نورهان : لازم المدارس الدولية تتبنى فكرة مهرجان حكاوي لفنون الطفل |خاص

نورهان .. أعربت الفنانة نورهان عن سعادتها بتكريمها على هامش فعاليات مهرجان حكاوي الدولي لفنون الطفل.

وأوضحت نورهان في تصريحات خاصة لموقع "الأيام المصرية" عن إعجابها بفكرة المهرجان وأشادت بمجهود مؤسسيه.

وعبرت نورهان عن سعادتها، قائلة: "أنا مبسوطة جداً جداً النهاردة بوجودي في مهرجان حكاوي وأنا كنت من المعجبين بالمهرجان ومن المعجبين بمؤسسيه من قبل ما يتم ترشيحي إني أكون ضيفة شرف ويتم تكريمي فيه فطبعاً لما جه التكريم فرحت أكتر وانبسطت أكتر".

وأضافت: "أنا كنت الأول من المعجبين بيهم وبشجعهم من بعيد لبعيد وبرشحهم لكل الناس اللي أعرفهم سواء في المدارس الدولية بحكم إن ده شغلي في الوقت الحالي، أو بحكم إن أنا فنانة وأنا بشوف إنهم بيشجعوا جداً وجود الفن في حياة الأطفال بإنهم بيخلوا الأطفال يمارسوه في الورش اللي بيعملوها على هامش المهرجان أو عن طريق إنهم بيعرضوا لهم عروض موجهة للأطفال مناسبة ليهم وفيها أمان لأنه الرقابة بتشوفها الأول فبصراحة أنا بحب جداً جداً مؤسسي المهرجان وبحب المهرجان ومن زمان وانا معجبة بيه".

وتابعت: "كمان لما إتقالي إني مرشحة للتكريم سعدت جداً جداً وجيت وأنا بمنتهى الحماس بدعمهم من كل قلبي".

واستكملت: "أنا شايفة إن المهرجان عامل مجهود عظيم، أنا رأي إن هو لازم يوسعوا نشاطهم أكتر من كده بكتير، ولازم المدارس الدولية تتبنى فكرة إنهم في وقت مهرجان حكاوي يخلوا كل الأولاد يجوا يحضروا كل العروض وكل الورش ودي تبقى حاجة مثبتة ومقدسة في كل المدارس، لأنه المهرجان جدير إنه ياخد الإتجاه ده وجدير بأن هو يتوسع في هذا المجال جداً".

إشادة نورهان بمهرجان حكاوي الدولي 

وأردفت: "هما متفانين جداً بقالهم 14 سنة بيعملوا ده، يعني أنا شايفة إن كان من العبقرية إنهم قدروا يستشرفوا المستقبل ويعرفوا إن العيال في منطقة صعبة فبصراحة أنا نفسي إن كل الناس تعتمد الفترة اللي بيقام فيها مهرجان حكاوي بأنه يخلوا الأولاد في مدارسهم يجوا يحضروا يشوفوا العروض ويحضروا الورش ويتربى ذوقهم على حاجه أرقى من اللي بيشوفوها على الموبايلات".