سلوى عثمان: انبسطت جدًا من تكريم انتصار السيسي واللي فرحني إنها متبعاني| خاص

احتفلت السيدة انتصار السيسي، قرينة رئيس الجمهورية، مع عدد من السيدات الملهمات خلال احتفالية المرأة المصرية أيقونة النجاح، حيث جاءت الفنانة سلوى عثمان ضمن قائمة السيدات المكرمة في الاحتفال.

وكان لموقع الأيام المصرية تصريح خاص من الفنانة سلوى عثمان تعبر من خلاله عن شعورها بعد تكريمها من السيدة انتصار السيسي، قائلةً: "والله شعوري بعد تكريمي من السيدة انتصار السيسي إن أنا سعيدة جدا جدا إن أنا قابلتها وإن هي اديتني التكريم وسعيدة بأن هي متابعة شغلي واختارني عشان اتكرم في الاحتفالية دي".

سلوى عثمان:  اسعدني ان السيدة انتصار السيسي بتقول انها متابعة شغلي

 وتابعت سلوى، "وأسعدني أكثر يعني مقابلتي ليها بصراحة لأن هي ست جميلة جدا جدا بشوشة ووشها مريح ودودة بسيطة معندهاش تكلف وبتحب اللي قدامها وبعدين كلمتها إنها متابعاني وبتحب شغلي وكده بصراحة أكثر حاجة اسعدتني يعني التكريم اسعدني اه بس كلامها كمان أكثر أسعدني لما بتقول ان هي متابعة شغلي وحابة الشغل اللي أنا بعمله في ده كان بالنسبة لي تكريم في حد ذاته ومش قادره أقول أنا سعيدة قد إيه".

وأردفت سلوى، "كان في تكريم كان لسيدات أخريات كثير طبعا وفيهم ناس عاملين بردو حاجات هايلة لبلدهم ويعني ستات تحس أن هما بيحاولوا يفيدوا البلد فعلا بشغلهم ومجهودهم وكده فكان في أسماء موجودة فهي اختارت اسمي من الفنانين أو الفنانات طبعا عشان دي للمرأة يوم المرأة العالمي أو اليوم العالمي للمرأة فهي اختارتني عشان التكريم وده اسعدني جدا جدا جدا يعني ان هي اختارتني عشان تكرمني واسعدني ان هي متابعة شغلي وعاجبها شغلي فطبعا دي حاجه فرحتني اوي اوي".

سلوى عثمان: المرأة المصرية هي نص المجتمع وشايلة كتير اوي

وعن الأعمال التي رصدت مشاكل المرأة المصرية، أضافت سلوى: "وطبعا في أعمال كثير اتعملت عشان ترصد مشاكل المرأة المصرية وفي حاجات فيها إنك أنت تبقى قدوة انك ازاي مثلا تقدر تحل مشكلة أو تدي بعض الحلول أو كده فطبعا الدراما المصرية مهتمة جدا جدا بالمرأة المصرية يعني ده لازم يكون كده لأنه المرأة المصرية هي نص المجتمع بس بردو شايلة كثير قوي قوي في المجتمع شايلة ولادها وشايلة حياتها وعملها والكلام ده كله فطبعا اكيد الدراما المصرية بتحاول ترصد كل مشاكل المرأة".

سلوى عثمان: السيدة فردوس محمد القدوة بتاعتي في شغلي

وعبرت الفنانة سلوى عثمان عن رأيها في الفنانة التي نجحت في تجسيد دور الأم المصرية، قائلة: "أنا في رأيي اللي نجحت في تجسيد دور الأم المصرية طبعا زمان كانت السيدة فردوس محمد يعني أنا دي القدوة بتاعتي في شغلي لأن هي كانت ست عندها ست عندها صدق كبير جدا جدا في أحاسيسها وفي توصيلها لدور الأم فكانت بتوصله بمنتهى الصدق وبمنتهى يعني إن حاجة تحس إنها أم حقيقية فعلا وكمان كنت بحب كريمة مختار بردو في دول بالنسبة لي يعني القدوة اللي أنا كنت بتفرج عليها".

وعن سؤالها عن الأعمال التي تتابعها في رمضان 2025، أضافت: "أنا لسه ملحقتش اتابع مسلسلات اوي لأن أنا طبعا لسه بشتغل لغاية النهاردة لغاية الوقت اللي أنا بتكلم فيه ده فلسه بتابع لسه ملحقتش أتابع حاجة ويا دوبك بس الواحد يعني يحفظ شغله ويخش يشتغله يعني وربنا معانا ونخلص على ألف خير لكن طبعا بعد ما أخلص اكيد هبتدي اتفرج على مسلسلات".

وأكدت على سعادتها بمشاركتها في رمضان 2025 بمسلسل حكيم باشا وسيد الناس، قائلة: "بس أنا سعيدة إن أنا بعمل سيد الناس وسعيدة إني بعمل كمان حكيم باشا لأنه حكيم باشا شخصية مختلفة عن شخصية سيد الناس خالص فده باسطني إن أنا بعمل عملين السنادي كل واحد فيهم شكل غير الثاني".

وعن سلسلة الهجوم والانتقادات التي تعرض إليها مسلسل إش إش، قالت: "والله هو التعليق يبقى للجمهور لأنه الناس كلها بتشتغل وبتقدم شغلها للجمهور فأنا محبش اتدخل بين الجمهور في رأيه وبين جهد أو جهود اللي بيعملوها زملائي عشان يحاولوا يطلعوا حاجة تسعد المشاهدين فالرأي دائما يكون للجمهور يبقى مباشر ما بينه وما بين كل الفنانين وكل المسلسلات وهو اللي بيقول رايه".