ترتيب مسلسلات رمضان 2025 .. ماجدة خير الله : متحمسة لـ ولاد الشمس (خاص)
ترتيب مسلسلات رمضان 2025 .. كشفت المؤشرات الأولية عن المسلسلات الأكثر مشاهدة في رمضان 2025 حتى الآن، حيث حصلت هذه الأعمال على نسبة مشاهدات عالية خلال الأسبوع الأول من شهر رمضان.
ترتيب مسلسلات رمضان 2025
أعلنت منصة شاهد على ترتيب مسلسلات رمضان 2025، حيث جاء في المقدمة مسلسل فهد البطل، حيث تخطى 500 ألف في الأسبوع الأول، ويأتي مسلسل سيد الناس في المرتبة الثانية حيث تخطى 200 ألف مشاهدة.
ويحتل مسلسل المداح المرتبة الثالثة حيث حصل على أكثر من 200 ألف مشاهدة، وحصل مسلسل أشغال شقة جدًا على نسبة مشاهدات عالية في الأسبوع الأول من شهر رمضان.
ماجدة خير الله: مسلسل الكابتن أقل بكثير من مسلسل بابا جه
وكشفت الناقدة الفنية ماجدة خير الله عن رأيها في مسلسلات رمضان 2025، حيث قالت في تصريح خاص لموقع الأيام المصرية عن مسلسل الكابتن: "الكابتن أقل بكتير من مسلسل بابا جه، لأن فكرته هابطة، لأن أنت عندك واحد وطلعلوا أرواح محدش بيشوفها إلا هو، دي حاجة اتعملت أيام إسماعيل ياسين إللي طلعلوا عفريت ومبقاش عارف يعمل معاه إيه، ففكرة العفريت إللي هو 6 عفاريت بيلاحقوه دي مفيهاش إبداع ، يعني كل الحلقات حتى الأن مفيهاش إبداع ولا فيها حاجة جديدة غير إن هو عايز يصرفهم".
ماجدة خير الله: قلبي ومفتاحه فيه شغل كثير رغم إن الحدوتة تتلخص في سطر واحد
وتابعت ماجدة خير الله عن رأيها في مسلسل قلبي ومفتاحه: "أكتر مسلسل عجبني حتى الآن هو قلبي ومفتاحه، لأن فيه شغل كتير حلو، لأن الحدوتة مش هي نمرة واحد، الحدوتة بتتلخص في سطر وهي إن واحد طلق مراته ثلاث مرات وعشان يرجعلها بيدور على محلل وهو رجل غليظ الإحساس وحاطط قبضته عليها، فهي راحت أتجوزت واحد لمدة يوم واحد ومحصلش بينهم حاجة".
وأضافت ماجدة خير الله: "وبالنسبة لحال الرجل البريء إللي كل ذنبه إنه أعجب بهذه المراة واتجوزها فعلًا بدون ما يعرف كل الخلفيات إللي أحنا بنحكي عنها دي، ومسألة ازاي واحد يشتري انسان بفلوسه وبسلطته ويسيطر عليه ويا تحبيني يا هبهدلك زي ما بيحصل في الواقع دلوقتي إن واحد يقتل واحدة عشان مش عايزة تستمر معاه".
وأستأنفت حديثها: "في بقى مليون ألف خط في الموضوع ممتع جدًا، وأداء الممثلين والمشاهد والمواقف وفي مخرج وفي أحداث وفي سيناريو بس التايتل الأساسي إللي ممكن تلخص الحدوته إللي اتعملت بكل ما فيها من أحداث كان السطر بتاعها إللي هو الطلاق الشفوي، مناقشة فكرة الطلاق الشفوي ده إللي تقدر تخرج منه من المسلسل بقى بأحداثه، أتمنى إن المسلسل يكون عودة قوية لـ مي عز الدين لأنها معاها مخرج مهم وهو تامر محسن ومعها نص جيد وشخصية مرسومة كويس طبعا"
ماجدة خير الله: أحمد أمين أفضل ممثل كوميدي
وأكدت الناقدة ماجدة خير الله أن: "أفضل ممثل كوميدي هو أحمد أمين لأنه محافظ على مستواه بالعكس كل مدة بيضيف لنفسه نجاحات جديدة، وبالنسبة للتراجيدي في كثير جدًا يعني محمود حميدة هايل وآسر ياسين هايل، حتى إللي لعبوا أدوار صغيرة لا في ممثلين وممثلات كويسين جدًا يعني في أخواتي الأربع ممثلات هايلين وحتى إللي لعبوا أدوار صغيره زي محمد ممدوح كان هايل في الجزء إللي طلع فيه".
ماجدة خير الله: متحمسة لمسلسل ولاد الشمس
وكشفت ماجدة خير الله عن تحمسها لعدد من المسلسلات حيث قالت: "متحمسة لمسلسل النص ومتحمسة لـ ولاد الشمس هايل وكمان بيصعد نجوم شباب، يعني البطولة المطلقة لإتنين شباب، وده إتجاه كويس جدًا لأن خلاص بقى لازم يبقى في جيل جديد هو إللي يأخد المساحة، مش هنفضل طول عمرنا في الأربعة خمسة ستة إللي نعرفهم من زمان بقالنا 30 سنة، لازم يحصل إحلال وتجديد في النجوم"
