تامر حسني يكشف تفاصيل بداية مشواره: «مش عيب تشتغل حاجات كتير»
يحرص دائمًا الفنان تامر حسني على تقديم رسائل دعم إيجابية لجمهوره ومتابعيه، حيث يقوم برواية أحداث ومواقف من حياته وبداياته ليلهم المتابعين وبث روح التفاؤل والإيجابية، وينشر الأيام المصرية التفاصيل الخاصة بالخبر.
تامر حسني يقدم رسائل دعم لجمهوره
نشر الفنان تامر حسني فيديو من لقاء له مع الإعلامية إسعاد يونس من برنامجها "صاحبة السعادة"، وعلق على الفيديو قائلًا: "نفسي الفيديو ده يوصل لكل اللي بيحلموا، وعندهم طموح وحواليهم ناس كتير محبطة وناس مؤذية".
تامر حسني: مش عيب تشتغل حاجات كتير
وقال الفنان تامر حسني خلال الفيديو: "فيه مراحل وظروف ممكن تقابلك تخليك إن أنت تبدأ خطوة خطوة، مش عيب أنك تشتغل حاجات كتير، حتى لو مش على هواك، هو طبعًا حسب ظروف البني آدم، بس أنا ظروفي كانت صعبة، فكان لازم أشتغل عشان أمي وعشان أخويا، وعشان أنا مش عايز أبقى واحد فاضي".
وتابع تامر حسني: "أنا عايز أشتغل وعارف إن ربنا بيكرم المجتهد، وحتى وأنا بجتهد في حاجات كتير أكيد ربنا هيفتحلي باب فكنت بشتغل في حاجات كتير لأن معنديش حد بيصرف عليا".
تامر حسني: إللي بيحاول يحبطني مبيأكلش معايا عيش
وأضاف تامر حسني: "رغم إني مشيت من الكورة، يعني مش مشيت بإرادتي زي ما النادي أستغنى عني والنادي التاني أستغنى عني وروحت أمثل منفعش، المفروض إن أنا بقى أُحبط، مفيش الكلام ده عندي، لأني شايف حاجة قدامي، يعني شايف ومصمم وعندي إرادة مش طبيعية، وأي حد بيحاول يحبطني في حاجة مبيأكلش معايا عيش خالص".
تامر حسني: بذكائك تقدر تحول طاقة الإحباط لنجاح
واستكمل تامر حسني حديثه: "أي حد حاول يشتت طاقتي إن أنا مش هنجح بجد مبسمعوش، وبقدر كمان مع الوقت إني أحول حد يبقى عايز يحبطك يعني داخل بطاقة إحباط ليك إزاي بذكائك أنك تأخد الطاقة دي وتشتغل بيها فتنجح زيادة كمان بناءً على إللي عمله، إللي هو لو يعرف ده يقولك ياريتني ما روحت قولتله".
واختتم الفيديو بفيديو قديم له وهو يدعم متابعيه من خلاله: "أنت إيمانك بربنا كبير، فوق أي حاجة، ومحدش يقدر يعملك حاجة غير اللي ربنا كاتبهالك"
وردت إسعاد يونس على حديثه قائله: "ده فن الاستفادة من الظروف الوحشة".