رانيا منصور: إطلالاتي في Joy Awards عادية.. وأنا ضد الرجالة مع رضوى الشربيني (خاص)
رانيا منصور .. في الآونة الأخيرة، لفتت الفنانة الشابة “رانيا منصور” الأنظار بعد تقديمها لعدد من الأعمال الناجحة التي حازت على إعجاب المشاهدين، مثل مسلسل "رقم سري" و"الوصفة السحرية"، كما أعلنت عن انضمامها لفريق عمل فيلم "لأول مرة"، والذي من المقرر عرضه في دور السينما يوم 22 يناير.
وكان لـ موقع "الأيام المصرية" لقاء خاص مع الفنانة رانيا منصور، كشفت من خلاله عن العديد من التفاصيل.
إليكم نص الحوار:
في سياق دورك في مسلسل "الوصفة السحرية.. هل إنتي مع رضوى الشربيني أم ياسمين عز؟
لا مع رضوى الشربيني أكيد، يعني أنا مبشوفش رضوى الشربيني ضد الراجل على فكرة، أنا بشوفها إن هي ضد الراجل اللي مش كويس اللي عنده نوايا مش كويسة وبيلعب بالست، فهي ضد الراجل ده مش ضد الراجل في العموم بالعكس يعني في كذا فيديو من الفيديوهات كانت بتبقى متعاطفة جداً مع الرجالة اللي بيكلموها يعني.
بالعكس بشوف رضوى أن هي بصراحة شخص معتدل جداً إلا لو شافت أنه راجل بيلعب بالست فهي دايماً بحس إنها بتوعي الستات أكتر من أنها بتقلب الستات على الرجالة زي ما بيقال عنها بس أنا مبشوفش ده مظبوط.
تحبي تقولي ايه للناس اللي انتقدوا إطلالاتك الاخيرة في حفل توزيع جوائز Joy Awards؟
والله معرفش مين انتقد الإطلالة بتاعتي الحقيقة كل التعليقات اللي جاتلي تعليقات لذيذة وانبسطت بيها جداً، وحتى لو حد انتقد يعني طبعا مع احترامي لكل الناس دي أذواق، ومقدرش اعترض على رأي الناس في أي حاجة.
متى يمكننا رؤية رانيا منصور في بطولة مطلقة ؟
إن شاء الله قريب.
هل نجاحات أعمالك المتتالية سيكون لها تأثير في اختيار أدوارك فيما بعد؟
أكيد طبعاً هركز الفترة اللي جاية أكتر في اختيار أدواري وإن شاء الله كمان اللي جاي هيكون أحسن من اللي فات.
ماهي معاييرك في اختيار أدوارك ؟
معاييري في اختيار الدور العمل كله بصراحة، يعني بداية من الدور إن هو يبقى دور حلو وعاجبني، بس بهتم جداً باختيار المخرج أو يعني بمين المخرج اللي هيخرج العمل اللي أنا هشتغل فيه وطبعاً طاقم العمل برضو بيهمني جداً أعرف مين طاقم العمل اللي هيشتغل معايا وشركة الإنتاج يعني كل العوامل دي بيبقى ليها دور في إن أنا أوافق أو ارفض.
ماهي الرسالة التي تحرصين دائماً على تقدميها في كل أعمالك؟
مفيش رسالة معينة أقدر أقولك إن أنا حريصة إني أقدمها في أعمالي بس أنا بشوف إن الفن هو بيعرض حكايات بتاعت ناس على الجمهور بطريقة تخليهم يستفيدوا من اللي بيتفرجوا عليه، يعني دايماً إنت لما بيتحكيلك حكاية طبعاً أو لما بتشوفها بقى في عمل فني بتعيش الحالة، بتعيش الحكاية فبيبقى جواك موافقة أو نقد للي انت بتتفرج عليه، فهو ده الهدف من أي عمل فني.
طبعاً ممكن خلال أي عمل فني يبقى فيه رسايل بالعكس، زي ما بيكون فيه رسايل كويسة ممكن تقدمها للناس، في بعض الأوقات بيكون فيه رسايل مش كويسة بتقدمها للناس وده الخطورة، لأن الأعمال الفنية ليها تأثير كبير جداً جداً على المتفرج، فالحمد لله أنا لحد دلوقتي كل الأعمال اللي قدمتها أنا راضية عنها جداً، وراضية عن الرسايل الغير مباشرة اللي بقدمها للناس.
ما هو الدور الذي تتمني تقديمه ولم يحدث حتى الآن؟
مش دور معين بس نفسي أوي أشتغل في عمل تاريخي يبقى إنتاج ضخم ويكون بيتكلم عن الحضارة الفرعونية.
بحيث إن إحنا مقصرين شوية إن إحنا نقدم أعمال زي كده بالمقارنة طبعاً بالسينما العالمية بنتفرج على أفلام مبهرة جداً وبيكلمونا عن الحضارات القديمة بتاعتهم، فبحس إحنا محتاجين نقدم أعمال زي كده.
من هو الفنان الذي أحببتي التعاون معه وتودي تكراره، ومين الفنان الذي تتمنى العمل معه؟
الفنان اللي حبيت أوي الشغل معاه هو أحمد عز، والفنان اللي نفسي اشتغل معاه هو محمد رمضان.
من هو فنانك المفضل في الجيل القديم والجيل الحالي؟
الجيل القديم في ناس كتيرة الحقيقة، رشدي أباظة طبعاً، وكنت بحب أوي عبد الحليم، وأحمد مظهر، أحمد رمزي.
زمان كان فيه فنانين طبعاً عظماء ونجمات كمان، كان نفسي أوي اشتغل معاهم يعني بحب شادية جداً وبحب فاتن حمامة اوي اوي وأكيد سعاد حسني طبعاً، كل دول نجوم كنت أتمنى أن أنا أكون عايشة في العصر بتاعهم واشتغل معاهم.
وفي الجيل الحالي بحب أحمد عز، وبحب كريم عبد العزيز جداً، وبحب محمد فراج أوي ونفسي اشتغل معاه، وبحب تايسون برضو جداً ونفسي اشتغل معاه، وبحب آسر ياسين اوي، دول النجوم الرجالة.
طبعا النجمات اللي نفسي اشتغل معاهم هم منى زكي، منة شلبي، وبحب دينا الشربيني كمان أوي، وهند صبري بحبها جداً، كل دول نجوم نفسي اشتغل معاهم.
ما هي الأعمال التي تستعدين لها الفترة المقبلة؟
لا الفترة دي يعني مش بحضر حاجة، الشغل دلوقتي على مسلسلات رمضان وللأسف اعتذرت عن كذا مسلسل لأن يعني مكنتش الأدوار بصراحة أحسن حاجة، واختارت بقى إني استنى بس فترة رمضان تعدي ونبدأ نحضر الحاجات اللي بعد رمضان.
