رانيا منصور في حوارها لـ الأيام المصرية: قابلت شخصيات منفسنة كتير وممكن أجرب تاني دور الإثارة
تألقت الفنانة الشابة رانيا منصور في الآونة الأخيرة، حيث قدمت العديد من الأعمال الناجحة التي جذبت انتباه المشاهدين، منهم مسلسل "رقم سري"، ومسلسل "الوصفة السحرية"، كما أعلنت أيضًا عن انضمامها إلى فريق عمل فيلم "لأول مرة"، والذي من المقرر عرضه يوم 22 من يناير بدور العرض.
وكان لـ موقع "الأيام المصرية" حوار خاص مع الفنانة رانيا منصور كشفت من خلاله عن تفاصيل عديدة، وإليكم نص الحوار:
دورها في فيلم لأول مرة
- حدثينا عن تفاصيل دورك في فيلم "لأول مرة" ؟
بعمل شخصية اسمها "هبة"، وهي ست مصرية عادية متجوزة، بتحب جوزها، عندها مشاكل معاه في الحياة الزوجية بينهم بس بتفوت وبتعدي وعايزة الحياة تمشي، وهي ست يعني شبه ستات مصريات كتير تحس إن هي قريبتك، صحبتك، تحس إن إنت عارف الشخصية دي شوفتها قبلتها.
- ما الذي يميز هذا الدور عن أعمالك السابقة ؟
بيميز الدور ده بساطته بصراحة يعني هو شخصية بسيطة جدًا جدًا وحتى على مستوى الشكل يعني أول مرة أعمل دور لابسة فيه حجاب فهو على مستوى الشكل وعلى مستوى الشخصية هو جديد ومختلف عن الحاجات اللي عملتها قبل كده.
- ماهي التحديات التي واجهتك أثناء تحضيرك للفيلم ؟
الفيلم بصراحة مكانش فيه حاجات صعبة أوي مكانش فيه تحديات قوية، يعني التحضير للدور كان سهل بالنسبالي وهي كانت شخصية قريبة جدًا فـ مكانش التحضير ليها صعب بصراحة، وحتى كمان ظروف التصوير يعني كنا بنصور تقريبًا في لوكيشن واحد فمكنتش ظروف التصوير صعبة كانت كل حاجة سهلة الحمد لله.
- ماهي الرسالة التي يحملها الفيلم ؟
الرسالة اللي بيحملها الفيلم هو إن الفيلم بيتكلم عن العلاقات يعني علاقة الشخصيات اللي في الفيلم كل واحد ومراته وعلاقات زوجية مختلفة بتورينا مشاكل معينة ممكن تكون بتمر بيها العلاقة الزوجية ما بين اتنين بطريقة معينة من غير ما يكون بيلاقي حلول يعني بس بيورينا المشاكل عاملة ازاي وخلاص من غير ما يكون فيه حلول مقترحة.
وعن دورها في مسلسل رقم سري
- حديثنا عن كواليس تصوير مسلسل رقم سري كيف كانت؟
مسلسل رقم سري الحمد لله كان من ضمن الحاجات اللي اشتغلت فيها وكانت ناجحة جدًا والناس كانت مبسوطة أوي ومتفاعلة مع المسلسل، وكواليسه كانت لذيذة جدًا يعني تقريبًا موظفين البنك كلهم طول الوقت كنا بنقعد نغني ونهزر ونضحك ونعمل تيك توك طول الوقت فكانت كواليس لذيذة بصراحة ودمها خفيف.
- هل توقعتي نجاح الدور عندما تم عرضه عليكي بهذا الشكل؟
لما اتعرض عليا المسلسل توقعت إن هو هينجح علشان الجزء الأول منه كان ناجح فلما بيجيلك مسلسل كان فيه جزء أول والجزء ناجح فبتكون ضامن بنسبة كبيرة نجاحه للجزء التاني، وبما إن الورق حلو والمخرج شاطر وأبطال لذاذ وكل حد مركز في الدور بتاعه فخلاص يعني كل حاجة تقريبًا حواليك أو حوالين المسلسل والدور اللي أنت بتعمله حلو ومضبوط فالحمد لله، لأ كنت متوقعة بصراحة إنه هينجح.
- هل قابلتي شخصيات حقودة في حياتك الشخصية مثل شخصية ميرنا ؟
قابلت طبعًا شخصيات منفسنة كتير شبه ميرنا أكيد يعني إحنا لما بنبقى بنقدم شخصية بيبقى أكيد في شبه ليها في الواقع مش بتكون شخصيات متخيلة، فأكيد طبعًا قابلت اه.
- ما تعليقك على الانتقادات انه كان يوجد مد في الأحداث لـ 30 حقلة؟
والله يعني دي آراء شخصية لو حد شايف إن في مد في الأحداث يعني مقدرش اتناقش مع حد عنده وجهة نظر يعني، العمل الفني بيبقى معرض للانتقاد أو معرض للمدح من الناس، فلو حد ده رأيه كدا مقدرش اعترض على رأيه يعني، بس أنا من وجهة نظري شايفة إن لأ طبعًا الأحداث كانت لذيذة وكان طول الوقت فيه شد في الأحداث والناس كلها كانت عندها حالة تشويق إنهم يكتشفوا مين القاتل، فأنا شايفة كده بس لو حد شايف غير كده مقدرش اعترض على وجهة نظره.
- هل ممكن تكرري تجربة دراما الإثارة والتشويق مرة أخرى؟
أكيد طبعًا ممكن أجرب تاني تجربة دراما الإثارة والتشويق، أكيد طبعًا الحاجة كانت لذيذة أوي، أنا طول الوقت الناس لما كانت بتشوفني كانت بتسألني مين اللي قتل ندى؟ فطبيعي طبعًا انبسطت يعني وعندي استعداد أكرر تاني التجربة.
- هل هناك نية لعمل جزء ثالث لمسلسل رقم سري ؟
أعتقد ممكن جدًا إنه يبقى فيه جزء ثالث للمسلسل بس هيكون برضه نفس الفكرة بس بأبطال جديدة بناس جديدة بحكاية جديدة وللأسف مش هكون فيه.