زينة أشرف عبد الباقي عن مهرجان القاهرة السينمائي 45: لو مش عاجبك متتفرجش عليه (خاص)
أعربت المخرجة الشابة زينة أشرف عبد الباقي، عن سعادتها للمشاركة لأول مرة بـ مهرجان القاهرة السينمائي 45، بأول تجاربها الإخراجية، بفيلم “مين يصدق”، من خلال مسابقة آفاق عربية، ضمن مجموعة من الأفلام الطويلة.
ومن خلال فعاليات المؤتمر الصحفي الخاص بمهرجان القاهرة السينمائي 45، كان لـ الأيام المصرية لقاء خاص مع المخرجة الشابة زينة أشرف عبد الباقي، للحديث عن تفاصيل أولى تجاربها الإخراجية "مين يصدق، ومشاركتها من خلاله في مهرجان القاهرة السينمائي 45.
زينة أشرف عبد الباقي : مهرجان القاهرة كان حلمي
كشفت زينة أشرف عبد الباقي، عن انتظارها للمشاركة في هذه الدورة من مهرجان القاهرة السينمائي 45، الدورة المؤجلة: قائلة “متحمسين جدا، لأن كان حلمنا من قبل ما ندخل تصوير الفيلم، أننا نكون في مهرجان القاهرة السينمائي، واستنينا سنة كاملة بسبب تاجيل الدورة السابقة، منتظرين مجهودنا وشغلنا كل الناس تشوفوا”.
زينة أشرف عبد الباقي : وجودي السنة دي وسط صناع السينما بمهرجان القاهرة شرف ليا
وأشارت زينة أشرف عبد الباقي، إلى مشاركتها في هذه الدورة من مهرجان القاهرة السينمائي، كصانعة محتوى، وليس متابعه فقط للمهرجان وفاعلياته، قائلة: “أنا كل سنة في المهرجان بحضر الماستر كلاسس، وأتفرج على الأفلام وأحضر الورش والمحاضرات واتعلم من الناس الكبيرة، ولكن وجودي السنة دي بشكل مختلف، وسط كل النجوم المشاركة بالمهرجان، هو شرف كبير ليا”.
زينة أشرف عبد الباقي : أحمد عز أستاذنا ويستحق التكريم
وأضافت قائلة: “متحمسة جدا، لمقابلة الفنانين كلهم في المهرجان، كلهم بتبسط بوجودهم، كبرت وأنا بتعلم منهم وبتابع شغلهم، فهيكون شرف كبير ليا أني أكون بينهم السنة دي”، وعن تكريم الفنان أحمد عز في هذه الدورة قالت: “أحمد عز ده أستاذنا ويستحق التكريم جدًا”.
“زي ما قال أستاذ حسين فهمي، احنا في مهرجان متصنف درجة أولى وعالمي، فمكنش ينفع يتأجل سنتين وراه بعض، والقائمين على المهرجان عملوا حاجة ذكية جدا، باختيارهم لجزء كبير من الأفلام الفلسطينية، واللبنانية، علشان العالم كله يتفرج على الحقائق اللي بتحصل، لأنهم بيوجهوا الضوء عليها من خلال المهرجان”
زينة أشرف عبد الباقي: اللي منتقد المهرجانات مش من حقه يبقي صوته عالي
وتحدثت زينة أشرف عبد الباقي عن منتقدي إقامة المهرجانات في الوقت الحالي، مشيرة إلى أن من لا يحب شئ، لا يشاهده، ولا ينتقده أيضًا قائلة: "أنا شايفة أن اللي مبيحبش حاجة مش من حقه يبقي صوته عالي، فاللي منتقد إقامة المهرجانات في الوقت ده مش لازم يتابع ولا يتفرج عليها، لأن مش لازم كل حاجة تعجب كل الناس، فاللي مش عاجبك ممتفرجش عليه".
زينة أشرف عبد الباقي : المهرجانات حاجات كتير غير الفساتين
وعن إتهام منتقدي المهرجانات بأنه، مجرد عرض للفساتين، وضحت أن هناك فعاليات كثيرة بالمهرجان غير عرض الفساتين والريد كاربت، قائلة: “المهرجانات الفنية حاجات كتير غير الفساتين، منها الأفلام والشغل والمحاضرات، حاجات كتير مهمة وأكتر بكتير من مجرد عرض ومشاهدة للفساتين، فاللي عايز يشوف حاجة بيشوفها، اللي عايز يتابع الفساتين مبيشوفش غيرها، واللي عايز يهتم بحاجة أهم من الفساتين هيشوفها”.\
تفاصيل فيلم مين يصدق
يشارك في بطولة فيلم "مين يصدق" مجموعة من النجوم الشباب، من بينهم: “ يوسف عمر، وجايدا منصور”، يشار إلى أن الفيلم فكرة زينة أشرف عبدالباقي ومصطفى عسكر، وحامد الشراب وسيناريو وحوار زينة عبد الباقي ومصطفى خالد بهجت، مدير التصوير عبد الرحمن "إيزو"، ديكور ندى عبدالمجيد، ومونتاج محمود سليمان، ومهندس الصوت باسم جمال، المخرج المنفذ عمر عسر، منتج فني مصطفى خالد بهجت، وأحمد إيهاب السعيد، وإخراج زينة عبد الباقي وإنتاج أنور الصباح وأشرف عبد الباقي، ومحمد عبدالوهاب، ومحمد زعيتر، ويشارك في الفيلم كضيوف شرف عدد كبير من النجوم.
