مسلسل حكيم باشا رمضان 2025.. شيماء عباس تستكمل تصوير مشاهدها رفقة مصطفى شعبان

مسلسل حكيم باشا رمضان 2025، تستأنف الفنانة شيماء عباس تصوير أحدث أعمالها الدرامية المقبلة وهو مسلسل "حكيم باشا" والذي من المقرر عرضه في الموسم الرمضاني المقبل لعام 2025.

وكشفت شيماء عباس عن تفاصيل دورها التي سوف تجسدها أثناء أحداث المسلسل في تصريح خاص لموقع "الأيام المصرية".

إليكم تصريحات شيماء عباس عن مسلسل حكيم باشا رمضان 2025

وقالت شيماء عباس عن كيفية ترشيحها: "اللى رشحني في الدور أحمد إسماعيل كاستينج دايريكتور محترم، عملت اوديشن عنده لـ "الوصايا" لمنى زكي وكانوا مبسوطين جدااا بس محصلش نصيب في العمل ده فغالباً من ساعتها وهو بيقدر الشاطر لما يلاقي فرصة يرشحه في حاجة تانية وده اللي حصل الحمد لله".

وأضافت: "للأسف المسلسل كله غير مصرح لأي حد يتكلم عن أي حاجه فيه ولا الشخصيات ولا العمل ، لكن هو زي ما معروف إنه مسلسل صعيدي وكنت أتمنى أشتغل صعيدي تاني بعد تجربتي في "خطوط حمرا" للنجم أحمد السقا".

وتابعت: "الحقيقة كنت حابة جداً إني اشتغل مع نجم محترم بيقدر كل اللي معاه ومريح جداً في اللوكيشن والتعامل زي النجم أستاذ مصطفى شعبان وكان من الحاجات اللي كان نفسي تحصل وحصلت بدون أي سعي مني لده الحمد لله"، موضحة: "بتمنى بس من ربنا حاجات والحمد لله بتحصل لوحدها حتى لو خدت شوية وقت".

وتحدثت شيماء عباس عن تفاصيل دورها قائلة: "الدور فيه سيكونس مهم خلاني حبيت أعمله وخصوصاً بدون ما أفكر إنه مع نجم زي مصطفى شعبان وسهر الصايغ ودينا فؤاد والمخرج وهو أول تعامل معاه أستاذ أحمد خالد أمين والحقيقة أنه الكرو كله مريح جداً وفيه ألفة كبيرة بينا".

واستكملت: "أنا دايماً متابعة مصطفى شعبان وكنت حابة جداً أتعامل معاه في عمل واستفيد من خبرته، ولأن دايماً بيبقى معاه كرو عمل ذو خبرة كبيرة وأتمنى أشتغل معاه دايماً الحقيقة".

وعن رأيها في الأعمال خارج موسم رمضان وداخله، أوضحت: "انا بحب أعمال شهر رمضان مهما كانت الأعمال خارج رمضان في الأوف سيزون مهمة وجيدة إلا أن يبقى شهر رمضان هو الماراثون الأهم على الإطلاق والسنة اللى أشارك في عمل داخل رمضان بحس دايماً بالبهجة والتفاؤل والشغف والقلق في نفس الوقت، ومصطفى شعبان بعد نجاحه في المعلم السنة اللي فاتت متوقعة إن شاء الله مسلسل مختلف جداً السنة دي وينجح نجاح كبير لأنه عامل مجهود كبير فيه وكل العاملين بالمسلسل".

واختتمت: "تقريباً انا خلصت نسبه كبيرة من شغلي في المسلسل وأتمنى الدور يعجب الناس وأكون عملت فيه مجهود على قد ما أقدر، الحقيقة إن العمل ده بالنسبالي يتسم بالراحة النفسية الحمد لله".