رحمة أحمد لـ"الأيام المصرية": كنت خايفة من شكلي في الحجاب وقوة كاست "رقم سري" شجعني
رحمة أحمد مسلسل رقم سري، تألقت الفنانة رحمة أحمد في الأيام الماضية بشخصية "مس راندا" التي جسدتها في أحداث مسلسل "رقم سري"، ولاقت رحمة تفاعلاً كبيراً من قبل الجمهور على شخصية "راندا" وحازت على ردود أفعال إيجابية لتمكنها في أداء الدور، وبدأ اسم رحمة أحمد مسلسل رقم سري، يصبح متداولًا عبر رواد السوشيال ميديا.
وفي هذا الصدد حرص الأيام المصرية، على التواصل مع الفنانة رحمة أحمد، للحديث عن نجاح مشاركتها في مسلسل رقم سري، وعن كواليس العمل وتحضيراتها، و أعمالها القادمة.
مين رشحك لدور راندا؟
محمود عبد التواب اختارني بعد ما عملت اوديشن على الدور.
ايه اللي جذبك للدور؟
اللي جذبني للدور إني أشتغل مع كاست قوي "تأليف وإخراج وتمثيل وإنتاج وباقي عناصر العمل" محقق نجاح كبير من السنه اللي فاتت في صوت وصورة.
وشخصية مس راندا مختلفة على الورق عن باقي الشخصيات في المسلسل ومختلفة عني كرحمة فده كان تحدي كبير ليا.
كلمينا عن كواليس المسلسل كانت إزاي خاصة أنه أحداثه كلها تشويق؟
كواليس المسلسل كانت كلها شيقة بردو زي المسلسل، لأن محدش كان عارف مين القاتل فحرفياً كلنا شاكين في بعض وشاكين في نفسنا.
إزاي حضرتي لشخصية راندا؟
مكنش معايا في الأول كل الحلقات لما بدأت تصوير، فسألت المخرج مين راندا ، قالي هي شخصية بسيطة جداً ودي الوحيدة اللي وثق فيها حسين وحبها ، فذاكرت شخصية حسين الأول و من خلال معرفتي بشخصيته اللي هي معندهاش ثقة في حد وبيخاف على أخته جداً، سألت نفسي ايه يخلي شخصية زي حسين تختار مس راندا تحديداً علشان تحبها فطلعت زي ماعملتها كده.
هل في تشابه بين شخصية رحمة في الحقيقة وشخصية راندا؟
التشابه بين رحمة وراندا في الحقيقة، متشابهين جداً ومختلفين جداً جداً جداً، مش عارفة هما الإتنين دخلوا في بعض معايا وأنا بصور.
ايه أكتر التعليقات اللي جتلك على دورك ولفتت نظرك؟
جالي تعليقات كتير حلوة مكنتش متوقعة رد الفعل القوي ده على الدور كنت خايفة الناس متصدقنيش خصوصاً إن شخصيتي اجرأ بكتير من مس راندا.
لكن العكس تماماً اللي حصل معايا الناس لما بخرج من غير الحجاب بتتخض بيفتكروني قلعت الحجاب وكرو المسلسل كان فاكرني محجبة و مدرسة بجد ، غير إن الناس اللي بتوقفني في الشارع بقت تدعيلي علشان اللي عملته مع حسين وأخته وبيدعولنا نتجوز قريب ومستنين الفرح.
هل تلقيتي تعليقات عن ارتداء الحجاب في المسلسل كنتي شايفة ده إزاي؟
كنت خايفة شكلي في الحجاب ميكنش حلو أو مش شبه المحجبات لكن العكس تماماً اللي حصل الناس فاجئتني برد فعلهم الإيجابي.
ايه أصعب مشهد واجهتي صعوبة فيه وأثر فيكي نفسياً؟
معنديش مشهد صعب بس كل اللي كنت خايفة منه إن الشخصية تهرب مني خصوصاً إن عندي فرط حركة و شخصية راندا أنضج وأعقل مني فكان ليها إيقاع معين رسماه في مخي ليها فكنت طول الوقت بحاول أحافظ على الإيقاع و الثبات وقده.
هل استعنتي بمدرسين لتحضير شخصيتك في رقم سري؟
اتفرجت على اليوتيوب على مدرسات بيعلموا محتوى إزاي يكونوا محبوبين للطلبة بتوعهم وكمان افتكرت الصفات اللي حبيتها في المدرسين بتوعي في المدرسة.
في سياق دورك كمدرسة.. شايفة أن من واجب المعلم يساعد طلابه في حل مشاكلهم زي راندا؟
“طبعا .. شايفه ده كلنا هتلاقينا كنا بنحب مواد دراسية معينة بسبب أسلوب المدرس أو المدرسة، على الأقل لو معرفش يساعد الطلبة بتوعه إنهم يتطوروا إنسانياً ميأذيهمش نفسياً لأنهم بيكونوا أمهات وآباء ليهم”.
في إطار كمدرسة.. ايه النصائح اللي تحبي توجهيها للبنات خاصة سن المراهقة؟
إنهم يعيشوا سنهم الحقيقي وميفكروش في بكرة كتير وميقارنوش نفسهم بحد خصوصاً على السوشيال ميديا.
تحبي تقولي ايه للمدرسين للتعامل مع طلابهم بشكل جيد؟
اعتبر الطالب بتاعك زي ابنك أو بنتك أو أخوك الصغير لإنك بتأثر فيه طول عمره سواء بالسلب أو الإيجاب.
هل في مدرس أو مدرسة كان ليهم تأثير في مسيرتك؟ وكان ايه اكتر حاجة بتضايقك منهم؟
“أنا كنت بعاني في طفولتي من الشقاوة الزيادة وفرط الحركة والخيالية المبالغ فيها، وده طبعاً كان مأثر عليا في مستوى الدراسة والتركيز عموماً ، فكان ليا مدرسة رسم هي اللي عالجتني بالفن و الرسم و طلبت من مامتي إني لازم أمارس رياضة ،وفعلاً أنا لحد دلوقتي لما بكون مكتئبة بمسك الألوان وألون زي الأطفال والتمرين حاجة مهمة في حياتي وبسبب الحاجات دي أنا تفوقت في دراستي و قادرة اكمل لحد دلوقتي ف حياتي”.
كان عندك تخوف من نجاح الجزء التاني رقم سري زي مانجح صوت وصورة؟
لا مكنش عندي تخوف لأن المؤلف كاتب ورق حلو ومختلف و المخرج شاطر و فاهم هو بيعمل ايه كويس أوي.
شايفة ردود الأفعال على المسلسل وعلى دورك ازاي؟
ردود الأفعال عظيمة والناس متعصبة من كتر ماهما مصدقين معانا الحدوتة.
هل في أعمال جديدة بتحضري ليها؟
في فيلم هيتعرض قريب بشارك فيه اسمه "بنات الباشا"، تأليف نورا ناجي، إخراج ماندو العدل.
