ماجدة خير الله: مسسلسل اش اش مفيهوش عري وأحمد العوضي معملش لياسمين تاريخ ومحمد هنيدي ميستاهلش| خاص

مسلسلات رمضان 2025 مصر .. يمتلئ الموسم الرمضاني الحالي 2025 بالعديد من الأعمال الدرامية التي نالت إعجاب المشاهدين، وكان لموقع الأيام المصرية حوار خاص مع الناقدة ماجدة خيرالله تكشف من خلاله عن رؤيتها الفنية للأعمال الدرامية 2025 : 

وتسيطر المسلسلات الشعبية على موسم السباق الرمضاني 2025، وعلقت الناقدة ماجدة خير الله قائلة: "أنا مبحبش الأعمال الشعبية الميلو دراما اللي زي العتاولة وسيد الناس، يعني كم الميلو دراما ده منهج قديم جدًا، طبعًا هو بينفع مع شريحة معينة من الجمهور، وللأسف هي كتيرة، لكن هو نوع قديم".

وتابعت ماجدة خير الله خير تصريحات خاصة لـ "الأيام المصرية": "احنا بنسخر من السينما الهندية وبيقولوا ده فيلم هندي هو إيه مشكلة السينما الهندية وفيها رقص بردو ؟، إن السينما الهندية كانت زمان بتعتمد على المبالغات الشديدة اللي هي بيقال عليها الميلو دراما في المدرسة دي المفروض إنها انتهت يعني فمنجيش دلوقتي تبقى هي الأساس في معظم الأعمال اللي بيطلق عليها أعمال شعبية".

ماجدة خير الله: مسلسل اش اش مفيهوش عري واللي شايف ان ده مش مناسب لرمضان ميشفهوش

وعلقت الناقدة ماجدة خير على الجدل الواسع المذاع حول مسلسل اش اش بسبب المشاهد الخارجة في رمضان، وقالت: "مفيهوش عري دي في فساتين عادية فيها عري أكتر، وبعدين اللي شايف ان ده مش مناسب لرمضان ميشفهوش".

ماجدة خير الله: أحمد العوضي معملش لياسمين تاريخ

وعن عودة ياسمين عبد العزيز للمشاركة في رمضان 2025 بمسلسل وتقابل حبيب بدون طليقها الفنان أحمد العوضي، وقالت ماجدة خير الله: "أحمد العوضي معملش لياسمين تاريخ، ياسمين عبد العزيز مهمة وليها مسلسلات وأفلام كتير قبل العوضي بكتير، كل تاريخها مع العوضي 3 سنين مثلا، زيه زي أي حد اشترك معاها في فيلم أو مسلسل".

ماجدة خير الله: محمد هنيدي ميستاهلش أي حاجة من بريقه القديم

وحرصت الناقدة ماجدة خير الله على التعليق عن عودة محمد هنيدي للمشاركة في السباق الرمضاني من خلال مسلسل شهادة معاملة أطفال قائلة: "شوفتو ومحبيتهوش لأن أداء هنيدي أداء كاريكاتيري قديم مفيهوش أي مجال للإضحاك بالعكس بيثير الأعصاب، واضح أن هو مُصر ، لان جاتله 90 فرصة، يعني جاتله فرص كتيره جدا للأسف بيفوتها كلها، مصر على انه ميستاهلش أي حاجه من بريقه القديم، والأفلام او المسلسلات مش بس الحدوتة لا كمان طريقة سرد الحدوتة".