مانويل جوزيه لـ إبراهيم فايق جماهير الأهلي اللاعب رقم 12

تحدث مانويل جوزيه المدرب الأسطوري لـ النادي الأهلي، عن فترته بالنادي الأهلي وأبرز ذكرياته مع الجماهير ووجه رسالة خاصة لجمهور الأهلي وتحدث عن موقف طريف بينه وبين جماهير النادي الأهلي، وجاء ذلك في برنامج الكورة مع فايق عبر قناة إم بي سي مصر2.

ويسرد لكم موقع الأيام المصرية أهم تصريحات مانويل جوزيه مع إبراهيم فايق.

مانويل جوزيه جمهور الأهلي اللاعب رقم 12

قال مانويل جوزيه:" برجع دائمًا للمكان اللي بكون سعيد فيه ودا سبب عودتي للأهلي 3 مرات، حققنا انجازات كبيرة مع الأهلي واشتغلت في السعودية مع اتحاد جده، لكن فرحتي الكبيرة كانت في مصر مع النادي الأهلي وبوجه تحياتي لكل جماهير النادي الأهلي وكانت لحظات مهمة في حياتي اللي استمرت 32 سنه كمدرب كرة قدم".
واصل مانويل جوزيه:" أحب أقول لجماهير الأهلي انهم يفضلوا دايمًا ورا فريقهم بنفس الشغف الكبير، ودايمًا كنت بقولهم اننا في مصر أو برا هما اللاعب رقم 12 للفريق في أي دولة كنا بنروحها في أفريقيا أو مختلف القارات، في الأول لما كنت بروح الأهلي كبداية مكانوش عارفيني أوي ومكانش في تواصل كبير بينا أول مرة من تواجدي في مصر كلمت رئيس النادي الأهلي صالح سليم يعين ليا مترجم علشان ابدأ اتناقش معاه وأعرف العربي لكن لقيت العربي أصعب من البرتغالي وجه معايا مترجم كويس جدًا وكان شخص مميز وكان بيساعدني أتواصل مع اللاعبين بشكل سهل أوي".

أردف مانويل جوزيه:" بخلاف الناحية الفنية خلقت جو أسري داخل النادي، كسبنا 21 لقب مع بعض ومشوفتش فريق زينا يلعب 9 نهائيات قارية يكسب منهم 8 زي الأهلي، العلاقة الأسرية الكبيرة ما بينا كانت هي كلمة السر والجمهور كان بيفرق أوي معانا في الموضوع دا، والخصم كان بيعاني لما يكسب الكورة ضد الأهلي من الجمهور، هما كانوا زي ما قولت اللاعب رقم 12 للفريق".

واصل مانويل جوزيه: كان تغيير واضح بالنسبة لي ان كل الفرق بتلعب 4-4-2، لكن لما غيرت الطريقة لـ3-4-3  الأمر فاجئ الكل وكان عندنا لاعيبة موهبتها كبيرة ساعدتنا في نجاح طريقة اللعب، الطريقة صعبة أوي لكن العناصر المميزة ساعدتها في نجاح الخطة لانها بتتطلب مجهود كبير في الدفاع والهجوم، عملنا مسيرة كويسة في كأس اليويفا بالطريقة دي في تدريبي بأوروبا وقولت لازم أنفذ الموضوع دا في أفريقيا وأفاجئ الكل، المترجمين عادة مكانوش بيفهموا في كرة القدم لان أغلبهم كانوا في السياحة، لكن بالنسبالهم الكورة مدورة وخلاص مش عارفين القواعد لكن مع الوقت والتعامل فهموا الأمور وبقوا يوصلوا للاعيبة الكلام الفني بشكل صحيح".

أنهي حديثه:" الجمهور كانوا بيغنولي "أعملوا ايه مانويل جوزيه" وكنت برقص عليها، كانوا بيغنوها الجمهور أكتر في القاهرة، الأهلي بيتي ولحظاتي فيه مقدرش أنساها لانها المميزة، لكن مشكلتي الوحيدة مكونتش أقدر أمشي في الشارع لان كل الناس عارفني وبيطلبوا يتصوروا معايا على طول.