيطور و عنده شخصيه بدليل مسلسلاتك بيتقال عليها مسلسلات محمد سامي   و تركيز الناس معاك دليل على حبهم لأعمالك و رغم إن بعضهم بينتقدوها بس متابعينها حرف حرف  و نقدهم ليك بيبقى على قد حجمك  و هي دي ضريبة الناجحين الكبار  … سافر و كمل حلمك و أنت منتصر بتاريخك و أوعى تُحبط و أنا عارف إن محمد سامي اللي أكتشفته أنا و قدمته للصناعه و هو عنده ٢٧ سنه لايمكن هيتهز  ممكن يزعل يومين و يراجع نفسه في مشاهد أنا مبسوط منك أنك بمنتهى الشجاعه الأدبيه أعتذرت على تقديمها  خد راحه شويه و إرجع أقوى من الأول و أنا واثق من اللي هتسافر عشانه أنه قرار هيضيف نقله كبيره لمشوارك ..

 تامر حسني لـ محمد سامي: أوعى تخلي الزعل من بعض المشاهد ينسيك أنت قدمت ايه للدراما 

وختم تامر حسني رسالته لـ محمد سامي :"أوعى تخلي الزعل من بعض المشاهد ينسيك أنت قدمت ايه للدراما  ياريت قبل ما نقسوا على سامي بالطريقه دي نفتكر هو أمتعنا سنين قد ايه بمسلسلاته و أنا ذكرتها كلها عشان لو حد ناسي أفكره  و عشان لو هو محبط يجمد تاني    ربنا ينور طريقك و ترجع أقوى و أقوى من أي وقت  واثق فيك يا حبيبي 💪🤲🫶 و أنا هفضل أخوك الكبير و في ضهرك إن شاء الله طول العمر يا بطل ".