إيمان الشريف تكشف تفاصيل مشاركتها في مسلسل المداح الجزء الخامس| خاص
المداح الجزء الخامس .. تستكمل الفنانة إيمان الشريف تصوير مشاهدها في مسلسلها الجديد "المداح- أسطورة العهد" والذي سوف يعرض في موسم رمضان المقبل لعام 2025.
وكشفت إيمان الشريف في تصريح خاص لموقع الأيام المصرية عن تفاصيل دورها في المسلسل، قائلةً: "دوري في المسلسل أنا ضيفة شرف في المداح "أسطورة العهد" بشخصية جديدة ومختلفة تماما عني".
وعن توقعها لنجاح المسلسل أوضحت خلال تصريحاتها الخاصة "وبالنسبة لتوقعي للمداح، طبعًا "المداح" الأربع أجزاء اللي فاتوا نجحوا جدًا، وفكرة إنه يتعمل كل سنة جزء جديد فده معناه إنه نجاح ومعناه إن الناس مستنياه وبتطلبه، فمتوقعة نجاح كبير لأنه قماشة حلوة لحاجات تخلي الموضوع مختلف، فأنا بشوف إنه هينجح".
وأضافت، "والعمل عمومًا بـ حمادة هلال وأستاذ سمير فرج المخرج بكل الكرو بكل الناس طاقتهم حلوة، فأنا بشوف إن أي حد طاقته حلوة وأي حد بيعمل شغل من قلبه بجد ده بيطلع على الكاميرا وبيبان للناس وبيبقى واضح جدًا".
وتابعت، "يمكن أنا مشتغلتش في الأربع أجزاء ودي أول مرة اشتغل معاهم ودوري ضيفة مش طالعة دور كبير بس بصراحة لما صورتهم معاهم حسيت إنه فيه طاقة حلوة في اللوكيشن والناس في الأجواء، والحاجات دي أصلًا لوحدها كفاية إن هي تبان للناس بحب، غير إن هو كمسلسل هو مسلسل ناجح معنى إنه يتعمل منه جزء خامس فهو ناجح جدًا وإن شاء الله الموسم ده يكون أفضل وأجمد من اللي فات".
كما أعربت عن رأيها في فكرة عمل عدة أجزاء من الأعمال الفنية، وقالت: "أنا ولا مع ولا ضد الأعمال اللي بتتعمل منها أجزاء وبيبقى على حسب الدراما وعلى حسب الحاجة دي المسلسل أو الفيلم أي كان هو إيه بيتعمل منه أجزاء عمومًا، على حسب الدراما القماشة بتاعتها عريضة".
واستكملت، "أنا بشوف إن المداح قماشة حلوة إنه يتعمل منه أجزاء وميوقفش كمان لأنه الحكايات عمومًا مش بتنتهي وبنتكلم في حكايات مجهولة حكايات جن والعالم الآخر فعندنا خيال واسع نقدر نلعب فيه براحتنا، وأننا نألف حاجات من لا شيء محدش هيحاسب لأن دي حاجات مجهولة ومنعرفش عن العالم الآخر ده حاجة فبنسمع بس عنه حاجات، فأي حد هيقول أي حاجة عنه هنصدقها أو بنتخيلها ومش هنقول إيه العبث ده، فهو كقماشة يتعمل منه مش خامس بس لا يتعمل منه أجزاء زي ما إحنا عايزين، فتحديدا المداح شايفة القماشة بتاعته يتعمل منه أجزاء كتيرة جدا".
وواصلت "في أعمال تانية بتبقى الدراما فيها محكومة وبيبقى آخرها مثلًا جزء أو جزئين لما نقول إن الموضوع ده جاب آخره لما بتبقى حاجة واقعية زي حياتنا الطبيعية مشكلة معينة بيبقى ليها آخر وكل المشاكل بيكون ليها آخر فمش هتفضل مكملة في حياتنا فبشوف إنه فيه أعمال لما بيتعمل منها كذا جزء زيادة عن اللزوم بحس إنه مبقاش ليها لازمة وبيجيبوا أحداث وخلاص والايقاع بيبقى وحش مبيبقاش الدنيا فيها مش ينشد وبيكون في ملل شوية".
وأردفت، "في حاجات مش بتستحمل يتعمل منها أجزاء، ممكن يتعمل منها جزئين متستحملش تلاتة وفي حاجات متستحملش أصلًا جزء تاني، بس في حاجات بتستحمل أجزاء كتيرة".
