38 سنة خبرة .. أسما شريف منير تحتفل بعيد ميلادها بهذه الطريقة(صور)
أسما شريف منير تحتفل بعيد ميلادها ، احتفلت أسما شريف منير، ابنة الفنان شريف منير، بعيد ميلادها 38 ولكن بطريقة مختلفة، فهي بشكل دائما اعتادت على الاختلاف، في ظهورها وتفاصيلها ومنشورتها وحياتها أيضًا، مما يثير الجدل حولها بشكل مستمر، وكان لها تعليق مختلف على منشور احتفالها بعيد ميلادها 38.
أسما شريف منير تحتفل بعيد ميلادها الـ٣٨
وشاركت أسما شريف منير، متابعيها عبر حسابها الرسمي على موقع التواصل الإجتماعي وتبادل الصور إنستجرام، مجموعة صور لتدون من خلالها 38، صفة اكتسبتها في مراحل عمرها.
وكتبت أسما شريف منير نصًا: “في عيد ميلادي الـ٣٨… النهاردة مش مجرد رقم جديد، النهاردة وقفة مع نفسي… وبصة ورا على كل خطوة، كل خُسارة، كل ضحكة، وكل دمعة، عديت على حاجات كتير، اتكسرت واتلميت، اتحبت واتخذلت، وقعت وقومت… لكن فوق كل ده، اتعلمت”.
أسما شريف منير: ٣٨ حاجة اتعلمتهم خلوني أبقى النسخة دي مني
وحددت أسما شريف منير منشورها بنقاط كالتالي:ـ
١. اللي بيسيبك وقت ضعفك ما يستحقكش وقت قوتك.
٢. الحب لوحده مش كفاية، لازم احترام وأمان ونية صافية.
٣. مفيش أغلى من راحة البال.
٤. الحدود مش قسوة، دي حب لنفسي.
٥. كل اللي حصل كان لازم يحصل عشان أوصل للي أنا عليه دلوقتي.
٦. الكتم مش قوة دايمًا، أوقات لازم أتكلم.
٧. الجمال الحقيقي جوايا مش في مراية ولا كاميرا.
٨. الناس بتتغير، وأنا كمان. وده طبيعي.
٩. ربنا عمره ما خذلني، حتى في أسوأ أيامي.
١٠. السُكوت مش دايمًا رضا، أوقات بيبقى وجع.
١١. اللي بيحبك بجد هيخليكي تحسي بالأمان مش التوتر.
١٢. اتعلمت أقول لأ من غير ما أبرر.
١٣. في حاجات كتير فقدتها، بس كسبت نفسي.
١٤. المغفرة مش معناها أرجّع الناس لحياتي، معناها أحرر قلبي.
١٥. مش لازم أكون كاملة عشان أكون كفاية.
١٦. الوقت بيكشف، والنية بتبان.
١٧. مفيش صدفة، كله ترتيب إلهي.
١٨. الكتابة أنقذتني.
١٩. لما بحب نفسي، كل حاجة حواليّ بتتغير.
٢٠. مش لازم أرد على كل حاجة.
٢١. اتعلمت أسمع صوتي قبل صوت الناس.
٢٢. كل ما كنت حقيقية، كل ما ارتحت أكتر.
٢٣. اتعلمت أقول “أنا تعبانة” من غير خجل.
٢٤. العلاقات مش كلها للأبد، بس كلها دروس.
٢٥. أتقبل التغيير، حتى لو وجعني.
٢٦. اللي راح مكانش ليّ، واللي جاي أحلى بكتير.
٢٧. لما بنضف قلبي، الدنيا بتنضف معاه.
٢٨. مش لازم كل حاجة تتقال. في حاجات بتتحس بس.
٢٩. الصوت اللي جوايا أهم من أي رأي خارجي.
٣٠. مش دايمًا الصح واضح، بس الإحساس بيقول.
٣١. اللي بيحسسني إني مش كفاية، ملوش مكان.
٣٢. الأمان الحقيقي في حضن ربنا.
٣٣. مش كل حاجة لازم أفهمها دلوقتي.
٣٤. في أوقات لازم أختفي عشان أرجع قوية.
٣٥. النجاح مش شهرة، النجاح سلام داخلي.
٣٦. اتعلمت أكون لنفسي اللي كنت مستنياها من الناس.
٣٧. لما ببطل أقاوم، الحياة بتسوقني للأحسن.
٣٨. أنا لسه بتعلم، ولسه قلبي مفتوح لكل جديد.
واختتمت، قائلة : "النهاردة، بحتفل بكل نسخ أكوني، وبحضن البنت اللي كانت، والست اللي بقت، واللي لسه جاية.
كل سنة وأنا أقرب لنفسي، وأكتر حب، وأكتر نور".
