سارة عبدالرحمن: مشهد خناقتي مع أشرف عبدالباقي كان من ورا قلبي| خاص

سارة عبدالرحمن .. تصدر مسلسل قلبي ومفتاحه محركات البحث على مواقع التواصل الاجتماعي، حيث أشاد به الكثير من المشاهدين بسبب فكرته الغير تقليدية وتتابع الأحداث في شكل مشوق وأداء أبطال العمل الذين جذبوا انتباه المشاهدين.

وكان لموقع الأيام المصرية حوار خاص مع الفنانة سارة عبدالرحمن "إحدى أبطال المسلسل" كشفت فيه كواليس مشاركتها في العمل، وعبرت سارة عن سعادتها بردود أفعال المشاهدين على المسلسل، قائلة: "اه تابعت ردود الأفعال ولفت انتباهي إن الناس الحمد لله كانت مصدقة الشخصية جدا ودي حاجة بالنسبة لي جميلة يعني اللي رشحني في الدور هو أستاذ تامر محسن وأنا سعيدة جدا إن أنا يعني اشتغل مع أستاذ تامر لأن يعني بحب شغله جدا ومبسوطة إن في يعني فرصة إني اشتغل معاه".

سارة عبدالرحمن: اللي جذبني للدور إن هي شخصية عادية جدا كل آمالها كان إن هي تتجوز ابن عمتها

وأشارت سارة عبدالرحمن إلى السبب الذي جذبها لتجسيد الدور قائلة: "اللي جذبني للدور إن هي شخصية عادية جدا كل آمالها كان إن هي تتجوز ابن عمتها وبيحصل لها تحول يعني إن هي خلاص لما بتكتشف أن مفيش أمل أنه يحبها بتشوف نفسها يعني".

وكشفت سارة عن كواليس مسلسل قلبي ومفتاحه، قائلة: "كواليس المسلسل كانت لطيفة جدا كان في نظام الموضوع كان منظم وكان بروفيشنال جدا جدا كل التفاصيل معمول حسابها وفي نفس الوقت يعني الواحد مطمن وهو بيشتغل لأن هو عارف أن هو في إيد أمينة يعني".

سارة عبدالرحمن: أصعب مشهد كان وأنا بكلم أشرف عبد الباقي كده بغضب شوية بس كان من ورا قلبي

وعن أصعب مشهد واجهته في تصوير المسلسل، قالت سارة عبدالرحمن: "بالنسبة لأصعب مشهد الحمد لله المشاهد كلها الكرو كله بتاع التصوير وفريق الإخراج والتصوير وأستاذ تامر طبعا خلى كل حاجة فعلا الحمد لله مكانش في حاجة صعبة يعني، يمكن الحاجه الصعبة بس إنه مشهد زي إن إنا بكلم بابايا اللي هو أشرف عبد الباقي كده بغضب شوية بالنسبة لي بيبقى من ورا قلبي بس تمام يعني اللي هو ده الدور".

سارة عبدالرحمن: الناس كانت كمان مشتاقة لحاجة رومانسي أو حاجة بهذا القدر من الروقان

 وبسؤالها هل المسلسل أتظلم بسبب عرضه في رمضان مش في الأوف سيزون، أجابت: "لا لا بالعكس أنا شايفة إن هو المسلسل متظلمش هو الحمد لله اتعرض في وقت كويس واتشاف والناس كانت كمان مشتاقة لحاجة رومانسي أو حاجة بهذا القدر من الروقان فالحمد لله يعني بالعكس أنا شايفة إن هو كويس قوي إن هو في رمضان".

وتابعت سارة عبدالرحمن، "هو بصراحة عشان هو المسلسل حلو فالحمد لله كان سهل إن هو يبان في وسط كل حاجة يعني بيبقى برضو إن الواحد يشتغل في رمضان مش بتبقى سهلة عشان بيبقى في منافسة قوية بس في نفس الوقت الحمد لله أستاذ تامر ما شاء الله أعماله كلها بتنور.. فالحمد لله إن هو نور في رمضان ".

سارة عبدالرحمن: بتابع ولاد الشمس وأشغال شقة جداً وقلبي ومفتاحه 

وصرحت سارة عبدالرحمن عن المسلسلات التي تتابعها في رمضان، قائلة: "بتابع ولاد الشمس وأشغال شقة جداً وقلبي ومفتاحه".

وعن الدور الذي تتمنى تجسيده قالت: "مش عارفة يعني بس أنا عايزة اعمل حاجة أنا معملتهاش قبل كدا يعني هو ده اللي أنا نفسي فيه".

وعبرت عن رأيها في تغلب المسلسلات القصيرة على موسم رمضان 2025، قائلة: "أنا عجبني ان المسلسلات بقت 15 حلقة لأن هي خلت القصص تتحكي بشكل مظبوط أكتر ومنجز يعني وخلى إن المسلسلات أكتر فاحنا نقدر نشوف أعمال أكتر من كدا".