سرقة فيلم الدشاش.. مخرج يحذر من التعامل مع محمد سعد: مكنتش متخيل يسرق فيلمي
اتهم المخرج أحمد البنداري الفنان محمد سعد، بسرقة فيلم الدشاش، وتقديم الفكرة مع منتج ومخرج آخر، مؤكدا أنه لن يترك حقه.
وكشف البنداري عبرحسابه الرسمي على موقع التواصل الاجتماعي فيس بوك، أن فيلم الدشاش في الأصل كان يحمل اسم “كعب داير”.
أحمد البنداري يحذف منشوره عن سرقة محمد سعد لفكرة فيلم الدشاش
حذف المخرج أحمد البنداري، المنشور الذي كتبه خلال الساعات القليلة الماضية على فيس بوك، يعلن فيه سرقة محمد سعد لفكرة فيلم الدشاش من فيلمه كعب داير.
مما أثار جدلا واسعا على منصات السوشيال ميديا، حول حقيقة سرقة محمد سعد لفكرة فيلم الدشاش من المخرج أحمد البنداري، وتقديمها باسم فيلم الدشاش.
أحمد البنداري يتهم محمد سعد بسرقة فيلم الدشاش
كتب أحمد البنداري عبر حسابه على فيس بوك، يتهم محمد سعد بسرقة فكرة فيلمه كعب داير وتقديمها باسم فيلم الدشاش.
وقال البنداري إن فيلم الدشاش هو في الأساس كان يحمل اسم كعب داير ورشح له الكثير من النجوم، لكنه صمم أن يكون الفيلم بطولة محمد سعد، لكنه لم يكن يتوقع أن يسرق فكرة فيلمه ويقدمها في فيلم الدشاش، قائلا: فيلم الدشاش ده أصلا اسمه كعب داير، وكان مترشحله نجوم تانية، ياريتني كنت روحت لأي حد فيهم، المهم عن طريق صديق مشترك وديته لمحمد سعد تحت اسم (الحاوي) وكان سعد ترشيحي انا رغم تحذير ناس كتير من التعامل مع سعد كنت مصمم عليه وشايفه نقلة ليا و ليه.
وأضاف: كان في شركة كبيرة ومنتج كبير موافق على الفيلم بحذر طبعاً لسمعة محمد سعد مع المخرجين، لكني طمنته وقولت له متقلقش سعد عاجبه الفيلم ومتفقين على الخطوط العريضة كلها، وكان شرط سعد الوحيد إن المنتج ميعترضش على أجره الكبير، ده كان كلامه بالحرف.
وأشار البنداري إلى أن المنتج تواصل مع محمد سعد أكثر من مرة ليلتقي به، لكنه كان يلغي الموعد لأسباب مختلفة، حتى اتصل به ذات مرة وقال له إن السيناريو ضعيف، ولن يشارك في بطولته، قائلا: “المنتج ده كلم سعد واداله أكتر من ميعاد وسعد لغى كل المواعيد لأسباب مختلفة، لحد ما في يوم كلم هو المنتج وقاله إن الفيلم مش عاجبه وإن السيناريو ضعيف وإنه عايز يبقى يحدد معاه ميعاد على فيلم تاني، المهم لما المنتج كلمني وقال لي استغربت جدا لأن ده عكس كلامه ١٠٠٪، المهم بعدها كلمته قال لي نفس الكلام إنه الفيلم مش عاجبه ماحبتش اطول في المكالمة خصوصاً إن ده حقه إنه يعجبه فيلم او مايعجبوش مع إنه مقالش كده من الأول بالعكس، والحمد لله على نعمة التكنولوجيا الواتساب كله موجود”.
وختم البنداري منشوره، قائلا: الغريب إني اكتشف بعد كده إن الدشاش هو الحاوي مع مخرج تاني ومنتج تاني ليهم كل الإحترام والتقدير والتمنيات بالتوفيق، مع الفارق في نجم كبير جدا مش هقول اسمه روحتله بفيلم، شوفت منه صراحة ووضوح في اللي عاجبه واللي مش عاجبه وقاري الفيلم كويس مش حد قاري و حاكيله الفيلم ده غير التزام رهيب في المواعيد مع انه حقيقي مش فاضي لحد اخر ٢٠٢٥ يعني ممكن مانشتغلش الفيلم ده اصلاً مع بعض لكن عرفني ليه الراجل ده محافظ على نجوميتة بقاله ٢٠ سنة تقريباً لأنه بيسمع للآخر وبيقرأ كويس وملتزم لأقصى الحدود ربنا يوفق الجميع و ده كان تحذير لأي صانع افلام من التعامل مع محمد سعد من غير ما يكون مأمن نفسه و مجهوده 100%.
يذكر أن فيلم الدشاش يشارك في بطولته مجموعة كبيرة من الفنانين، منهم: محمد سعد، زينة، نسرين طافش، مصطفى أبو سريع، باسم سمرة، رشوان توفيق، ومن إخراج سامح عبد العزيز، ومقرر عرضه في موسم عيد الفطر 2025.
